Ia Fesootaʻi Faatasi ma le Autasi
1 Pe masani ona e maofa i le auala ofoofogia ua faia ai le tino o le tagata? (Sala. 139:14) E galulue pe fesootaʻi faatasi vaega uma lava o le tino. Ua faatusaina e le Afioga a le Atua le faapotopotoga Kerisiano i se tino e fesootaʻi lelei vaega uma. I lalo o le taʻitaʻiga a Keriso, le Ulu, ua ‘fesootaʻi faatasi ai ma le autasi ia sui uma o le faapotopotoga ma ua faia ia felagolagomaʻi e ala i fesootaʻiga uma ina ia maua ai le mea o loo manaʻomia.’ (Efe. 4:16a, NW) I lea, ua mafai ai ona faaaogā e Ieova ona tagata autasi e faia ni mea mataʻina.
2 Sa gaoioi “ma le loto gatasi” sui o le faapotopotoga i le uluaʻi senituri i le tausiaina o manaʻoga faaletino ma le faaleagaga o le tasi ma le isi. (Galu. 2:44-47) Faatasi ma le lagolagosua a Ieova, na mafai ai ona latou fesagaʻia ma le autasi ma manumalo ai i teteega ogaoga. (Galu. 4:24-31) Na latou folafola atu le feʻau o le Malo i so o se mea na latou ō i ai, na aofia ai le lalolagi lea na iai i lenā vaitaimi i le talaʻiina o le tala lelei. (Kolo. 1:23) I aso nei, ua faataunuuina ai e le faapotopotoga Kerisiano lenā mea i se tulaga e sili atu ona telē. O ā vala ua māfua ai lenei autasi?
3 Aufaatasia i Aʻoaʻoga a le Atua: I le lalolagi aoao, ua autasia ai i tatou e ala i la tatou tapuaʻiga. Ua mafai faapefea lenei mea? Ua tatou iloa lelei lava le auala vaaia a Ieova mo le saunia o “mea e ʻai [faaleagaga] i ona itu aso.” (Mata. 24:45) E tatou te faatāuaina foʻi “mea alofa i tagata” ua ia tuuina mai o ni faiaʻoga i le faapotopotoga. A o tatou talia ma le lotomaulalo sauniuniga a Ieova e fafagaina ai faaleagaga i tatou, o le a tupu pea lo tatou malamalama i le Afioga a le Atua ma faagaee ai i o tatou loto le faanaunauga masani ina ia faataʻitaʻi iā Iesu e pei o ona soo. E tatau ona faaauau ona tatou suʻesuʻeina le Afioga a le Atua, ma taumafai ma le filigā ina ia “maua ai le autasi i le faatuatua.” (Efe. 4:8, 11-13, NW) Po o e saosaolaumea ea i lo tatou autasi faaleagaga i le faitauina o le Tusi Paia i aso taʻitasi?
4 Autasia i Aufaatasiga Faa-Kerisiano: O le alofa, ua autasia vavalalata ai i tatou i sauniga faa-Kerisiano. I nei sauniga, e tatou te “manatunatu ai foi le tasi i le tasi.” (Epe. 10:24, 25) E aofia ai i lenei mea le lē vaavaai i na o foliga vaaia, ma faamasani ina ia tatou iloa lelei o tatou uso, ae ia vaai atu foʻi iā i latou e faapea e manaʻomia [tāua] e pei ona silasila ai Ieova iā i latou. (Ha. 2:7) A o tatou faalogologo atu i a latou faamatalaga o le faatuatua, ua faatuputeleina ai lo tatou alofa mo i latou ma faamalosia ai lo tatou autasi. Po o iloa oe, o se tasi e auai e lē aunoa i sauniga a le faapotopotoga?
5 ʻAuuso o Ē e Galulue Faatasi i le Fanua: O le talaʻia o le tala lelei ma uso talitonu, ua autasia ai i tatou i le faia o le finagalo o le Atua. Sa talisapaia e le aposetolo o Paulo ona ‘uso na latou galulue faatasi mo le malo o le Atua.’ (Kolo. 4:11) O le fetalanoaaʻi i mea na tutupu ma le fesoasoani o le tasi i le isi a o auai i le faiva, ua fesoasoani iā i tatou e faataunuuina ai lo tatou tofiga faa-Kerisiano ma faamalosia ai le fusi o loo autasia ai i tatou.—Kolo. 3:14.
6 Taaʻiga a le Agaga Paia e Autasia Ai: A o tatou filigā i le faia o lona finagalo, e foaʻiina mai e Ieova lona agaga iā i tatou. E fesoasoani lenei mea iā i tatou i le foʻiaina o feeseeseaʻiga ma nonofo faatasi ai i le autasi. (Sala. 133:1) E uunaʻia ai e lea mea i tatou ina ia “[mātauina] le loto gatasi i la le Agaga i le noataga o le filemu.” (Efe. 4:3) E mafai lava e i tatou taʻitoʻatasi ona saosaolaumea i le autasi lea e iai i tagata o le Atua, e ala i le faaalia o fua o le agaga i a tatou feutagaʻiga o le tasi ma le isi.—Kala. 5:22, 23.
7 O le auauna faatasi ma le autasi i lalo o le tulaga ulu o Keriso, “ua fesoasoani i le faatupuina o le tino ina ia atiina aʻe ai o ia lava i le alofa.” (Efe. 4:16e, NW) E lē gata i lea, e faamamaluina ai foʻi Ieova, “le Atua e ona le manuia.”—Roma 16:20.