O a Tatou Tauaofiaga Itumalo—O se Faamaoniga Malosi o le Upu Moni
1. O ā mataupu tāua faaleagaga sa tatau ona manatunatu loloto ma talanoa i ai tagata Isaraelu i taimi o tausamiga masani?
1 E faatolu i le tausaga ona faapotopoto faatasi tagata Isaraelu anamua mo tausamiga masani. E ui lava e na o tane sa manaʻomia ona auai, ae e masani lava ona malaga faatasi i Ierusalema aiga atoa ina ia olioli i nei tauaofiaga fiafia. (Teu. 16:15, 16) O na tauaofiaga sa maua ai le avanoa e manatunatu loloto ai ma talanoaina upu moni tāua faaleagaga. O ā nisi o nei upu moni? O se tasi o upu moni, o Ieova e agalelei ma alofa, o Lē e saunia mea. (Teu. 15:4, 5) O le isi, e mafai ona faalagolago atu iā te Ia mo le puipuiga ma le taʻitaʻiga. (Teu. 32:9, 10) Sa tatau foʻi ona manatunatu tagata Isaraelu i le mea moni e faapea, i le avea ai ma tagata e tauaveina le suafa o Ieova, e tatau ona latou faaalia atu ona ala amiotonu i o latou olaga. (Teu. 7:6, 11) O loo tatou maua foʻi aogā i aso nei mai i a tatou tauaofiaga itumalo i tausaga taʻitasi.
2. E faapefea i le polokalame o le tauaofiaga itumalo ona faasusulu mai ai le malamalama o le upu moni?
2 O le Polokalame e Faasusulu Atu ai le Malamalama o le Upu Moni: I a tatou tauaofiaga itumalo, e tatou te olioli ai i lauga, tala, faataʻitaʻiga ma faatalanoaga ia e faasusulu mai ai le malamalama o upu moni tāua o le Tusi Paia. (Ioa. 17:17) E tele galuega ua uma ona faia mo le saunia o le tauaofiaga o loo lumanaʻi mai. Ua saunia e le faalapotopotoga a Ieova se polokalame ua faia faapitoa, ina ia faailoa mai ai manaʻoga o loo iai i le taimi nei i le lalolagi aoao. (Mata. 24:45-47) Po o e naunau e vaai ma faalogo i mea o le a tauaaoina ai?
3. O le ā e tatau ona tatou faia ina ia maua aogā ai mai le polokalame?
3 Ioe, e faatoʻā tatou maua aogā pe afai e auai ma uaʻi totoʻa atu i le polokalame i aso uma e tolu. Pe afai e te leʻi sauni e faia faapea, ia talanoa atu i lou pule mo ni aso e mālōlō ai mai le galuega. Ia mautinoa e lava lau moe i pō taʻitasi ona mafai lea ona e mataala a o faagasolo le polokalame. Ua iloa e le toʻatele o le taulaʻi atu o la latou vaai i le failauga ma fai ni faamaumauga pupuu, e fesoasoani iā i latou ina ia uaʻi atu ai pea i le polokalame. Aua le faalavelavea oe ma isi i le faaaogāina o telefoni feaveaʻi. ʻAlofia le talatalanoa, fai text, ʻai ma inu a o faagasolo le polokalame.
4. E faapefea ona fesoasoani mātua i a latou fanau ia maua aogā a o faagasolo le tauaofiaga?
4 I tausaga o le Sapati, pe a faapotopoto aiga o tagata Isaraelu e faalogologo i le faitauina o le Tulafono i taimi o Tausamiga o Fale Lauvao, sa iai faatasi ma a latou “fanau iti . . . ina ia latou faalogo ma latou aʻoaʻo ai.” (Teu. 31:12) Maʻeu le faalaeiauina pe a vaai atu i aiga o nonofo faatasi i le taimi o le tauaofiaga, ma o loo mataala pea le fanau iti ma uaʻi totoʻa atu i le polokalame! I afiafi taʻitasi, aiseā e lē tilofaʻia ai au faamaumauga ma talanoa faatasi manatu na maua mai le polokalame e te fiafia faapitoa i ai? “Ua fusifusia le loto o le tama i le valea,” o lea, e tatau ai i mātua ona vaavaai lelei a latou fanau e aofia ai ma talavou, i taimi o le mālōlōga ma a o iai i faletalimālō, nai lo o le “tuufau” o le fanau.—Faata. 22:15; 29:15.
