“Ia Matuā Folafolaina le Afioga a le Atua”
1 Pe afai e te matuā talisapaia se mea lelei ua e mauaina, pe e te lē faaalia ea lenā talisapaia e ala i ou uiga ma au gaoioiga? E mautinoa o le mea lenā e te faia! E tusa ai o le agalelei ma le alofa o loo faasafua mai e Ieova i le fanau a tagata, seʻi mātau foʻi le auala na tali atu ai le aposetolo o Paulo. Na ia faapea mai: “Faafetai i le Atua i lana mea foai fua e le mafaamatalaina!” O le ā e aofia ai i lenā “mea foaʻi fua”? Ua faaalia mai ai iā i tatou “le alofa tunoa [uma] o le Atua ua matuā tele.” O le faailoaga silisili o lenā alofa, o le foaʻiina mai lea o lona lava Alo e fai ma togiola mo a tatou agasala.—2 Kori. 9:14, 15; Ioa. 3:16.
2 Pe sa na o ni faaupuga ea na faaalia ai e Paulo lona lotofaafetai? E matuā leai lava! E tele auala na ia faaalia ai le loloto o lona agaga talisapaia. Sa matuā mamafa i lona mafaufau le lelei faaleagaga o ona uso Kerisiano, ma manaʻo ai e fai le mea na te mafaia e fesoasoani ai iā i latou ia maua atoatoa aogā mai le alofa o le Atua. Na taʻua e Paulo e uiga iā i latou na: “Sa faapea lava lo matou maelega i le alofa ia te outou, na matou manao i le fia avatu ia te outou e le na o le tala lelei i le Atua, a o matou lava ola foi, auā na alofaina outou e i matou.” (1 Tesa. 2:8) E lē gata sa fesoasoani atu iā i latou ua avea ma vaega o le faapotopotoga ina ia faamautūina lo latou faaolataga, ae sa lē mapu foʻi Paulo e talaʻi atu le tala lelei, sa faimalaga atu i le fia afe o maila i le fanua ma le sami ina ia saʻilia i latou “ua saunia i le ola e faavavau.” (Galu. 13:48) O le matuā talisapaia e Paulo o mea uma na faia e Ieova, na uunaʻia ai o ia e “matuā folafolaina le afioga a le Atua.”—Kolo. 1:25.
3 Po ua lē avea ea lo tatou talisapaia o mea uma ua faia e Ieova mo i tatou, e fai ma uunaʻiga tatou te ofoina atu ai le fesoasoani faaleagaga iā i latou, o ē e manaʻomia se fesoasoani, o i la tatou faapotopotoga? (Kala. 6:10) Pe e lē o uunaʻia ea foʻi i tatou e faia se sao atoatoa pe a mafai, i le talaʻia o le tala lelei o le Malo i la tatou oganuu?—Mata. 24:14.
4 Se Avanoa e Faaalia ai le Talisapaia: I tausaga taʻitasi, e avea ai le taimi o le Faamanatuga o le maliu o Keriso, o se avanoa faapitoa e faaalia ai lo tatou talisapaia o mea ua faia e Ieova ma Iesu mo i tatou. E lē na o se sauniga masani lenei pe tau lava o le faamanatuina o se mea na tupu. Na fetalai mai Iesu: “Tou te faia le mea nei e fai ma faamanatuga ia te au.” (Luka 22:19) O le Faamanatuga o le maliu o Keriso, o se sauniga lea e toe fafagu mai ai i mafaufau le ituaiga o peresona e iai Iesu. O se taimi e iloa ai o loo soifua mai o ia ma o loo galue pea i aso nei, ma ua iā te ia le mamalu ma le tulaga tautupu lea na foaʻiina atu i ai ona o lona soifuaga faamaoni ma lana taulaga na fai. O lenei faamanatuga ua maua ai foʻi se avanoa e faaali atu ai lo tatou gauaʻi i le tulaga ulu o Keriso, a o ia faatonutonuina mai mataupufai ma gaoioiga a le faapotopotoga Kerisiano. (Kolo. 1:17-20) E ao i tagata uma o le Atua ona auai atu ma le faaaloalo i le Faamanatuga o le maliu o Keriso. I lenei tausaga, o le a faia ai pe a goto le lā i le Aso Tofi, Mati 28, 2002.
