Ia Toe Asia i Latou na Faaalia le Fiafia i le Tala o le Malo
1 I nai vaiaso mulimuli na seʻi mavae atu, na tatou olioli ai i le tufatufaina atu o le Tala o le Malo Nu. 35, ua faaulutalaina, “Pe e Iai ea se Taimi o le a Fealofani ai Tagata Uma?” O loo faia e tagata talaʻi uma i so o se mea ni taumafaiga latou te mafaia ina ia oo atu ai i le toatele o tagata ua tatau ai ma lenei lomiga o le Tala o le Malo. (Mata. 10:11) E ui lava ua fuafuaina e faaiuina le tauiviga i le Aso Sa, Novema 16, ae afai o iai pea nisi oganuu e tatau ona galueaiina, atonu e talosaga atu toeaina ia te outou ina ia faaauau pea ona tufaina atu le Tala o le Malo Nu. 35 seia faamaeaina sāvali a le faapotopotoga.
2 O lenei lomiga o le Tala o le Malo ua faaosofia ai le naunau fiafia o le toatele o tagata. Ua latou vaaia le leai o se alofa faaleuso i tagata lautele ma i lea, ua latou tau mānatu ai po o le ā se mea lelei o iai i le lumanai. (2 Timo. 3:3) Tatou te mananao e toe asiasi atu i tagata na faaalia le fiafia.
3 Maua Iuga Lelei i le Tala o le Malo: I le vaitaimi o le tauiviga i le 1995 i le tufaina atu o le Tala o le Malo, na sau ai i le sauniga i le Maota o le Malo se fafine na ia mauaina se kopi o le Tala o le Malo, ona o lona fia iloa atili e uiga i mea e talitonu i ai Molimau a Ieova. I lena sauniga, na ia talia ai ma le fiafia se suesuega faale-Tusi Paia, ma mulimuli ane sa seāseā lava ona ia misia se sauniga. E lei umi lava se taimi, ae tusi atu o ia i le lotu lea na ia auai atu muamua i ai ina ia faamutaina le toe avea o ia o se tasi o ona sui!
4 I le taimi lenei, e faitau selau tagata i le oganuu ua faitau i le feau lea o loo i le Tala o le Malo Nu. 35. Ae o le ā la latou tali mai i lea feau? E ui lava ua faafiafiaina i latou i mea na latou faitau i ai, ae e toatele lava o le a lē faia se gaoioiga seiloga lava ua toe asiasi atu i ai se tasi o Molimau a Ieova ia i latou. Po o faia ni au fuafuaga e toe foi atu? O le manatu mamafa ma le alofa i o tatou uso a tagata e ao ona uunaia ai i tatou e faia faapea. O i latou uma o ē na faaalia le fiafia i le Tala o le Malo e tatau ona toe asiasi atu i ai.
5 O le ā Sau Tala o le a Fai Atu pe a E Toe Foi Atu? E mafai ona e fai atu ni nai faamatalaga e uiga i le talafeagai lelei o le feau i le Tala o le Malo ma le taimi, ona e fai atu lea o se fesili faatupu manatu. Ia faalogologo lelei a o faaalia e lē ona le fale ona manatu ina ia mafai ai ona e iloa le mea o i lona mafaufau. Ia ona faasino lea i ai o se manatu talafeagai i le polosiua o le Manaomia, lea na faaalia i le Tala o le Malo. Afai e tali lelei mai, taumafai e amata loa lava se suesuega faale-Tusi Paia.
6 O nisi nei o taulimaga ua fautuaina e mafai ona e faataitaia pe a e toe foi atu ia i latou na faaalia le fiafia i le “Tala o le Malo” Nu. 35:
◼ “Atonu o e manatua le sāvali lea na ou tuua ia te oe talu ai. O le feau o loo iai, o loo talanoaina ai se mataupu tāua ua fevaevaeaiina ai tagata i aso nei—o le leai o se alofa mo isi tagata.” Faasino i le faamaoniga o loo i le itulau 2 o le Tala o le Malo i lalo o le ulutala “Ua Mou Atu le Alofa i Tuaoi.” Ona fesili lea i ai, “E te manatu o le auala lenei na fuafuaina e le Atua ia ola ai tagata?” Faatali mo se tali. Suʻe i le lesona e 5 i le polosiua o le Manaomia, ma taumafai e amata se suesuega faale-Tusi Paia.
◼ “I la ta feiloaiga muamua, na ou tuua ai ia te oe se sāvali o loo iai ni faamatalaga e uiga i le mataupu e faapea, ‘Pe e Iai ea se Taimi o le a Fealofani ai Tagata Uma?’ Pe e te manatu e mafai ona iai se lalolagi faapena?” Faatali mo se tali. Suʻe i le lesona 6 i le polosiua o le Manaomia, ma faitau le palakalafa 6. Ona faitau lea o le folafolaga a le Atua i le Mika 4:3, 4. Afai e foliga mai e fiafia lē ona le fale, ofo i ai le polosiua ma se suesuega.
◼ “I le taimi mulimuli lea na ou asiasi mai ai ia te oe, na ou tuua ai se sāvali ua faaulutalaina e faapea ‘Pe e Iai ea se Taimi o le a Fealofani ai Tagata Uma?’ O loo iai i lena sāvali se ofo mo le faia o se suesuega faale-Tusi Paia i le aiga e aunoa ma se totogi. Ua ou toe foi mai la e faailoa atu ia te oe le fesoasoani lea matou te faaaogaina e faia ai suesuega. [Faaali le tusi o Le Poto.] O loo faamatala manino ai i lenei tusi le taimi o le a mafai ai ona fealofani tagata uma, ma o loo taliina ai foi isi fesili atonu o e fia maua i ai ni tali: Aisea tatou te ola matutua ai ma feoti? Aisea ua faataga ai e le Atua puapuaga? O le ā e tupu i ē pele ia i tatou ua maliliu?” Ona e fesili atu lea, “E mafai ona ou faataitai atu ia te oe le auala e faia ai le suesuega?” Afai e teena e lē ona le fale lau ofo, ona fesili lea i ai pe manao e tuu le tusi e faitau lava ia i ai. Afai e manao ai, tuu se kopi ma faamatala i ai o la tatou galuega o le faia o aʻoaʻoga faale-Tusi Paia i le lalolagi aoao, e lagolagoina e meaalofa tauofo. Fai se fuafuaga e toe foi atu.
7 Pe a maeʻa ona galueaiina uma le oganuu i le tufaina atu o le Tala o le Malo Nu. 35, e mafai ona tatou ofoina le tusi o Le Poto i aso na e totoe o le masina. E anoanoai taulimaga ua fautuaina mai mo le ofoina o lenei tusi ua mafai ona maua i le itulau pito i tua o La Tatou Faiva o le Malo o Tesema 1995; Mati, Iuni, ma Novema 1996; ma Iuni 1997.
8 O lenei tufatufaina atu faapitoa o le Tala o le Malo e ao ona uunaia ai i tatou uma ina ia faateleina a tatou taumafaiga i le galuega talaʻi. Faatasi ma le fesoasoani a Ieova, e mafai ai ona tatou mautinoa o le a taulau manuia lenei tauiviga, e fesoasoani atu ai i tagata ina ia iloa le fuafuaga a le Atua mo tagata uma ina ia fealofani. Tau ina ia faamanuiaina pea e Ieova a tatou taumafaiga filigā a o tatou toe foi atu e asia tagata na faaalia le fiafia i le Tala o le Malo.