Tauaofiaga—Taimi e Olioli Ai!

¹ O tauaofiaga a Molimau a Ieova o taimi na o le olioli tele. Ua silia ma le selau tausaga, o saosaolaumea nei faatasitasiga i le faatelega lea ua iai i la tatou faalapotopotoga. I ni amataga laiti na amata mai ai, ua tatou vaaia ai nei le ʻoa o faamanuiaga a Ieova i la tatou galuega i le lalolagi aoao. I la tatou tauaofiaga muamua lava i ona pō nei, sa faia i Chicago i le Iunaite Setete, i le 1893, e toʻa 70, mai le aofia e 360 na auai, sa papatisoina e fai ma faailoga o lo latou tuuina atu iā Ieova. O le faasologa o Tauaofiaga Itumalo “O Ē Faia le Afioga a le Atua,” i le tausaga talu ai, sa iai se tuufaatasiga o le aofia i le lalolagi aoao e 9,454,055, ma le toʻa 129,367 o ē na papatisoina. Maʻeu se pogai matagofie e olioli ai!

² Talu mai lava taimi anamua o le Tusi Paia, ua saunia ai e faatasitasiga a tagata o le Atua, ni auala iloga mo le faaooina mai o faatonuga mai iā Ieova. I le taimi o Esera ma Neemia, sa faalogo atu tagata i le faitauina o le Tulafono “e afua i le malama ae o le taeao ua oo i le aoauli.” (Nee. 8:2, 3) Talu ai sa sili atu ona lelei le faamalamalamaina o le Tulafono i lena faatasiga, na lagona ai e tagata le “taufaiolioli tele.” (Nee. 8:8, 12) Ua tatou olioli foʻi ona ua saunia mai e tauaofiaga se avanoa lelei mo i tatou, e maua ai faatonuga lelei ma meaʻai faaleagaga mai iā Ieova, “i ona itu aso” e ala mai i “le auauna faamaoni ma le mafaufau.” (Mata. 24:45) Talu ai na fetalai Iesu e tatau ona ola le tagata i “afioga uma e tulei mai i le fofoga o [Ieova],” ua matuā tāua ai tauaofiaga i lo tatou mālōlōina lelei faaleagaga.—Mata. 4:4.

³ E Aogā Taumafaiga Uma Ina ia Auai: E tatau iā i tatou uma ona avea o so tatou sini totino le auai atu i le polokalame atoa o le tauaofiaga itumalo o lenei tausaga, o “Faiaʻoga o le Afioga a le Atua.” E tatau ona tatou fuafua ia vave ona taunuu i aso taʻitasi, ma ia nonofo ai pea i inā seʻia tatou auai faatasi uma i le faapea atu “Amene!” i le tatalo faaiʻu. Atonu e manaʻomia ai ona toe fetuutuunaʻi la tatou faasologa ina ia ausia lenei sini. Atonu e iai ni faafitauli e tulaʻi mai i le talosagaina o ni taimi mālōlō mai i a tatou galuega, ina ia auai atu ai i le tauaofiaga. E manaʻomia ona tatou faia se faaiʻuga mausalī, ma ia aua neʻi tuuina seʻi faatoʻā fai pe a oo atu i lena taimi. Pe afai tatou te manaʻomia ni api ma ni auala e femalagaaʻi ai, e tatau ona vave fai a tatou fuafuaga. Po o ā lava taumafaiga e tatau ona tatou fai, o le a mautinoa le aogā!

⁴ E lē fuaina e tagata o Ieova faamanuiaga o le auai atu i se tauaofiaga, i ni tupe. Seʻi mātau mai faaaʻoaʻoga a nisi o ē na maumauaʻi e auai atu i le Fonotaga Faava-o-atunuu a Molimau a Ieova, o le Finagalo Tauatua, lea sa faia i le 1958, i le aai o Niu Ioka. Na faamālōlō e se tasi uso lana pisinisi faufale mo vaiaso e lua, ina ia tauofo atu ai lana fesoasoani ma auai atu ai i le fonotaga. O se uso mai Virgin Islands, na ia faatauina atu se fanua e lima eka, ina ia mafai ai e lona aiga atoa e toʻaono ona auai. Sa faatau atu e se tasi ulugalii e lē matutua tele le la vaaafi ina ia mafai ai ona la aveina i le fono le la fanau uma e toʻatolu, e amata mai le tamaitiiti e lua masina le matua, e oo atu lava i le tamaitiiti e fitu ona tausaga. Na taʻu atu i se isi ʻauso tama e toʻatolu mai Kalifonia e faapea, pe afai o le a latou lē ō atu e faigaluega, o le a lē toe iai ni galuega mo i latou pe a toe foʻi atu. Peitaʻi ane, sa leʻi avea lena ma itu e taofia ai i latou mai le ō atu i lena fonotaga e lē mafaagaloina.

⁵ E Faamanuia e Ieova a Tatou Taumafaiga Naunautaʻi: E silasila mai Ieova ma faamanuia mai i taumafaiga a ona tagata. (Epe. 6:10) Mo se faaaʻoaʻoga, i le Fonotaga o le Faatelega Faatiokarate sa faia i le 1950, na faafofoga ai le aofia sa auai i se lauga e sili ona mataʻina e faapea “O Faiga Fou o Mea.” Na faagaee ma uunaʻia e le uso o Frederick Franz le naunau o ē uma na auai e ala i lona fesili mai: “Po o le a fiafia ea lenei aofia faava-o-atunuu e iloa faapea, i inei, i le pō lenei, i lo tatou lotolotoi, o loo iai nisi ua faamoemoe e avea ma aloalii o le lalolagi fou?” Ua silia ma le 50 tausaga talu mai lena lauga, ae o loo tatou olioli pea i lenei faamalamalamaga manino o le Salamo 45:16.

⁶ Ina ua mavae ona auai atu i le tauaofiaga itumalo i le tausaga na teʻa nei, na tusi mai ai i le agaga talisapaia e le ulu o se tasi aiga, le tusi lenei: “Uso e, o le a lē taitai ona outou silafiaina le telē o le faasaoola ua faia e lenei tauaofiaga. Na ō atu lo matou aiga e nonofo i le aai ona o māfuaaga tau i galuega, ae na avea ma itu na maluelue ai lo matou tulaga faaleagaga. . . . Sa matou faatalalē i a matou avega tauave faa-Kerisiano. Na oo lava ina matou lē toe ō i sauniga ma lē toe auai i le auaunaga. . . . Ua toe faafouina i matou e lenei tauaofiaga, ma o lenei ua toe faatutū o matou sini faaleagaga, ma toe taumafai e galulue ina ia faataunuu nei sini.”

⁷ O loo foaʻi mai pea e Ieova iā i tatou meaʻai faaleagaga e tatou te manaʻomia. O loo ia laulauina mai se faigaʻai susua i a tatou tauaofiaga. O lo tatou talisapaia o lenei sauniuniga ua tatau ona mafai ai ona tatou fai atu upu e pei ona sa tautala i ai Konelio ina ua asiasia o ia e le aposetolo o Peteru: “O loo iinei i matou uma lava i luma o le Atua, e faalogologo atu i mea uma lava ua poloai mai ai [Ieova] ia te oe.” (Galu. 10:33) Seʻi avea ma o tatou sini le iai “i luma o le Atua” i vaega uma o le polokalame o le Tauaofiaga Itumalo o “Faiaʻoga o le Afioga a le Atua” i lenei tausaga ma olioli ai!