5 Talu ai taumafaiga filigā sa fai a o leʻi oo i le faamanatuina o le Faamanatuga i le tausaga na teʻa nei, na mafai ai ona tatou maua se aofia e 2,092 mai motu o Samoa ma Toelau. O le ā se aofia o le a iai i lenei tausaga? O le a faalagolago tele atu lava i a tatou ‘galuega [“mamafa,” NW] ma le finafinau,’ e fesoasoani ai i ni tagata se toʻatele ina ia auai mai.—1 Timo. 4:10, LF.
6 E lē gata ina auai atu i le Talisuaga Afiafi a le Alii, ae e mafai foʻi ona tatou faateleina a tatou galuega i le auaunaga i le fanua. E mautinoa lava, e faitau afe uso ma tuafāfine o le a paeonia lagolago mo se masina pe sili atu foʻi. I tausaga talu ai, e toʻatele i latou sa galulue i le auaunaga o le paeonia lagolago i le vaitau o le Faamanatuga, mai iā Mati e oo atu iā Me. Faamata e mafai ona e faatulagaina au fuafuaga fai ina ia e tofo ai i le faaeaga o le paeonia lagolago i lenei tausaga? O le a avea lenā o se auala lelei e faaalia ai lou matuā talisapaia o le meaalofa a le Atua e ala mai i le taulaga a Keriso. E mautinoa lou mauaina o faamanuiaga a Ieova, e pei ona faaalia i tala o loo sosoo mai i ni mea sa tutupu.
7 Na tusi mai se tuafafine e faigaluega faasoloatoa i se galuega totogi, e uiga i se mea na tupu iā te ia a o paeonia lagolago iā Mati o le tausaga talu ai: “Sa faalaeiau mai La Tatou Faiva o le Malo o Fepuari o le 2001, i tagata uma o ē sa fetaui ma o latou tulaga, ina ia paeonia lagolago i le vaitau o le Faamanatuga. Talu ai e lima Aso Toonai o Mati, sa fetaui lelei ai ma laʻu faasologa. Ona ou filifili ai lea e ave laʻu talosaga.” A o amata lana paeonia i le masina, sa ia faataatia ai se sini mo ia lava, o le taumafai ia amata sana suʻesuʻega faale-Tusi Paia i se aiga. Pe na taulau o ia? Ioe, sa ia maua mai i le lona 52 o itula na ia faaaluina e molimau atu ai i lenā masina! O ā ana upu na faaiʻu mai ai? “E iai faamanuiaga ofoofogia pe a tatou faia se taumafaiga faaopoopo.”
8 O ā ni aogā e maua e se aiga e paeonia faatasi? O se aiga e toʻafā, na paeonia faatasi iā Aperila o le tausaga talu ai, na latou iloa o le a lē mafai ona galo iā i latou lenā masina. Na faapea mai le tinā: “Maʻeu se vaaiga fiafia na matou taulaʻi atu i ai i aso taʻitasi, talu ai lo matou autasi i le faiva! O lo matou aai ma talatalanoa i mea sa fai i aso taʻitasi i le auaunaga, na avea ai a matou taumafataga o ni taimi e sili ona fiafia.” Na faapea mai le atalii: “Sa ou fiafia tele e galulue faatasi ma loʻu tamā i le auaunaga i le fanua a o faagasolo le vaiaso, auā o le tulaga masani lava, o lona faigaluega faasoloatoa lea i le vaiaso i lana galuega.” Na faaopoopo mai le tamā: “Ona o aʻu o le ulu o le aiga, sa ou lagona le faamalieina i le iloa, sa matou galulue faatasi i le galuega o loo sili ona tāua i o tatou taimi.” Faamata e mafai ona paeonia faatasi lo outou aiga? Aiseā e lē talanoa faatasi ai lo outou aiga ma vaai pe mafai e le ʻauaiga atoa ona paeonia lagolago a o faagasolo le vaitau o lenei Faamanatuga?
