Faamanuiaga Mai le Faaalia o le Talisapaia o le Alofa o Ieova—Vaega 2

¹ I le vaega o lenei mataupu i le masina talu ai, na tatou faamatilatilaina ai auala e fā e faaalia ai lo tatou talisapaia o le alofa o Ieova e ala i le faiva. (1 Ioa. 4:9-11) I inei o le a tatou faaopoopo i ai isi auala e lima ina ia faia ai faapea. Ma pe afai e faia so tatou sao atoatoa e fesoasoani ai i isi faaleagaga, e faamanuiaina i tatou.

² Molimau Atu Lē Fuafuaina: O se auala uigā lenei e mauaina ai tagata o loo matelāina ma galala mo le amiotonu ma tuuina ai iā i latou lomiga e aogā. E talafeagai ona ‘faatau mai le taimi tatau’ ma molimau atu ai i taimi uma ma i so o se tasi lava tatou te feiloaʻi. (Efe. 5:16, NW) Atonu e tatau ona tatou maua le lototele e molimau atu ai i lenei auala, ae afai tatou te talisapaia le alofa o le Atua ma manaʻoga o tagata, o le a tatou molimau atu ai i so o se avanoa.—2 Timo. 1:7, 8.

³ Na matuā taulau manuia se misionare i le amataina o se talanoaga ma se tagata o le pasese i se tamaʻi taavale. Na faaalia le fiafia o le tamāloa. Na toe asia, ma amataina ai se suʻesuʻega faale-Tusi Paia. Na sau lenā tamāloa i le upu moni ma agaʻigaʻi i luma i se tulaga na avea ai o ia ma toeaina o se faapotopotoga!

⁴ Tusia ni Tusi: Atonu ua lē mafai ona tatou ō atu i lea fale i lea fale ona o le lē atoatoa o le malosi o le tino po o le loulouā foʻi o le tau. E mafai ona tatou tusia ni tusi, e avatu ai se molimau puupuu e ala i le lafoina atu i tagata tatou te iloaina, i latou ua maliliu ē pele iā i latou, po o i latou e lē o maua atu i o latou fale i le oganuu. E mafai ona tatou fafaoina i ai ma se sāvali e fetaui lelei lona mataupu ma le tulaga o mea o loo tutupu, o loo iai se feʻau faale-Tusi Paia logolelei ma faalaeiau lē o loo lafo i ai ina ia toe tusi mai pe afai e iai ni ana fesili. Ia faaaogā lou lava tuatusi po o le tuatusi o le Maota o le Malo e toe lafo mai i ai; faamolemole aua le faaaogāina le tuatusi o le ofisa o le lālā.

⁵ Molimau Atu i le Telefoni: O le auala lelei lenei e mauaina ai tagata o ē e lē o maua i le galuega i lea fale i lea fale. Pe afai tatou te faia ma le faautauta, faatasi ai ma le agalelei, le magafagafa ma le tomai, e tatou te ono maua ai se tali mai e lelei tele. Ua saunia e La Tatou Faiva o le Malo, Fepuari 2001, itulau e 5-6, ia fautuaga aogā i le auala e mauaina ai iʻuga e sili ona lelei.

⁶ Ina ua molimau atu se tuafafine e ala i le telefoni, na ia fesili atu ai i se fafine pe faamata ua mafaufau loloto o ia i mea o loo ofoina mai i le lumanaʻi mo ia ma lona aiga. Na ioe ane i ai le fafine. Na faaali ane e le fafine e faapea ona o le leai o sona faamoemoe, ua ia faaesea ai o ia lava i lona aiga. I le uunaʻia ona o le manatu mamafa moni o le tuafafine, na malie ai le fafine e la te feiloaʻi i se maketi e latalata ane. O le iʻuga, na vave lava ona taliaina e le fafine se suʻesuʻega faale-Tusi Paia!

⁷ Faafeiloaʻia o Tagata Ese: Pe afai tatou te alolofa i o tatou tuaoi, o le a tatou mataalia e mataʻitūina so se tagata ese e asiasi atu i nofoaga o loo faia ai a tatou sauniga ma faafeiloaʻia ma le māfana o ia. (Roma 15:7) Ia iloa e ia o loo iai o ia i le lotolotoi o i latou o loo naunau moni mo lona tulaga lelei faaleagaga. O lo tatou manatu mamafa moni ma lo tatou ofoina atu i ai o se suʻesuʻega totino faale-Tusi Paia e ono uunaʻia ai o ia e taliaina la tatou fesoasoani.

⁸ O a Tatou Amioga Lelei: E ala i a tatou amioga lelei, ua tatou taʻuleleia ai le upu moni. (Tito 2:10) Pe a faia e i latou o i le lalolagi ni faamatalaga lelei e uiga iā i tatou i le avea ai ma Molimau a Ieova, ua latou viiviia lo tatou Atua. (1 Pete. 2:12) E mafai ai foʻi e lenei mea ona fesoasoani i isi e amata ona ui i le auala e ola ai.

⁹ Aiseā e lē autalu ma faataʻitaʻi ai nei auala e lima e faaalia ai lo tatou talisapaia o le alofa silisili o Ieova mo i tatou? (1 Ioa. 4:16) A o e faia faapea, o le a e seleseleina mai ai le tele o faamanuiaga.