Fesoasoani i le Taimi Tatau
1 Ina ua iloa e le aposetolo o Peteru le manaʻomia ona faamalosia uso talitonu, sa uunaia ai o ia e avatu faamanatuga alofa ma faalaeiauga. (2 Pete. 1:12, 13; 3:1) Na ia timaʻi iā i ‘latou o ē ua maua le faatuatua’ ina ia faaauau pea ona tupu aʻe i uiga faaleagaga ina ia avea ma ē “ua lē paiē, a o ē fua mai le iloa lelei o lo tatou Alii o Iesu Keriso.” (2 Pete. 1:1, 5-8) O le faamoemoe na iā Peteru o le fesoasoani atu lea iā i latou ina ia faamautinoa lo latou valaauina ma lo latou filifilia na maua mai iā Ieova, ina ia ‘maua i latou e ia ma le manuia, ua lē ponā, ma le lē mataʻuleagaina.’ (2 Pete. 1:10, 11; 3:14) E toʻatele sa talitonu o na faalaeiauga o se fesoasoani talafeagai lelei i le taimi tatau.
2 I aso nei, e faapena foʻi ona manatu mamafa ovasia Kerisiano mo tagata o le Atua. I nei “aso e gata ai e oo mai ai aso faigatā,” e toʻatele auauna a Ieova o loo tauivi ina ia tumau i tulaga faigatā. (2 Timo. 3:1) Talu ai le faaauau pea o faafitauli tau i le tamaoaiga, i aiga, ma faafitauli a le tagata lava ia, atonu sa manatu ai nisi e pei o Tavita: “Auā ua siʻosiʻomia aʻu i mea leaga e lē mafaitaulia; ua maua mai aʻu e aʻu agasala, o lea ou te lē mafaia ai ona vaai; ua sili ia ona tele i oʻu lauulu; ua matuā faavaivai ai loʻu loto.” (Sala. 40:12) O nei omiga e mafai ona avea ma avega mamafa i nisi, atonu latou te lafoaʻia ai o latou tiute tāua faaleagaga, ma lē toe maelega ai i le faiva faa-Kerisiano. Ae peitaʻi, e ui lava i nei faigatā, ‘e lē galo iā i latou poloaʻiga a Ieova.’ (Sala. 119:176) O le taimi tonu lenei mo toeaina e saunia ai mo i latou na fesoasoani manaʻomia.—Isa. 32:1, 2.
3 Ina ia faataunuu lenei manaʻoga, ua faalaeiauina ai toeaina ina ia faia ni taumafaiga faapitoa e fesoasoani ai i ē ua lē o toe maelega e faia se sao i le galuega talaʻi. Ua faia nei ni taumafaiga malolosi e faataulau ai lenei mea ma o le a faaauau e oo atu i le masina o Mati. Ua fautuaina ovasia o suʻesuʻega tautusi ia asiasi ma ofo atu le fesoasoani faaleagaga iā i latou ua lē o toe talaʻi ma le sini ina ia toe faaauau ona latou galulue faatasi ma le faapotopotoga. Pe afai e manaʻomia, e mafai ona fuafua e fai sana suʻesuʻega faale-Tusi Paia. E mafai foʻi ona talosaga mo le fesoasoani a isi tagata talaʻi. Pe afai e valaaulia oe ia faia faapea, e mafai ona aogā tele au taumafaiga, aemaise lava pe afai e avatu au faalaeiauga i se auala agalelei ma le malamalama.
4 E iai māfuaaga tatou te olioli uma ai pe a faaauau ona toe galulue lea tagata ma le faapotopotoga. (Luka 15:6) O a tatou taumafaiga e faalaeiauina ai ē ua vaivai atonu o le iʻuga moni lea “o le upu ua fai faatatauina.”—Faata. 25:11.