9 Pe Mafai Ona Tatou Avea Mati ma Masina Aupito Sili Ona Mataʻina? I le amatamataga o le 2000, na faatulaʻi mai ai e La Tatou Faiva o le Malo se fesili e faapea: “Pe Mafai Ona Tatou Avea Aperila 2000 ma Masina Aupito Sili Ona Mataʻina?” O le ā le tali atu i ai? E tele ni tumutumuga fou na ausia ai i le lalolagi aoao. Po o e manatua le agaga maelega na iai i la outou faapotopotoga ona o le faateleina o gaoioiga faaleagaga sa faia i lenā masina faapitoa? Faamata e mafai ona tatou faatutusa pe faasili atu foʻi ni mea tatou te ausia i lenei tausaga na i lo o lenā tausaga? Pe a faia e tagata uma ni taumafaiga maumauaʻi, e mafai foʻi ona avea Mati 2002 ma a ‘Tatou Masina e Aupito Sili Ona Mataʻina.’ Aiseā ua patino ai iā Mati?
10 E lua māfuaaga e māfua ai ona avea Mati o se masina faapitoa o galuega. Muamua, o le a faia le Faamanatuga i le faaiʻuga o Mati, o lona uiga e telē se avanoa mo i tatou i le amataga o le masina, e valaaulia ai ni tagata se toʻatele e mafai ina ia auai. Lona lua, e lima faaiʻuga atoatoa o vaiaso iā Mati o lenei tausaga, ua faafaigofie ai ona paeonia lagolago i latou o loo faigaluega i galuega totogi, pe o loo i aʻoga foʻi. Aiseā e lē sagaʻi ifo ai nei loa ma amata ona fuafua se faasologa e mafai ona faatino, e faaaogā ai le kalena lea ua saunia atu i lenei faaopoopoga? Atonu e lē faigatā tele le paeonia lagolago na i lo se mea o loo e manatu i ai. Mo se faaaʻoaʻoga, o le faatulagaina o itula e 8 mo le auaunaga i le fanua i faaiʻuga uma o vaiaso e lima, o le a na o le 10 ai nisi ou itula e manaʻomia ona faatulaga a o faagasolo isi aso o le masina, ina ia ausia ai itula e 50 e pei ona manaʻomia.
11 O le ā se mea e mafai e toeaina ona fai e fesoasoani atu ai i tagata uma o le faapotopotoga, ina “ia matuā folafolaina le afioga a le Atua”? Ia faatupu aʻe le uiga aasa a o faia vaega i sauniga ma i talanoaga totino. E mafai e faisuʻesuʻega o le Suʻesuʻega Tautusi a le Faapotopotoga ma a latou fesoasoani, ona tausolomua e talanoa atu i tagata taʻitoʻatasi o loo tofia mai i la latou vaega, ma fesoasoani totino atu i ai. Atonu na pau lava le mea o loo manaʻomia, o ni nai upu agalelei e faalaeiau ai po o ni fautuaga aogā. (Faata. 25:11) O le a iloa e le toʻatele, e na ona toe fetuunaʻi laʻitiiti lava o la latou faasologa, ona mafai loa lea ona latou olioli i le faaeaga e auauna ai o ni paeonia lagolago. I nisi faapotopotoga, a lē o i latou uma, o le toʻatele lava o toeaina faapea auauna o le faiva ma a latou avā, o loo avea o se faaaʻoaʻoga lelei i le galulue faatasi o ni paeonia lagolago i le vaitau o le Faamanatuga. Ua avea lenā o se faalaeiauga i le toʻatele o isi tagata talaʻi ina ia auai atu foʻi i ai. Ona o āuga lē atoatoa o le tino ma isi tulaga, atonu ua lē mafai ai e nisi tagata talaʻi ona paeonia, ae e mafai lava ona faalaeiauina i latou e faaalia lo latou agaga talisapaia, e ala i le faia o le tele e latou te mafaia i le faiva, faatasi ai ma isi tagata uma o le faapotopotoga.
