Atiina Aʻe le Naunau na Faagaeeina i le Tala o le Malo Nu. 36
1 Po ua māeʻa ona tufatufaina atu lau vaega o Tala o le Malo Nu. 36? O loo fesiligia ai se fesili talafeagai mo tagata uma ia mafaufau loloto i ai: “Le Meleniuma Fou—O le ā o i le Lumanaʻi mo Oe?” A o latalata i le tausaga e 2000, na matuā eseese ai lava mea na faatalitalia o le a aumaia e le meleniuma fou. O loo talanoaina i le Tala o le Malo Nu. 36 nisi o na mea na faatalitalia ma faamanatu mai ai ia i tatou e faapea, e lē o saunia e tulaga o loo iai i le lalolagi se faavae mo se faamoemoega mautinoa. E na o le pau lava le meleniuma o le a aumaia le filemu ma le saogalemu lea o loo saʻilia e le toʻatele o tagata, o le Pulega faa-Meleniuma lea a Keriso Iesu. O lo tatou mautinoa e uiga i le moni o lona Malo ua uunaʻia ai i tatou e tufa atu lenei Tala o le Malo Nu. 36 i tagata uma e mafai ona tatou oo atu i ai.
2 Tali Mai i le Tala o le Malo: O le tufatufaina atu talu ai o Tala o le Malo ua avea o se uunaʻiga lelei ia i tatou i la tatou galuega. E faatatau i le Tala o le Malo Nu. 35, na tusi mai ai le lālā i Kanata e faapea: “O lenei tauiviga faapitoa na lagolagoina ma le aasa e le ʻautalaʻi ma paeonia i le fanua, ma e tele ni mea faalaeiau na tutupu na olioli ai.” E lē taumatea ua faapena foʻi ona e faaalia lena aasa mo le tufatufaina atu o le Tala o le Malo Nu. 36.
3 O le tauiviga o loo faia nei mo le tufatufaina atu o le Tala o le Malo ua fuafuaina e faamāeʻaina ia Novema 17, 2000. Po ua galueaʻiina uma le oganuu na tofia atu i la outou faapotopotoga? Afai e leai, e mafai ona talosaga atu toeaina ia te outou ina ia faaauau le tauiviga seʻia oo i le faaiʻuga o Novema.
4 O ā ni uiga na faaalia i lou vaipanoa i le tufatufaina atu o le Tala o le Malo Nu. 36? O le a faatumuina e ni nai tagata le kuponi ma talosagaina se kopi o le polosiua o le Manaomia po o se suʻesuʻega faale-Tusi Paia i le aiga po o mea uma e lua. Ae peitaʻi, o le toʻatele o i latou na uluaʻi faaalia le fiafia i le mataupu o le meleniuma, e foliga mai e lē o faia se gaoioiga seʻi vaganā ua toe asiasi atu se tasi o Molimau a Ieova. O i latou uma na faaalia le fiafia e tatau ona toe asia. O fea se taimi lelei o le a faia ai lenei mea? E tatau ona faia le toe asiga i le vave e mafai ai.
5 Mātau mea nei na iʻu i ai ona o le toe foʻi e asia i latou na tuu i ai Tala o le Malo Nu. 35. Sa tuu e se paeonia i Aialani se Tala o le Malo i lē e ana se faleʻaiga. Na faafiafiaina le fafine i le feʻau ma valaaulia le tuafafine ina ia toe asiasi atu. Na toe foʻi atu le tuafafine i le aso lona lua, ma na amataina ai se suʻesuʻega faale-Tusi Paia. I Tenemaka, na tuua se kopi o le Tala o le Malo i se fale sa leʻi maua atu i ai se isi. I lena lava aso na auina atu ai e le fafine e nofo ai iinā le kuponi i le ofisa o le lālā, ma tuuina atu ai loa i le faapotopotoga iinā. A o leʻi uma le vaiaso, na asiasi atu loa i ai ni tuafāfine se toʻalua, na faia se fuafuaga mo se suʻesuʻega, ma na auai ai le fafine mo lana uluaʻi sauniga i le Maota o le Malo!