5. E faapefea i a tatou amioga lelei a o iai i faletalimālō ona faamamaluina ai le upu moni?
5 O a Tatou Amioga Lelei e Faamamaluina ai le Upu Moni: O a tatou amioga lelei i taimi o tauaofiaga e faamamaluina ai le upu moni. (Tito 2:10) Ua mātauina e tagata e ona faletalimālō i latou o ē e mulimuli i tulafono a le faletalimālō, ma faaalia le onosaʻi ma le agalelei i tagata faigaluega. (Kolo. 4:6) Ina ua feutagaʻi sui o le ofisa o le lālā ma lē e faatonu i ai avanoa o se faletalimālō i le tausaga ua teʻa, na ia faapea mai: “E matou te fiafia e talia o outou tagata e nonofo i la matou faletalimālō, ona o i latou o ni tagata lelei. E ese le amiolelei ma agalelei, ma e latou te faaaloalo i a matou tagata faigaluega ma tausia lelei le faletalimālō.”
6. E faapefea ona tatou faamamaluina le upu moni i le auala e laʻei ai a o iai i nofoaga e faia ai tauaofiaga?
6 Pe a tatou laʻeiina pine o le tauaofiaga, e lē gata o le a faalauiloa atu ai le tauaofiaga ma mātaulia ai e isi sui usufono i tatou, ae o le a avatu ai foʻi se molimau i ē o loo vaavaai mai. O le a mātaulia e tagata e nonofo i aai o loo faia ai tauaofiaga e faapea o ē o loo laʻeiina pine fatafata, e laʻei mamā ma onomea, ae lē o laʻei faatosina ma tifiga e pei ona taatele i le lalolagi. (1 Timo. 2:9, 10) O lea la, e tatau ona tatou uaʻi totoʻa i o tatou laʻei ma teuga a o iai i nofoaga o loo faia ai le tauaofiaga, e aofia ai ma taimi e ō atu ai i le faletalimālō. O le ofuina o se ofuvae pupuu ma se mitiafu pe a ō atu i le faletalimālō, o le a lē faamamaluina ai. E tusa lava foʻi pe faia le tauaofiaga i se faletaalo taalaelae, e tatau lava ona atagia atu le mamalu i o tatou laʻei. Pe a tatou filifili e sui ni laʻei pe a māeʻa le polokalame ma agaʻi atu i se faleʻaiga, e tatau ona manatua o i tatou o ni sui usufono o le tauaofiaga ma e lē tatau ona laʻeiina ni ofu teuanoaʻi.
7. O le ā se tasi o auala e olioli ai i le autasi ma uso Kerisiano a o faagasolo le tauaofiaga?
7 I taimi o tausamiga masani, sa olioli ai tagata Isaraelu i le aufaatasiga e atiaʻe ai ma uso tapuaʻi mai i isi vaega o le atunuu ma le lalolagi, ma na faapogaia ai le autasi. (Galu. 2:1, 5) I taimi o tauaofiaga itumalo, o le a matuā matilatila atu ai lo tatou ʻauuso Kerisiano e autasi. O lenei vala tāua o lo tatou parataiso faaleagaga e masani ona maofa ai ē o loo vaavaai mai. (Sala. 133:1) Nai lo o le tuua o le nofoaga i taimi o mālōlōga ina ia faatau mai se meaʻai, e sili ona lelei pe a aumai se taumafataga māmā ma faaaogā lelei avanoa na e feiloaʻi ma faamasani ai i uso ma tuafāfine o loo tatou iai faatasi!