12 E taulau manuia pe a lelei fuafuaga fai a le ʻautoeaina. E tatau ona faatulaga feiloaʻiga mo le auaunaga i le fanua, i ni taimi e talafeagai a o faagasolo le vaiaso. Pe afai e mafai, o le a muaʻi tofia e le ovasia o le auaunaga ni uso agavaa e latou te taʻimua i feiloaʻiga uma mo le auaunaga. E manaʻomia ai ni tapenapenaga lelei ina ia lē sili atu le uumi o nei faatasiga mai le taʻi 10 i le 15 minute, e aofia ai le faamaopoopoina o vaega, le tofiaina o oganuu, ma le tatalo. (Tagaʻi i le Pusa Fesili i La Tatou Faiva o le Malo o Setema 2001.) E tatau ona manino lelei le faamalamalamaina o le faasologa mo galuega a le faapotopotoga e fai i le masina, ona faapipii lea o lenā faasologa i le laupapa o faamatalaga.
13 E tatau ona lava lelei ni oganuu o iai. E tatau ona fai se feiloaʻiga a le ovasia o le auaunaga ma le uso o loo taulimaina oganuu, ina ia fai ni fuafuaga mo le galueaʻiina o oganuu e lē o talaʻia soo. E tatau ona faamamafa le galueaʻiina o aiga sa leʻi maua atu i ai nisi i fale, le molimau atu i alatele ma faleoloa, ma le molimau atu i afiafi. Pe afai e talafeagai, atonu e lelei pe a fesoasoani i nisi tagata talaʻi ina ia faaaogā telefoni e molimau atu ai.
14 Ia Fesoasoani iā i Latou e Toe Galulue: Po o iai ea nisi o nonofo i le oganuu a la outou faapotopotoga, e lē o toe galulue i le talaʻia o le tala lelei? O loo avea pea na tagata ma vaega o le faapotopotoga, ma o loo latou manaʻomia se fesoasoani. (Sala. 119:176) Talu ai ua matuā lalata mai lava le iʻuga o lenei lalolagi tuai, ma ua toe o se aga oo mai le lalolagi fou, ua iā i tatou la se māfuaaga lelei e faia ai taumafaiga uma ina ia fesoasoani iā i latou ua lē o toe talaʻi. (Roma 13:11, 12) O le ā se mea e mafai ona tatou faia e fesoasoani atu ai i le toʻatele o nisi tagata ina ia toe fafagu mai le alofa ma le talitonuga mautinoa lea sa iā i latou i le amataga?—Epe. 3:12-14.
15 O le a manaʻomia e le ʻautoeaina ona talanoaina se auala e mafai ona latou fesoasoani atu ai iā i latou ua lē o toe talaʻi i tausaga ua mavae atu. (Mata. 18:12-14) E tatau i le failautusi ona siaki uma pepa o Faamaumauga mo le Tagata Talaʻi a le Faapotopotoga, ma faamaumau i lalo i latou uma ua lē o toe talaʻi. Ia fai se taumafaiga faapitoa ina ia faia ni asiasiga faaleoleo mamoe e avatu ai se fesoasoani. Atonu e iai se tagata talaʻi patino e manaʻo se toeaina e asiasi atu i ai, ona pe sa la masani ma auaumea faatasi i le taimi muamua ma lenā tagata, pe talosaga atu foʻi i isi tagata talaʻi e fesoasoani atu. Atonu o na tagata talaʻi, sa latou suʻesuʻe muamua ma lē ua lē o toe talaʻi, ma o le a latou talisapaia ai le avanoa e toe avatu ai se fesoasoani faapitoa i lenei taimi ua manaʻomia ai. E iai le faamoemoe, e toʻatele i latou ua lē o toe talaʻi, o le a faalaeiauina e amata ona toe talaʻi atu le afioga a le Atua. Pe afai latou te agavaa, e leai la se isi taimi e sili atu ona lelei mo i latou e amata ai, na i lo le vaitau o le Faamanatuga!—Mo se auʻiliʻiliga atili, tagaʻi i le Pusa Fesili o La Tatou Faiva o le Malo, Novema 2000.
