Se Tali Faagaee Loto!
1 Na faaalia e aiga Kerisiano i so o se nofoaga lo latou matuā lotofaafetai mo le vitiō, Young People Ask—How Can I Make Real Friends? Na taʻua e se tamā i le Iunaite Setete e faapea, ina ua uma ona matamata i le vitiō, sa nonofo ona atalii e aunoa ma se tala, sa mafai ona latou malamalama ma talisapaia mea uma na matamata ai i le vitiō! Na taʻua i se tala mai Malawi e faapea, sa mafai foʻi e uso ma tuafāfine talavou i inā ona maua mai ai aogā i le vitiō, auā o omiga foʻi na o loo latou fesagaʻia mai a latou uō i le aʻoga. Na taʻua e se tamā mai Siamani e uiga i le vitiō e faapea: “Ua ou lagona o se tali lea i aʻu tatalo.” Na faapea mai se tamaʻitaʻi talavou: “Faafetai tele mo le faamanatuina mai iā te aʻu e faapea o loo manatu mai Ieova iā te aʻu.” Na faamatala mai e se toeaina i Niu Sila faapea: “Na fesoasoani le vitiō i se tasi o a ma tama talavou e toe foʻi mai ai i le ala i le ola.” Na matamata i le vitiō se tagata matua ua uma ona faaipoipo ma faapea mai: “O loʻu faanaunauga, maʻimau pe ana mafai ona matamata tagata talavou uma i le vitiō ma uunaʻia ai i latou ina ia avea le upu moni ma a latou lava mea totino!” Aiga e, aiseā e lē toe matamata ai i ai? Pe a uma, ona talanoa faatasi loa lea i fesili nei.
2 Faatomuaga: O le ā le uō moni?—Faata. 18:24.
3 Toʻatugā i Faigauō: E faapefea ona e manumalo i le lagona ua faaesea oe? (Fili. 2:4) Aiseā e tatau ai ona e naunau e faaleleia ou uiga, ma o ai e mafai ona fesoasoani iā te oe e faia lenā mea? O le ā o le a mafai ona maua ai ni avanoa e faia ai nisi uō, ma o fea e mafai ona maua ai?—2 Kori. 6:13.
4 Faigauō ma le Atua: E mafai faapefea ona e ati aʻe se faiā ma Ieova ma aiseā e aogā ai ona faia ni taumafaiga? (Sala. 34:8) O ai e sili atu ona mafai ona faamalosia la oulua faigauō ma le Atua?
5 O Uō Sesē: O ai aumea leaga? (1 Kori. 15:33) E mafai faapefea e uō sesē ona faaleagaina ai faaleagaga se tasi? O le ā se lesona ua e aʻoaʻoina mai le faamatalaga a le Tusi Paia e uiga iā Tina?—Kene. 34:1, 2, 7, 19.
6 Se Tala Faaonapōnei: Na faapefea ona aafia Tara i le lagona tuua toʻatasi? Na faapefea ona ia faia ni faamolemolega e taʻutonuina ai lona auaufaatasi ma talavou o le lalolagi? O ā lamatiaga na latou faaaafia ai o ia? Aiseā na lē taulau ai ona iloa e ona mātua le tulaga lamatia na iai o ia, ae o le ā le manatu na la fesoasoani ai iā te ia e toe malosi ai faaleagaga? Na faapefea ona avea se tuafafine paeonia ma uō moni iā Tara? Aiseā e tatau ai i Kerisiano ona utagia le Faataoto 13:20 ma le Ieremia 17:9? O le ā le lesona tāua na aʻoaʻoina e Tara?
7 Faaiʻuga: O ā ni lesona na e aʻoaʻoina mai i lenei vitiō? E mafai faapefea ona e faaaogāina lenei lesona e fesoasoani atu ai i isi?—Sala. 71:17.