8. O ā ni māfuaaga e lelei ai ona tatou tauofo i se galuega pe a talafeagai ma o tatou tulaga?
8 E masani ona maofa i latou e vaavaai mai i le lelei ma le maopoopo o a tatou tauaofiaga, aemaise pe a iloa o galuega uma o loo faia faatauofo. Pe e mafai ona e “ofo atu ma le lotomalie” e galue i taimi o le tauaofiaga? (Sala. 110:3) E masani lava ona tauofo aiga ona o se auala lea e toleni ai fanau e fesoasoani atu i isi. Afai o oe o se tagata e matamuli, o le a avea le galue i se matagaluega o le tauaofiaga ma auala e sili ona lelei e feiloaʻi ai ma isi. Na manatua e se tuafafine: “Ou te lē iloa le toʻatele o tagata sa auai seʻi vaganā ai loʻu aiga ma aʻu uō. Ae ina ua ou fesoasoani i le matagaluega faamamā, na ou feiloaʻi ai i le toʻatele o uso ma tuafāfine. Sa ou lagona le fiafia tele!” O le faalautele atu i le faia o ni uō e ala i le fesoasoani atu, o le a aumaia ai iā i tatou le olioli tele. (2 Kori. 6:12, 13) Afai e te leʻi tauofo muamua, ia fesili atu i toeaina i le auala e te agavaa ai e fesoasoani atu.
9. O le a faapefea ona tatou valaaulia isi e auai i le tauaofiaga?
9 Valaaulia Isi e Faalogo i le Upu Moni: E pei ona faia i tausaga ua mavae, a o toe tolu vaiaso faia le tauaofiaga, o le a tatou auai ai i se tauiviga e valaaulia isi e auai mai. O le a mananaʻo faapotopotoga e tufatufa atu valaaulia i a latou oganuu i le tele e mafai ai. (Tagaʻi i le pusa “O le a Faapefea Ona Tatou Tufa Atu le Valaaulia?”) E tatau ona avatu i le taimi o le tauaofiaga ni valaaulia na totoe. O le a faaaogā na valaaulia e sui usufono e molimau atu ai lē fuafuaina a o iai i le nofoaga e faia ai le tauaofiaga.
10. Faamatala se mea na tupu, e iloa ai e maua iʻuga lelei i la tatou tauiviga faaletausaga mo le tufatufaina atu o tusi valaaulia.
10 Pe e tali mai tagata i lenei tauiviga faaletausaga? I se tasi tauaofiaga, na fesoasoani atu ai se tautua i se ulugalii e saʻilia ni o la nofoa e nonofo ai. Na la taʻu atu i le tautua na la mauaina se tusi valaaulia ma la “manatu ai e manaia foʻi.” O lea na la faimalaga mai ai i le 200 maila [320 km] ina ia auai! O se isi tala, o se tuafafine na talaʻi mai lea fale i lea fale, na tuuina atu se tusi valaaulia i se tamāloa o lē na foliga mai sa fia malamalama e faatatau i le tauaofiaga. Ona ia faaalu lea o le taimi e talanoa ai ma le tamāloa e uiga i le tusi valaaulia. I ni nai aso mulimuli ane a o auai i le tauaofiaga, na iloa atu e le tuafafine le tamāloa ma sana uō i le tauaofiaga, ma o loo la uuina se tasi o tusi fou na tatalaina!
11. Aiseā e tāua ai ona auai i tauaofiaga itumalo faaletausaga i tausaga taʻitasi?
11 O le aso o tausamiga masani o se sauniuniga alofa mai iā Ieova, e fesoasoani i tagata Isaraelu ina ia “auauna [atu ai] iā te ia ma le lē taʻuleagaina ma le faamaoni.” (Iosua 24:14) I se tulaga tutusa, o lo tatou auai i tauaofiaga itumalo i tausaga taʻitasi, e fesoasoani iā i tatou e ʻsavavali ai pea i le upu moni,’ ma o se vala tāua o la tatou tapuaʻiga. (3 Ioa. 3) Tau ina ia faamanuia e Ieova taumafaiga a i latou uma e naunau i le upu moni ina ia auai ma maua le tele o aogā!