16 Po ua Agavaa Isi e Talaʻi? E faaauau pea ona faamanuia mai Ieova i ona tagata e ala i le foaʻi mai “o mea ua manaomia e nuu uma.” (Ha. 2:7) E faitau afe ua agavaa e avea ma tagata talaʻi e leʻi papatisoina i tausaga taʻitasi. O ai i latou na? O fanau a Molimau a Ieova, faapea ma tagata suʻesuʻe o le Tusi Paia o loo agaʻigaʻi i luma. E faapefea ona tatou iloa po ua agavaa i latou e avea ma tagata talaʻi o le tala lelei?
17 O Fanau a Molimau a Ieova: E toʻatele fanau ua tele tausaga o ō atu faatasi pea ma o latou mātua i le galuega talaʻi mai lea fale i lea fale, e ui ina e leʻi avea i latou o ni tagata talaʻi e leʻi papatisoina. Atonu o Mati o se taimi lelei lea mo i latou e amata ai loa. E faapefea ona e silafia ua agavaa lau tama? I le itulau e 100 o le tusi Organized to Accomplish Our Ministry, o loo taua ai e faapea, “pe afai o loo lelei le amio a le tamaitiiti, ma e mafai ona ia faamatala atu ona talitonuga, e ala i le talanoa atu i isi e uiga i le tala lelei, ona ua uunaʻia e lona loto e faia faapea.” Pe afai e te silafia ua agavaa lau tama, ia e talanoa atu i se tasi o toeaina o le Komiti o le Auaunaga a le Faapotopotoga.
18 O Tagata Suʻesuʻe o le Tusi Paia o Ē ua Agavaa: Pe a aʻoaʻoina e se tagata suʻesuʻe o le Tusi Paia le poto ma ua fai sina umi o auai i sauniga, atonu o le a ia manaʻo loa e avea o se tagata talaʻi o le Malo. Pe afai o loo e faia se suʻesuʻega ma se tagata suʻesuʻe faapena, seʻi manatunatu ane i fesili nei: Po o agaʻigaʻi o ia i luma e tusa ai o lona matua ma lona tomai o iai? Po ua amata ona ia faailoa atu i isi lona faatuatua i se tulaga faasamasamanoa? Po ua ia ofuina “le tagata fou”? (Kolo. 3:10) Po o ia ausia agavaa mo tagata talaʻi e leʻi papatisoina, na o loo otooto mai i itulau e 97-99 i le tusi o le Our Ministry? Afai ua ausia na mea uma, ua tatau loa ona e talanoa atu i le Komiti o le Auaunaga a le Faapotopotoga, ina ia faia ni fuafuaga mo ni toeaina se toʻalua e fai sa latou talanoaga faatasi ma oe ma le tagata suʻesuʻe. Pe afai ua agavaa o ia, o le a faailoa atu e toeaina e toʻalua iā te ia e faapea, ua mafai nei ona faia sona sao i le faiva i le lautele.
19 Ae Faapefea iā Aperila ma Me? O le a faapitoa foʻi nei masina mo le faateleina ai o galuega i le faiva i le fanua. E toʻatele e paeonia lagolago iā Mati atonu o le a mafai ona latou toe faia foʻi iā Aperila po o Me, ia po o masina uma foʻi e lua. A o faagasolo Aperila ma Me, o le a tatou uaʻi patino atu ai i le ofoina o mekasini o Le Olomatamata ma le Ala Mai! i le faiva. Maʻeu ni āuga aogā ua maua mai ai i olaga o i latou e faitauina nei mekasini! E telē se vaega o loo faia e nei mekasini i le ausiaina o le faatelega ofoofogia ua iai i le lalolagi aoao. O le a faia se taumafaiga faapitoa iā Aperila ma Me ina ia ofoina atu mekasini i ni tagata se toʻatele e mafai ai. Ia fuafua nei loa e faia ai sou sao tele.