6 Le Tala e Fai Atu pe a E Toe Foʻi: O le toe asia o i latou na tuu i ai Tala o le Malo, e matuā faigofie lava ma o se vaega lea o la tatou faiva e fiafia ai. Pe a faia toe asiga, e fautuaina lou alu ma ave sau kopi o le Tala o le Malo Nu. 36, ina neʻi meanē ua lē o iai le kopi a lē ona le fale. Atonu e mafai ona e faataʻitaʻia nei fautuaga.
7 Pe a uma ona e toe faailoa atu ia oe lava i lē ona le fale, ona e faapea atu lea:
◼ “Na ou tuua ia te oe se savali o loo lomia ai se feʻau o lona matua ‘Le Meleniuma Fou—O le ā o i le Lumanaʻi mo Oe?’ Pe sa lē o se mea ea e faalaeiau ai le faitau atu i ai e faapea ua toeitiiti lava ona amata lea o le Pulega faa-Meleniuma a Iesu Keriso, ma aumaia ai tulaga faa-Parataiso i le lalolagi? [Faaali i ai le ata o le Parataiso i le Tala o le Malo Nu. 36.] I le itulau i tua, o loo valaauina ai oe ina ia e talosaga atu mo se kopi o le polosiua O le ā e Manaomia e le Atua Mai ia i Tatou?” Faaali le polosiua ona suʻe lea i le lesona e 5, faitau le fesili muamua ma le palakalafa 1 ma le 2, ma fesili i lē ona le fale mo sona manatu. Faitau ma talanoa i se mau se tasi po o se lua. Afai e mafai, ona talanoa lea i se isi fesili ma se palakalafa, ona fuafua lea e te toe foʻi atu ma faaauau le talanoaga.
8 Talu ai o le ofo e sosoo ai mo Novema o le polosiua o le “Manaomia” po o le tusi o “Le Poto,” e mafai la ona e faapea atu:
◼ “I laʻu asiasiga talu ai nei ia te oe, na ou tuua ai se kopi o le savali o lona matua e faapea, ‘Le Meleniuma Fou—O le ā o i le Lumanaʻi mo Oe?’ O loo ofoina atu ai se suʻesuʻega faale-Tusi Paia i le aiga e faia e aunoa ma se totogi. O lea la ua ou toe foʻi mai e faailoa atu ia te oe le fesoasoani lea matou te faaaogāina mo le faia o suʻesuʻega. [Faaali le polosiua o le Manaomia, ma suʻe i le faavaa i le pito i tua; pe faaali le tusi o Le Poto, ma suʻe i le itulau e 188-189.] O le Meleniuma lea o loo talanoaina i le Tusi Paia o le a aumaia ia tulaga e pei o mea ia o loo e tagaʻi i ai i lenei ata. Ina ia agavaa mo le ola i le Parataiso, e manaʻomia ona tatou ave i fale le poto saʻo e uiga i le Atua. Faamolemole pe mafai ona ou faataʻitaʻi puupuu atu le auala e tatou te suʻesuʻeina ai le Tusi Paia.”
9 O le tufatufaina atu o le Tala o le Malo Nu. 36 ua uunaʻia ai i tatou ina ia faateleina le faia o so tatou sao i le faiva, ma avatu ai se molimau sili. Ua faapena foʻi ona uunaʻia ai e lenei mea le naunau fiafia o le toʻatele o tagata i le oganuu. O a tatou taumafaiga autasi ina ia ati aʻe lenei naunau fiafia, faatasi ma le fesoasoani a Ieova, o le a iʻu ai ina faafiafiaina i tatou i le saʻilia o le toʻatele o ē pei o ni mamoe.—Mata. 10:11; Galu. 13:48, 49, 52.