Pe E te Talisapaia Mea Paia?
1 Ina ua fesiligia pe tatou te talisapaia mea paia, e foliga mai o le a vave lava ona tatou tali atu ioe! O ā nisi o sauniuniga paia a le Atua o loo tatou talisapaia?
2 Maʻeu le tāua ia i tatou o la tatou faiā tōtino ua mafai ona tatou faia ma lo tatou Tamā faalelagi! Ua ia faamautinoaina i tatou e faapea, afai tatou te ‘faalatalata atu ia te ia, ona faalatalata mai lea o ia ia i tatou.’ (Iako. 4:8) Ana lē seanoa le taulaga togiola a Iesu Keriso, e leai se tagata e mafai ona maua le ola e faavavau. (Ioa. 3:16) Ona o le lotofaafetai moni, ua tatou faailoa atu ai i aso uma i le tatalo lo tatou matuā talisapaia o lenei meaalofa tautele a le Atua.
3 E paia foʻi ia i tatou le Afioga a le Atua, le Tusi Paia, atoa ma le faalapotopotoga faalelalolagi a Ieova. E tatou te faaalia le talisapaia e tatau ai mo nei sauniuniga mai ia Ieova pe a tatou ola e tusa ma mataupu silisili o le Tusi Paia, faamalosia noataga o le alofa faaleuso, mātauina ma le faaeteete ia le maopoopoga faatiokarate, ma ia felagolagomaʻi ma i latou o loo taʻimua.—1 Pete. 1:22.
4 E ala i le auauna faamaoni ma le mafaufau, ua tatou maua ai le anoanoaʻi o meaʻai faaleagaga. O le a faapena foʻi i lenei tausaga i le Tauaofiaga Itumalo, “O Ē Faia le Afioga a le Atua.” Iinā o le a tatou maua ai faatonuga tāua ma olioli ai i le aufaatasiga mafana faaleuso lea e tatou te matuā manaʻomia lava. E mafai faapefea ona tatou faaalia le talisapaia mai le loto mo lenei sauniuniga paia?
5 Aua Neʻi Tuulafoaʻia le Fale o Ieova: Na apoapoaʻi atu Neemia i ē na galulue mamafa i le toe fausiaina o pa o Ierusalema ina ia ‘aua le tuua lava le fale o lo latou Atua.’ (Nee. 10:39) I nei aso, o le “fale” o Ieova, o lana sauniuniga lea mo le tapuaʻiga. O a tatou tauaofiaga itumalo, o se vaega lea o lena sauniuniga. Ina ia aua neʻi tuulafoaʻia lenei sauniuniga, e tatau ona tatou auai iinā ma ia matuā uaʻi totoʻa atu, e faailoa atu ai ia Ieova e tatou te matuā faatāuaina ana sauniuniga. (Epe. 10:24, 25) O ā ni fuafuaga o tatou faia i le taimi nei e faaalia ai lo tatou talisapaia atoatoa o lenei sauniga paia?
6 Auai i Aso Uma e Tolu: E ao ia i tatou uma ona faia ni fuafuaga ina ia auai mo aso uma e tolu o le tauaofiaga. Po o e fuafua e vave ona taunuu atu i le tauaofiaga i aso taʻitasi ma nonofo ai pea seʻi oo lava i le tatalo faaiʻu o le Aso Sa? Afai e faia faapena, o le a e maua ai la le ʻoa o faamanuiaga faaleagaga. O le auai i se tauaofiaga, atonu e lē faigofie i taimi uma. O le fetuunaʻi o lau galuega totogi e ono manaʻomia ai lou maumaututū. Atonu o le a faigatā ona maua ni auala o femalagaaʻiga i le tauaofiaga. Ae aua neʻi avea na vala ma mea e faalotovaivai ai oe mai le auai i le tauaofiaga.
7 Iloilo Lenei Faaaʻoaʻoga e Sili ona Lelei: I lo latou ō atu i se tauaofiaga itumalo i le tausaga ua mavae, na fetaiaʻi ai se vaega o uso i se atunuu o Aferika o loo vevesi ai le va o tagata lava o le atunuu ma se vaega o fitafita. Na fesiligia uso e faapea: “O ai outou, ma o fea o le a outou ō i ai?” Na latou tali atu: “O i matou o Molimau a Ieova, ma o loo matou ō atu e auai i la matou tauaofiaga itumalo.” Na faapea atu se tasi o fitafita: “O outou Molimau a Ieova e lē fefefe lava i se mea. Ia, ae ō, ma o le a mafai lava ona faia la outou tauaofiaga e aunoa ma se faalavelave. Ae peitaʻi, ia nofouta o le a outou fetaiaʻi ma le tele o fitafita. Ia savavali pea lava i le moa o le ala! Afai tou te vaaia ni tagata se toʻatele o faapotopoto, ia faaauau pea ona savavali i le moa o le ala!” Na latou faia faapea ma na taunuu ma le saogalemu i le tauaofiaga. Na tauia nei uso ona o lo latou faaalia o le talisapaia o mea paia.
8 I le pei o o tatou uso i Aferika, e tatou te fesagaʻi foʻi ma luʻi. Ae, e mautinoa e mafai lava ona tatou faataʻitaʻi i lo latou faatuatua ma faia ai se faaiʻuga ina ia auai i aso uma o la tatou tauaofiaga itumalo. Afai e manaʻomia ona faia ni fetuutuunaʻiga, vaavaai atu ia Ieova mo ni taʻiala, i le iloa o le a faamanuiaina e ia a tatou taumafaiga e auai i le polokalame atoa.
9 Seleseleina o Faamanuiaga: E tatou te naunau i le Afioga a le Atua, i le iloaina e faapea, e ala i lea e mafai ona tatou tuputupu ai i le faaolataga. (1 Pete. 2:2, LF) O lo tatou auai i le tauaofiaga itumalo ma faalogologo i le polokalame, o le a fesoasoani ia i tatou taʻitoʻatasi e ati aʻe se faatuatua malosi i lena Afioga ma i lea e sili atu ai ona tatou mafaia ona tatalia osofaʻiga a Satani. O le faia faapea, o le a tatou faailoa atu ai ia Ieova ma ē uma o vaavaai mai e faapea e tatou te talisapaia atoatoa mea paia ma “e le o ni e tuumuli . . . a o ni e faatuatua e ola ai le agaga.”—Epe. 10:39; 12:16; Faata. 27:11.
10 E mafai ona tatou vaavaai atu ia Ieova le Atua e na te tatalaina pupuni o le lagi ma sasaa mai ia i tatou le matuā tele o faamanuiaga faaleagaga. (Mala. 3:10) Ia fai ma ou sini ina ia e iai i le Tauaofiaga Itumalo “O Ē Faia le Afioga a le Atua” mai lava i le amataga o le polokalame i le Aso Faraile seʻia oo i le tatalo faaiʻu ma “Amene!” ai i le afiafi o le Aso Sa. O le a e fiafia ona sa e faia faapea.