“Pe e Tatau Ona Ou Siitia Atu?”
1 I le tali atu i le poloaʻiga a Iesu e “o atu e fai nuu uma lava ma soo,” ua ō atu ai le toʻatele o auauna a Ieova e auauna i le mea o manaʻomia tele ai le fesoasoani. (Mata. 28:19) Ua latou faataʻitaʻi ia Paulo, o lē na tali atu i le valaau: “Sau ia i Maketonia, ma fesoasoani mai ia te i matou.” (Galu. 16:9) E mafai faapefea ona faia o lenei mea i se auala aogā?
2 Ia Faasolosolo i Laasaga Taʻitasi: Pe e iai se oganuu a lau faapotopotoga e seāseā galueaʻiina? Afai e iai, e mafai la ona uaʻi saʻo atu au taumafaiga i na vaipanoa. A o e leʻi filifili e te alu i se isi mea, ia talanoa ma toeaina o lau faapotopotoga ina ia iloa ai po o latou lagona ua e agavaa e alu atu i se isi nofoaga. E ono mafai foʻi ona e fesili atu i le ovasia matagaluega pe na te silafia se faapotopotoga e latalata ane ina ia mafai ai ona faalautele atu lau faiva. I le isi itu, pe a uma ona fuafua ma le faaeteete po ua e mafaia, atonu la e te manaʻo e fesoasoani atu i se tasi vaega o le atunuu po o se isi atunuu. Afai o lou manaʻo lena, e tatau la ona e tusi faatasi atu ma le ʻautoeaina o lau faapotopotoga i le ofisa o le lālā o le atunuu lea e te fia auauna ai, e otooto atu ai lou talaaga faatiokarate. Atonu o se faiga atamai le muaʻi asiasi atu i lena vaipanoa a o leʻi faia se filifiliga pe siitia atu e nofo mau pe leai.
3 Ia Faautauta e Uiga i le Siitia Atu i se Isi Atunuu: Ua faateleina le aofaʻi o o tatou uso ua siitia atu i isi atunuu ona o le saʻilia a lē o se tulaga lelei o le soifuaga po o le fia maua foʻi o se mapusaga mai teteega. I lea tulaga, ua paʻūʻū atu ai nisi i le mailei a tagata lē taupulea o ē folafola mai o le a fesoasoani ia i latou ina ia faamautū i lea nuu fou, ae o ē e na ona mananaʻo e ave a latou tupe ona tuulafoaʻi lea o i latou. I nisi o tulaga, ua oo lava ina taumafai nei tagata e uunaʻi faamalosi ia tagata faimalaga atu e ola i ni olaga lē mamā faatalitane. Afai latou te mumusu, ona aunoa ai loa lea o i latou ma se fesoasoani i lena atunuu ua latou ō atu i ai. I lea, ua oo ai ina matuā sili atu ona leaga le tulaga o tagata faimalaga atu na i lo o le tulaga sa iai i o latou atunuu moni. Ua oo lava ina latou talosaga atu i uso ia latou nonofo faatasi ma ia fesoasoani atu ia i latou, ua faamamafa ai fua le avega i isi aiga Kerisiano o ē o loo tauivi ma o latou foʻi faafitauli ma tulaga faigatā. Ua oo lava ina nonofo eseese ai tagata o nisi aiga, ma ua oo ai ina vaivai faaleagaga aiga ona o na filifiliga e lē atamai i le siitia atu.—1 Timo. 6:8-11.
4 Afai e te manaʻo e siitia atu ona o ni lelei totino, ia manatua, e tusa lava po o fea e te mau ai, e iai lava faafitauli e tatau ona faafesagaʻia. E sili atu ona faigofie ona foʻia na faafitauli i le mea e te iloa lelei ai le gagana ma le aganuu, na i lo o le amataina o se olaga fou e te lē masani i ona siʻomaga.