O Meafaigaluega e Aʻoaʻo, Uunaʻia, ma Faamalosia Ai
1 O na meafaigaluega e malolosi mo le aʻoaʻoina ai o tagata e uiga i le Tusi Paia ma Molimau a Ieova. Ua uunaʻia ai foʻi le toʻatele ina ia tutū mausalī mo le upu moni. Ua faamalosia ai le faatuatua ma le talisapaia o tagata tuuina atu o le Atua. O ā na meafaigaluega? O vitiō ua saunia e le faalapotopotoga a Ieova. Po ua e matamata uma i na vitiō e sefulu? Talu mai anafea? Pe e te faaaogāina na vitiō i lau faiva? Na faasilasilaina le tatalaina o le vitiō lona 11, ua faaigoaina o le Our Whole Association of Brothers i le tauaofiaga itumalo. Po ua e otaina lena vitiō? E mafai faapefea ona e maua atili ai aogā mai nei meafaigaluega matagofie?
2 I le mataupu i Le Olomatamata o Iulai 1, 1999, e faapea “Ia Suʻesuʻe e Lē Aunoa e le Aiga Atoa le Afioga a le Atua” na fautuaina ai ina ia “faataatia ese se vaega o le taimi o la outou suʻesuʻega e matamata ai i se vaega o se tasi o vitiō aogā a le Sosaiete . . . ona talatalanoa lea i ai.” E tusa ai ma lena fautuaga lelei, o le a faatomua atu ai se isi vitiō e ese mai, i le Sauniga o le Auaunaga i le taʻilua masina. E matou te faalaeiauina tagata uma i le faapotopotoga ina ia matamata le vitiō i le aiga a o leʻi talanoaina i le Sauniga o le Auaunaga.
3 I le masina lenei e tatou te amata ai i le vitiō muamua lava lea na tatou saunia, Jehovah’s Witnesses—The Organization Behind the Name. Ia matamata ma faalogologo mo tali i nei fesili:
◼ O le ā ua sili atu ona iloa lelei ai Molimau a Ieova?
◼ O mea uma lava ua faia i Peteli ua fesootaʻi atu ma le ā le mau o le Tusi Paia?
◼ O le ā le tala faale-Tusi Paia na e vaaia o loo faatulagaina, puʻeina ma valiina mo le faaaogāina i lomiga?
◼ O le ā ua e maofa ai e uiga i le auala ua saunia ai a tatou lomiga?
◼ Mai le 1920 e oo i le 1990, e fia ni lomiga na lomia e le Sosaiete?
◼ O ai faapitoa lava i tagata o le Atua e ao ona aapa atu ina ia taʻuagavaaina mo le auaunaga i Peteli?—Faata. 20:29.
◼ I ā auala e faataatia ai e le aiga Peteli se faaaʻoaʻoga sili ona lelei mo Molimau a Ieova uma?
◼ O le ā ua faagaeetia ai oe ona o le galuega o loo faia i Peteli ina ia oo atu ai le tala lelei i le toʻatele o tagata e mafai ai?
◼ O faapefea ona faatupeina le galuega i le lalolagi aoao?
◼ O le ā le galuega e mafai ona lagolagosua i ai ma le maelega, ma faatasi ai ma le ā le agaga?—Ioa. 4:35; Galu. 1:8.
◼ O le ā sou lagona e uiga i le faalapotopotoga o loo tauaveina lo tatou igoa?
◼ E mafai faapefea ona e faaaogā le vitiō i le faiva?
Ia Tesema o le a tatou autaluina ai le vitiō, The Bible—Accurate History, Reliable Prophecy.