Ia Maua Atoatoa Aogā Mai le Tauaofiaga Itumalo “O Ē Maelega e Faalauiloa le Malo”
1 Se Polokalame e Faalaeiauina Ai: E ese le manaia o le polokalame faalaeiau lea na tatou olioli ai i la tatou tauaofiaga itumalo talu ai nei! Na tatou faapotopoto faatasi ai mo se fuafuaga masani, ina ia faaauupegaina lelei ai i tatou e faalauiloa atu ma le maelega le Malo o le Atua. O e manatua le faamalamalamaina o le fasi fuaiupu “ia faalauiloa” e le failauga muamua? Po o e manatuaina o ā saʻiliʻiliga na faalaeiauina i tatou e fai i le lauga, “Aua le Matataʻu—I le Iloa o Loo iā i Tatou Ieova”? O ā tala moni i mea na tutupu i olaga o tagata ua oo iai lau saʻiliʻiliga?
2 Na aumaia i le lauga faasolo, “E Tofotofoina le Uiga o lo Tatou Faatuatua i Tofotofoga Eseese,” ni māfuaaga tāua se tolu i le pogai ua faatagaina ai e Ieova sauāga. E mafai ona e faamatalaina mai po o ā na māfuaaga? O le ā le faavae faale-Tusi Paia o lo tatou solitū faa-Kerisiano? O ā mea na faalaeiauina i tatou e fai ina ia sauniuni ai mo ni faafitauli, e ono tulaʻi mai ona o lo tatou solitū? Ua faapefea ona viia Ieova ona o lo tatou tumau faamaoni i tofotofoga?
3 O ā vaaiga na faalaeiauina faapitoa ai oe i le tala, “Ia Tumau Mausalī i Taimi Faigatā”? E mafai faapefea ona tatou pei o Ieremia?
4 I le lauga lautele, “Ua Suia le Vaaiga i Lenei Lalolagi,” o ā suiga mataʻina na faamatalaina o le a faia, ma iʻu atu ai i le aso sili ona mataʻutia o le Atua? Na faapefea ona e faafesootaʻi atu i lau lava faiva, faamatalaga ia na e faalogo ai i le lauga faaiʻu, “Ia Faatumulia i Galuega Lelei Ē Maelega e Faalauiloa le Malo”?
5 Ia Faatatauina Manatu Tāua: E pei ona faamatalaina i le lauga “Ia Faaalia se Agaga Lotofaafetai,” e faapefea ona tatou faaali atu iā Ieova lo tatou agaga faafetai? O le maelega o ai na faalaeiauina i tatou e faataʻitaʻi i ai e pei ona talanoaina i le lauga autū, “Ua Uunaʻia i le Maelega Ē o Faalauiloa le Malo? O ā iloiloga na fautuaina e faia e le tagata lava ia?
6 I le lauga faasolo, “E Faamalosia i Tatou e le Valoaga a Mika Ina ia Savavali i le Suafa o Ieova” o ā mea manaʻomia e tolu ia na faamatilatila mai e tatau ona tatou ausia ina ia maua ai le finagalo malie o Ieova? Pe e mafai ona ausia nei mea? (Mika 6:8) O ā auala e tatau ona tausia ai lo tatou mamā tau amio e pei ona talanoaina i le lauga “Tumau i le Mamā Tau Amio e Ala i le Leoleoina o Lou Loto”? I ā vala na lapataʻia ai i tatou e le lauga, “Ia Leoleo Faasaga i le Taufaaʻoleʻole” ina ia aua neʻi faasesēina i tatou ma aua neʻi o tatou faasesēina isi?
7 O ā manatu aogā mai le lauga faasolo, “O Ē Faalauiloa le Malo o Loo Faamamaluina la Latou Faiva” ua e faatatauina i lau faiva? Na iloiloina le Filipi 4:8 i le lauga, “O Talanoaga ma Isi i Mea Faaleagaga e Faalaeiauina Ai.” Ua faapefea ona fesoasoani lenā mau e tataʻi ai a tatou talanoaga i mea faaleagaga ma o afea e tatau ai ona tatou faia faapea?
8 I le lauga “Ia Faalagolago Atoatoa iā Ieova i Taimi o Puapuaga” na talanoaina ai auala e mafai ona tatou faafesagaʻia ai mea faigatā, tulaga faigatā tau tamaoaiga, le lē lelei o le soifua mālōlōina, faafitauli i le aiga, ma masei e tulaʻi mai pea. E mafai faapefea ona faaalia lo tatou faalagolago atu iā Ieova pe a fesagaʻi ma nei tulaga?
9 O ʻOa Fou Faaleagaga: Na matuā faafiafiaina i tatou ina ua maua le tusi fou Ia Tapuaʻi i le Atua Moni e Toʻatasi. O le ā se lagona na oo iā te oe ina ua faasilasila mai le fuafuaga mo le tusi? Aiseā o le a aogā tele ai lenei tusi lona lua e faia ai suʻesuʻega, i la tatou galuega o le faia o soo?
10 Ona sosoo ai lea ma lo tatou mauaina o le tusi, Draw Close to Jehovah (Faalatalata Atu iā Ieova). O ā nisi o ona vala faapitoa? O ā ni ata e pito sili ona e fiafia i ai? I lou faitauina o le tusi, po ua e maua ai ea se faiā vavalalata ma Ieova? O ai nisi e mafai ona aogā i ai le tusi?
11 Ua saunia e le Tauaofiaga Itumalo, “O Ē Maelega e Faalauiloa le Malo” mo i tatou ia faalaeiauga faaleagaga tatou te manaʻomia e faafesagaʻia ai nei taimi faigatā. O lea, ina ia maua atoatoa aogā mai lenei sauniuniga matagofie faaleagaga, seʻi o tatou faia le mea aupito sili e manatua ai mea na faamatalaina mai, talisapaia mea na tatou faalogo i ai, ma faatatauina i o tatou olaga. (2 Pete. 3:14) O le faia faapea, o le a faamalosia ai i tatou e tausisia lo tatou faamaoni, ma avea ai o ē maelega e faalauiloa le Malo i le faataʻitaʻi atu i lo tatou Alii o Iesu Keriso, ma faamamaluina ai Ieova i mea uma.—Fili. 1:9-11.