Ia Faia Mea Lelei ma Viiviia Ai!
1 “O loo iā i latou se uiga toʻafilemu ou te leʻi vaaia muamua lava i ai i isi tagata.” “O se fiafiaga le talimālō i nei tagata.” O faamatalaga lelei nei ua masani ona faalogoina mai tagata o loo maimoa mai, ina ua mavae le tauaofiaga itumalo o le tausaga na teʻa nei, ma ua faamamafa mai ai lo tatou talaaga lelei o se faalapotopotoga. (Faata. 27:2; 1 Kori. 4:9) O le iʻuga, e faafoʻi atu lena viiga iā Ieova. (Mata. 5:16) Ua taatia mai nei mo i tatou se isi foʻi avanoa e sili ona lelei e vivii atu ai i le Atua, i le tauaofiaga itumalo o lenei tausaga, o “Faiaʻoga o le Afioga a le Atua.”
2 I tausaga taʻitasi, e faamanatu mai ai pea ma le agalelei iā i tatou, le tulaga o amioga e talafeagai ona faaalia i le tauaofiaga. Aiseā? Talu ai, a o faasolosolo ina mou atu le tulaga lelei o uiga, o laʻei, ma amioga a tagata o le lalolagi, peitaʻi e tatou te lē fia faataʻitaʻi atu fua i ai. E tatou te lē mananaʻo e faaponaʻia ai lo tatou talaaga lelei. (Efe. 2:2; 4:17) Seʻi teu i o tatou mafaufau upu lapataʻi nei.
3 Ia Faia Mea Lelei—Pe a Nonofo ma Tauaiga: Pe afai o loo e nofo i ni ou tauaiga e lē upu moni, e mafai ona e valaaulia i latou e tou te ō mai faatasi i le tauaofiaga. Pe a māeʻa le tauaofiaga i aso taʻitasi, ia e taʻu atu iā i latou au mea na fai i le tauaofiaga, le auala sa faafoeina ai, faapea foʻi nisi na e feiloaʻi atu i ai i inā. Aua e te lauga atu i ai, ae tau ina faailoa atu i ai nisi o manatu autū sa e aʻoaʻoina mai i lena aso. Pe afai sa iai se lomiga na tatalaina ai, atonu o le a manaʻo e avatu se kopi iā i latou.
4 Talu ai o le nonofo o lou aiga i inā, o lona uiga o le a faaopoopo ai isi mea faaalu ma galuegafai a i latou o loo taliapi iā te outou, e lelei la pe a fesoasoani atu i nei itu i se tele e mafai ai. E masani ona talafeagai le avatu o ni meaalofa o taumafa pe a tou ō atu. I le taimi o loo tou nonofo ai, ia fesoasoani i le taimi e gasese ma laulauina ai taumafa, faapea foʻi le taimi e faamamā ai ipu pe a māeʻa taumafataga, po o isi lava feʻau i le fale. Pe afai o loo maua e le aiga se taavale mo le feaveaʻia o outou, ia avatu i ai se seleni e fesoasoani i le penisini.
5 Ia Faia Mea Lelei—Pe a Nonofo ma Uso: Pe a māeʻa le tauaofiaga i aso taʻitasi, ia faaalu se taimi e talatalanoa faatasi ai i manatu tāua o lena polokalame. Pe a faia e tagata uma se taumafaiga e faaali ai ni o latou manatu, ona avea moni ai lea o lenei mea o se “fetufaaʻiga o faamāfanafanaga.” (Roma 1:12, NW) E lē gata i lea, pe mafai ona e fesoasoani atu i feʻau i le fale i taeao taʻitasi, ina ia lē paʻū ai le mamafa i nisi? O le faia faapea, o le a mafai ai e tagata uma ona vave taunuu atu i le tauaofiaga, ma o le a leai ai se tasi e vaivai ma lē mafai ai ona faalogologo lelei. Ia tautuanā ma oe meatotino a i latou o loo e api ai. Vaai lelei le fanau laiti ina neʻi o latou faamatagā pe faaleaga se mea. Ia avatu sau fesoasoani i tupe faaalu a o e nofo ai. Ia faaalia lou talisapaia o le agaga talimālō o loo faaali ane.
