‘Ia Agalelei i Tagata Uma’
1 “Ia Matuā Folafolaina le Afioga a le Atua” ma “Ia Tamaoaiga i Galuega Lelei” sa faaaogā e avea ma matua o faaopoopoga i La Tatou Faiva o le Malo o Fepuari ma Mati 2002. (Kolo. 1:25; 1 Timo. 6:18) Sa faalaeiau i tatou e na lomiga ina ia faia ni taumafaiga faaopoopo e fesoasoani atu ai i tagata naunau ina ia auai i le Faamanatuga, ia fesoasoani i ē ua lē o toe talaʻi ina ia toe faatasi mai i le faapotopotoga, ma ia fesoasoani i a tatou fanau atoa ma tagata suʻesuʻe o le Tusi Paia ua agavaa ina ia amata ona faalauiloa atu le tala lelei. E lē taumatea ua tatou olioli i ni tulaga taulau ona o a tatou taumafaiga lelei. I le taimi nei, ia faaauau ona ‘tatou agalelei i tagata uma lava, ia faatatau i mea e tutupu i lea aso ma lea aso.’—Kala. 6:10.
2 Valaaulia i Latou ia Toe Auai Mai: I Samoa e lua, e silia i le afe i latou e lē o ni tagata talaʻi o le tala lelei e auai i le Faamanatuga i tausaga taʻitasi. Talu ai e faaalia i lo latou auai mai le iai o so latou naunau fiafia, o le ā e ao ona tatou faia ina ia faagaeetia ai i latou “ua saunia i le ola e faavavau” ina ia “faatuatua”? (Galu. 13:48) Faalaeiau i ai ina ia toe foʻi mai i sauniga a le faapotopotoga i le vave e mafai ai.
3 Aiseā e lē valaaulia ai se tagata naunau e auai i le Suʻesuʻega Tautusi a le Faapotopotoga ina ia fiafia i se talanoaga manaia i le auala e ausia ai se olaga fiafia faaleaiga? Afai o le tagata o sou tauaiga po o sē e te masani i ai ma o loo loma sau lauga i le Aʻoga o le Faiva Faatiokarate, e te ono valaaulia o ia e auai ma faalogologo i ai. Faailoa pea iā te ia matua o lauga i le lautele mo vaiaso o loo lumanaʻi mai. (E tatau ona faapipii se faasologa fou i le laupapa o faasilasilaga.) Saʻili mo so o se avanoa e fafau aʻe ai i le tagata se faanaunauga e tapuaʻi ai iā Ieova. Ae afai e na te lē o suʻesuʻeina le Tusi Paia ma se isi tagata i le faapotopotoga, e mafai ona e ofo atu ma le agalelei e te lua suʻesuʻe.
4 Ia Faalaeiau Pea i Ē ua Lē o Toe Talaʻi: E iai se aofaʻiga tele o i latou e auai i le Faamanatuga ua faia se tuuina atu iā Ieova. Peitaʻi, mulimuli ane ua latou lē o toe talaʻia ma le faamalosi le tala lelei. Ae o lea e timaʻi mai le aposetolo o Paulo “ia tatou agalelei . . . a e faasili i le aiga o le faatuatua.” (Kala. 6:10) O lea, e tatau ona matuā manatu mamafa i ē ua lē o toe talaʻi.
5 Atonu e iai nisi ua tali mai i faalaeiauga a toeaina atoa ma isi ina ia toe faia se sao i le faiva. Afai e tofia oe e le ʻautoeaina e te lua galulue ma sē ua faatoʻā toe auai i le galuega talaʻi, ia mātau e faapea o lou lava alofa mo Ieova ma mo le faiva i le fanua o le a atiina aʻe ai le lagona mautinoa iā te ia. Faaali iā te ia le auala e te galue ai i vala eseese o le faiva ina ia mafai ona ia mauaina ai le olioli, tumau ai pea i le galuega talaʻi, ma ono tofo ai i faamanuiaga a Ieova.
6 Ia Tuu Atu i Tagata Talaʻi Fou se Amataga Lelei: Ina ua iloa e se fafine naunau e faapea ua ia mauaina le faalapotopotoga moni a le Atua, sa ia manaʻo loa e amata i le auaunaga. Ina ua māeʻa ona ia aʻoaʻoina mea sa manaʻomia mai iā te ia, na ia faapea mai: “Seʻi amata loa i le taimi nei.” Afai ua faamaonia nei le amata i le auaunaga i le fanua o se tagata o loo lua suʻesuʻeina faatasi le Tusi Paia, ia fesoasoani iā te ia e manaʻomia ona “amata loa i le taimi nei,” ma o le faia faapea, ua tuu atu ai i le tagata talaʻi fou se amataga lelei. Fesoasoani iā te ia e fausia aʻe se faasologa mo le sauniuni atu ma le auai e lē aunoa i le faiva i le fanua i vaiaso taʻitasi.
7 Afai o lou lava alo lea ua avea ma se tagata talaʻi fou, galulue ma ia ina ia agaʻigaʻi i luma e tusa ma lona matua ma le tomai. Faatasi ai ma sau fesoasoani, atonu o le a faateʻia oe i le auala lelei e talanoa ai ma se tagata, faitau mai le Tusi Paia, ma le ofoina atu o lomiga. A ia feiloaʻi ma se tagata i le auaunaga i le fanua e tali lelei mai, toleni o ia e fai se toe asiga ma tuliloa le tagata naunau.
8 Faalautele Atu Lau Faiva: Pe e faatagaina oe e ou tulaga ina ia faateleina lou sao i le galuega faievagelia e oo lava i tala atu o le vaitau o le Faamanatuga? Pe mafai ona e faaopoopo atu se itula se tasi pe lua i vaiaso taʻitasi i le taimi e masani ona e faaaluina i le auaunaga? Pe o e tagatagaʻi mamao atu i luma i le kalena po o afea o le a mafai ona e toe paeonia lagolago ai? Pe mafai ea ona fetuunaʻi lou soifuaga ina ia ulu atu ai i le faiva faataimi atoa? O a tatou taumafaiga uma e tuu atu i le faiva, e ono fesoasoani ai i se tagata ina ia talia le upu moni! (Galu. 8:26-39) A o tatou taulaʻi atu i le lumanaʻi, tau ina ia tatou “tausisi e le aunoa i le mea lelei, o le tasi i le tasi, atoa ma tagata uma lava.”—1 Tesa. 5:15.
[Pusa i le itulau 3]
Ia Faaauau Ona Fesoasoani Atu:
□✔ I ē auai i le Faamanatuga
□✔ I ē ua toe auai i le galuega talaʻi
□✔ I tagata talaʻi fou e leʻi papatisoina