O ā Mea E te Faamuamua?
1 O le tele o faalapotopotoga faalelotu latou te tuu le faamamafa i le faia o galuega alofa, e pei o le fausia o faleaʻoga ma mea manaʻomia mo togafitiga faafomaʻi. Ae peitaʻi, e lē faagaloina e Molimau a Ieova “ona agalelei ma alolofa atu” i le faamuamua ona fesoasoani i tagata i le itu faaleagaga.—Epe. 13:16.
2 O le Faaaʻoaʻoga i le Uluaʻi Senituri: Na faia e Iesu le tele o galuega lelei i lana faiva faale-lalolagi, ae peitaʻi o lana galuega autū lava o le molimau atu i le upu moni. (Luka 4:43; Ioa. 18:37; Galu. 10:38) Sa ia faatonuina ona soo ia “ō atu e fai nuu uma lava ma soo, . . . ma aʻoaʻo atu iā te i latou.” (Mata. 28:19, 20) Ma na ia faaalia o i latou uma o ē faatuatua iā te ia o le a faaauau ona latou faalautele atu le galuega lea na ia amataina. (Ioa. 14:12) Sa ave e Iesu le faamuamua i le galuega talaʻi, talu ai e mafai ona fesoasoani i tagata e aʻoaʻo le ala i le faaolataga.—Ioa. 17:3.
3 Sa tagaʻi Paulo i lana galuega talaʻi ʻe lē o se faitalia’ ae o se mea e manaʻomia e lē mafai ona ʻalofia. (1 Kori. 9:16, 17) Sa ia lotomalie e faataulaga so o se mea, tumau i tofotofoga, onosaia so o se faigatā ina ia faataunuu ai lana faiva. (Galu. 20:22-24) Sa faaalia e le aposetolo o Peteru ma ana aumea le agaga lava lea e tasi. Sa ʻlē mapu foʻi i latou i le aʻoaʻo atu ma talaʻi atu mai lea fale ma lea fale le tala lelei o Iesu Keriso,’ e ui lava i le faafalepuipuiina ma le sasaina.—Galu. 5:40-42.
4 Ae faapefea la i tatou? Po o tatou faamuamua le galuega o le folafola atu o le tala lelei o le Malo ma faia soo? Po o tatou manatu mamafa moni lava e pei o Iesu mo ē “ua lailoa i latou ma tuulafoaʻiina, e pei o mamoe e leai so latou leoleo”? (Mata. 9:36) O mea tutupu i le lalolagi i aso nei ma valoaga a le Tusi Paia ua faamautinoa mai ai ua tatou ola nei i le siʻui o lenei faiga amioleaga o mea! O le taulaʻi atu i le tāua o le galuega talaʻi o le a uunaia ai i tatou e faaauau pea ona talaʻi ma le maelega.
5 Ia Iloilo Ou Tulaga: Talu ai e masani ona suia tulaga o le tagata lava ia, e lelei ai la le iloiloina mai lea taimi i lea taimi pe mafai ona tatou faia ni fetuutuunaʻiga ina ia mafai ona fai so tatou sao atoatoa i le galuega talaʻi. O se tasi o tuafafine sa paeonia sauatoa mai tausaga o le 1950-1970, sa tatau ona taofia ona ua lē lelei lona soifua mālōlōina. Ae peitaʻi, sa toe malosi o ia. Sa ia toe iloiloina lona tulaga ma filifili ai loa o le a toe paeonia. Maʻeu lona olioli ina ua auai i le Aʻoga Paeonia i le 90 o ona tausaga! Ae faapefea oe? Pe ua latalata ina e litaea mai le galuega pe faauu foʻi i le aʻoga? Pe afai o le a suia lou tulaga, pe o le a mafai ona e paeonia?
6 Ina ua silafia e Iesu Mareta “ua tigā i le fatuaiga,” sa ia taʻu atu ma le agalelei o le a ia maua faamanuiaga e tele pe afai e faafaigofie le olaga. (Luka 10:40-42) Pe mafai ona e faafaigofie lou olaga? Pe e manaʻomia moni lava ona tau fai faigaluega le tane ma le avā i se galuega totogi? Pe afai e fai ni fetuutuunaʻiga, pe mafai ona maua mea manaʻomia o le olaga i le na o le tasi o le tagata e faigaluega? E toʻatele ua maua aogā faaleagaga e ala i le faia o ni fetuutuunaʻiga ina ia mafai ona faateleina se sao i le faiva.
7 E mafai e i tatou uma ona mulimuli i le faaaʻoaʻoga na faataatia e Iesu ma ona aposetolo! E mafai ona tatou mautinoa i faamanuiaga a Ieova i a tatou taumafaiga filigā ia faia se sao atoatoa i le galuega tāua o le talaʻia o le tala lelei o le Malo.—Luka 9:57-62.