6 Ia Faia Mea Lelei—I le Nofoaga o le Tauaofiaga: Ua mātauina e iai nisi ʻauusufono e lē fia mananaʻo e felagolagomaʻi ma le ʻautautua, ma ua oo lava ina tautatala atu iā i latou i se uiga lē faa-Kerisiano. E mautinoa lava, o le uiga fia matamuamua e lē gata ina e lē mātaulia ai se tasi o sē e faia mea lelei, ae e lē aumaia ai foʻi le viiga iā Ieova le Atua. O lea la, seʻi o tatou faaalia le alofa, le onosai, ma le lagolagosua.—Kala. 5:22, 23, 25.
7 I nisi tauaofiaga, e tele ina tamomoʻe solo le fanau laiti, a o leʻi amataina pe ina ua māeʻa foʻi le polokalame, lea e ono mataʻutia tele. Mātua e, ia vaavaai faalelei a outou fanau, auā o amioga lē pulea faapena o le a avea o se faalavelave i isi tagata usufono faapea foʻi i tuaoi. E ui ina fautuaina i tatou e aumai sina taumafataga māmā mo le aoauli, ae lē talafeagai ai le matuā laulau o se taumafataga tele, lea e ono foliga atu ai o loo tatou faia se pātī e pei ona iai i nisi taimi pe a faia ni taaloga.
8 Ia Faia Mea Lelei—E Ala i o Tatou Laʻei ma Teuga: Ina ua māeʻa se tasi o tauaofiaga itumalo i le tausaga na teʻa nei, na tusia ai e le faatonu o se nusipepa e faapea: “O le itu na sili atu ona mataʻina na i lo se isi lava mea, o amioga ia a Molimau lava latou. Maʻeu le matagofie o le vaai atu i le anoano o tagata o loo latou amioaʻi i se uiga mamalu ma le faaaloalo. I le laʻeiina o o latou laʻei e sili ona lelei, e faitau selau aiga sa fai ma sui o ituaiga o lanu ma tupuaga eseese sa lolofi atu ma le fifilemu i totonu o le malae. Sa matuā eseese lava o latou uiga mai uiga o le toʻatele o tagata e ō atu i lena malae.” Tau ina ia aua lava neʻi avea o tatou laʻei ma teuga po o a tatou amioga, ma itu e faaleagaina ai le siʻomaga faaleagaga o le tauaofiaga.—Fili. 1:10; 1 Timo. 2:9, 10.
9 Ia Faia Mea Lelei—I le Papatisoga: O le a mananaʻo i latou ua faatulaga mo le papatisoga, e matuā faamamaluina lenei sauniga. O le laʻeiina o ni ofutāʻele e talafeagai o le a faaalia ai le talisapaia o le paia o le sauniga. O le a sili atu ona lelei mo ē o loo faafoeina suʻesuʻega faale-Tusi Paia, ona autalu ma a latou tagata suʻesuʻe a o leʻi auai atu i le tauaofiaga, le mataupu o “Fesili Mai le ʻAufaitau” i le lomiga o Le Olomatamata o Aperila 1, 1995.
10 O o tatou uiga faaaloalo ma amioga faale-Atua ua fai ma molimau i o tatou talitonuga faa-Kerisiano, ma atili faigofie ai mo ē lotofaamaoni ona latou amanaʻia le upu moni. O lea la, seʻi o tatou faia pea le “amio lelei” ma viiviia ai a o auai atu i le Tauaofiaga Itumalo o “Faiaʻoga o le Afioga a le Atua.”—Roma 13:3.