[Faamatalaga faaopoopo i le itulau 4]
O a tatou amioga lelei i taimi o tauaofiaga e faamamaluina ai le upu moni
[Faamatalaga faaopoopo i le itulau 7]
A o toe tolu vaiaso amata le tauaofiaga, o le a tatou auai ai i se tauiviga e valaaulia isi e auai mai
[Pusa i le itulau 3-8]
Mea E Faamanatu Mo Le Tauaofiaga Itumalo 2012
◼ Taimi o le Polokalame: E amata le polokalame i le 9:20 i le taeao o aso uma e tolu. O le a tatala faitotoʻa i le 8:00 i le taeao. E tatau ona faasilasila mai le musika e amata ai le polokalame, ae ua tatou alaala uma i o tatou nofoa ina ia aua neʻi toe iai se mea e gāsē, ma amata ai le polokalame i se tulaga mamalu. O le a faaiʻuina le polokalame o le Aso Faraile ma le Aso Toonaʻi i le 4:55 i le afiafi, ae o le Aso Sa o le 3:40 i le afiafi.
◼ Paka mo Taavale: I nofoaga uma o le a faia ai tauaofiaga ia e tatou te pulea foʻi ma vaega e paka ai taavale, o le a maua e le ʻauusufono se paka e aunoa ma se totogi, ma e fuafua lava avanoa i tagata e muamua mai. Talu ai e masani ona utiuti avanoa mo paka, afai e mafai, o se mea lelei le taumafai e malaga faatasi ni tagata se toʻatele i se taavale e tasi, nai lo o le tofu o tagata eseese ma le taavale e malaga mai ai.
◼ Taofia o Nofoa: E tatau ona taofi ni nofoa mo na o tagata o lou aiga, po o ē na outou malaga faatasi mai i la outou taavale, po o a outou tagata suʻesuʻe.—1 Kori. 13:5.
◼ Taumafataga i le Aoauli: Faamolemole aumai se taumafataga mo le aoauli, nai lo o le tuua o le nofoaga e fai ai le tauaofiaga, ae alu ese atu e faatau mai se taumafataga. E mafai ona e faaaogā se tamaʻi cooler e ofi i lalo o nofoa. O cooler lapopoʻa ma ipu mataʻetaʻe, e lē faatagaina i le nofoaga e fai ai le tauaofiaga.
◼ Foaʻi: E faaalia lo tatou talisapaia o le tauaofiaga i le faia o ni foaʻi tauofo mo le galuega i le lalolagi aoao, i le taimi o le tauaofiaga. O so o se siaki e tatau ona totogi atu i le “Tauaofiaga Itumalo a Molimau a Ieova.” E amata atu i lenei tausaga, o tauaofiaga uma o le a taliaina foaʻi e faia i debit/credit cards e faaopoopo atu i foaʻi tupe po o siaki.
◼ Faalavelave ma Mea e Tutupu Faafuaseʻi: Pe a tulaʻi mai se manaʻoga ona o se faalavelave faafuaseʻi i le taimi o le tauaofiaga, faamolemole faafesootaʻi se tautua o latalata ane, o ia e na te faafesootaʻia vave le Fesoasoani Muamua, ina ia mafai ai e o tatou tagata ua iai le poto masani, ona iloilo po o le ā le matuiā o le mea ua tupu ma saunia le fesoasoani. Pe a manaʻomia, o i latou na e vili atu mo se fesoasoani. O le faia faapea, o le a ʻalofia ai le soona vili atu o le toʻatele, i le matagaluega e gafa ma faalavelave faafuaseʻi.
◼ Fualaau: Pe afai e te manaʻomia ni fualaau, faamolemole ia faamautinoa o loo e sau ma aumai ni au fualaau, talu ai e lē maua ni fualaau i le tauaofiaga.
◼ Seevae: E toʻatele i latou e manunuʻa i tausaga taʻitasi ona e māfua mai i seevae. E sili atu ona lelei le faaaogā o ni seevae talafeagai ma fetaui lelei, ina ia saogalemu ai pe a e savali i auala simā, fasitepu, ma ni vaega o le auala e ufiufi i ni mea valavala, ma isi mea faapena.
◼ Taavale Pepe ma Nofoa Faamoe: E lē tatau ona avatu i totonu o le nofoaga o le tauaofiaga ia taavale pepe po o nofoa faamoe. Ae e faataga nofoa faapitoa mo le saogalemu o se tamaitiiti, pe afai e mafai ona fusi i se nofoa i autafa o ona mātua.