20 Ona o lea ua faateleina vala o le galuega talaʻi ua fuafuaina, pe manaʻomia ea la ona e faateleina foʻi le aofaʻi o au mekasini o loo maua mai le faapotopotoga? A o faagasolo le tausaga faaleauaunaga, e tatou te ofoina ai Le Olomatamata ma le Ala Mai! i Aso Toonai taʻitasi, o la tatou Aso o Mekasini ua uma ona faatulagaina. Peitaʻi ane, talu ai e toʻatele i latou o le a auai i le auaunaga faapaeonia lagolago, ma o le a ofoina e i tatou uma nei mekasini mo masina atoa e lua, atonu la e talafeagai ona toe faateleina lau ota o mekasini mai le faapotopotoga. Afai o le a faia faapea, faamolemole ia logo vave atu le uso o loo vaaia mekasini a la outou faapotopotoga. I le taimi e tasi, e tatau i le auauna o loo vaaia tusi ona faamautinoa, o loo lava se sapalai o le sāvali, Pe E te Manaʻo e Fia Iloa Atili e Faatatau i le Tusi Paia? mo le faaaogāina e tagata uma.
21 E toʻatele ua faailoa mai lo latou talisapaia o le mataupu i La Tatou Faiva o le Malo, ua faaulutalaina “Le Tala e Fai Atu e Uiga i Mekasini.” Po o e faaaogāina lelei ea lenei sauniuniga e ala i lou faaaʻoaʻo i taulimaga faataʻitaʻi mo le ofoina o mekasini? Aiseā e lē faaaogā ai se vaega o le suʻesuʻega faale-Tusi Paia a lo outou aiga i vaiaso taʻitasi, e faataʻitaʻi ai nei taulimaga?
22 Ia Matuā Faaaogā Lelei le Vaitau o Lenei Faamanatuga: I le pei o le aposetolo o Paulo, seʻi o tatou faaali atu iā Ieova le telē o lo tatou talisapaia o “lana mea foai fua e le mafaamatalaina,” e ala i so tatou matuā faia o se sao i gaoioiga faaleagaga ua fuafuaina mo le vaitau o lenei Faamanatuga. E aofia ai le (1) auai atu i le sauniga e sili ona tāua o le tausaga, o le faamanatuina o le Talisuaga Afiafi a le Alii, i le Aso Tofi, Mati 28, 2002; (2) fesoasoani atu iā i latou ua leva e lē o toe talaʻi, ina ia toe faaolaola le “uluai alofa” sa iā i latou (Faaa. 2:4; Roma 12:11); (3) fesoasoani atu i a tatou fanau ma so o se tagata suʻesuʻe o le Tusi Paia ua agavaa e avea ma tagata talaʻi e leʻi papatisoina; ma le (4) matuā faia o se sao e mafai i le galuega faaevagelia, pe paeonia lagolago foʻi iā Mati ma faasolo atu ai lava.—2 Timo. 4:5.
23 O la matou tatalo naunautaʻi ina ia matuā faia e i tatou uma se sao i le talaʻia o le tala lelei o le Malo i le vaitau o lenei Faamanatuga, e faaalia atu ai le telē o lo tatou talisapaia mo mea uma ua faia e Ieova mo i tatou.
[Pusa i le itulau 6]
Faasologa Totino o le Auaunaga i le Fanua mo Mati 2002
Aso Aso Aso Aso Aso Aso Aso
Sa Gafua Lua Lulu Tofi Faraile Toonai
1 2
Aso Mekasini
3 4 5 6 7 8 9
Aso Mekasini
10 11 12 13 14 15 16
Aso Mekasini
17 18 19 20 21 22 23
Aso Mekasini
24 25 26 27 28 29 30
FAAMANATUGA Aso Mekasini
PE A MAVAE LE
31 GOTO O LE LĀ
Pe mafai ona e fuafuaina se aofaʻiga o itula e 50 e te paeonia lagolago ai iā Mati?