◼ Fagu Faamanogi: O le tele o tauaofiaga e faia i fale e iai masini e faasau ai le ʻea i totonu. O lea, ia faaalia le agalelei i le faaitiitia o le faaaogāina o fagu faamanogi ma mea faapena, ia e ono faalētonu ai le mānava a ē e aafia gofie i mea faapena.—1 Kori. 10:24.
◼ O Pepa Follow Up: E ao ona faaaogā pepa Please Follow Up (S-43) e tusia mai ai ni faamatalaga e faatatau i se tagata na faaalia le fiafia ona o le molimau lē fuafuaina i ai i le taimi o le tauaofiaga. E tatau i tagata talaʻi ona ave se pepa e tasi pe lua i le tauaofiaga. O pepa ua uma ona faatumu, e mafai ona tuuina atu i le Potu Tusi, pe tuu atu i le failautusi o la outou faapotopotoga pe a e toe foʻi atu.—Tagaʻi i La Tatou Faiva o le Malo, o Me 2011, itulau e 3.
◼ Faleʻaiga: Ia faamamaluina le suafa o Ieova i a tatou amioga lelei i faleʻaiga.
◼ Faletalimālō ma Nofoaga e Āpi Ai:
(1) Faamolemole aua le taofia ni potu e sili atu nai lo o potu e te manaʻomia, ma aua neʻi sili atu tagata e nonofo i lou potu nai lo o le aofaʻi e faatagaina.
(2) Aua neʻi toe faalēaogāina potu na e talosagaina, seʻi vaganā o se tulaga lē maʻalofia, ma ia faafesootaʻi le faletalimālō i le vave e mafai ai.—Mata. 5:37.
(3) Ia faaaogā se taavale e toso ai atopaʻu pe afai ua e sauni e faaaogā, ma ia vave ona toe faafoʻi ina ia mafai ona faaaogā e isi.
(4) Ia kuka meaʻai i na o potu e faatagaina ona kuka ai.
(5) Aua le faaaogāsesēina mālū o le taeao, kofe po o aisa e maua fua, ia ua saunia e faaaogā e i latou o loo nonofo i le faletalimālō.
(6) Ia faaalia i taimi uma le fua o le agaga, i le auala e feutagaʻi ai ma le ʻaufaigaluega o le faletalimālō. E toʻatele mālō o loo latou vaavaaia ma e latou te talisapaia lo tatou agalelei, onosaʻi ma le magafagafa.
(7) E tatau i mātua ona vaavaai lelei a latou fanau i taimi uma a o iai i le faletalimālō, e aofia ai le vaega o loo iai le swimming pool, le potu faatalitali, vaega e faia ai faamalositino (exercise room) ma isi mea.
(8) Pe a tulaʻi mai se faafitauli i le potu na e talosagaina i le faletalimālō, ia faafesootaʻi le Matagaluega o Āpi a o iai i le tauaofiaga, ina ia fesoasoani atu iā te oe.
◼ Auaunaga Tauofo: So o se tasi e fia tauofo, ia lipoti atu i le Matagaluega o le Auaunaga o Ē Tauofo i le tauaofiaga. E mafai foʻi ona fai se sao o tamaiti e i lalo ifo o le 16 tausaga, e ala i le galulue faatasi ma mātua po o se tasi e vaaia i latou, po o se isi e faamaonia e mātua po o lē e vaaia i latou.
[Pusa i le itulau 8]
O le a Faapefea Ona Tatou Tufatufaina Atu le Tusi Valaaulia?
Ina ia mafai ona galueaʻiina la tatou oganuu atoa, e tatau ona faapuupuu. E tatou te ono fai atu e faapea: “Talofa. O loo matou faia se tauiviga i le lalolagi aoao, i le tufatufaina atu o lenei tusi valaaulia. O lau valaaulia lea. O le a e maua nisi faamatalaga atili i le tusi valaaulia.” Ia aasa. Pe a faia se sao i le tufatufaina atu o le valaaulia i faaiʻuga o vaiaso, e tatau foʻi ona ofo atu mekasini pe a talafeagai.