La Tatou Galuega Autū—O le Faiva Faa-Kerisiano
1 O i tatou uma e iai galuega eseese e tatau ona tatou faia. O le saunia o mea manaʻomia mo le aiga o se faatulagaga lea mai le Atua. (1 Timo. 5:8) Ae peitaʻi o le galue i lenā faatulagaga mai le Atua e lē faapea ai ua tāua tele atu lea na i lo o le talaʻia o le Malo ma le faia o soo.—Mata. 24:14; 28:19, 20.
2 Sa saunia e Iesu se faaaʻoaʻoga mo i tatou e mulimuli ai i le ʻmuaʻi saʻilia o le malo.’ (Mata. 6:33; 1 Pete. 2:21) E ui sa itiiti ni mea faaletino sa ia maua ae sa ia uaʻi atu atoatoa i le faia o le finagalo o lona Tamā. (Luka 4:43; 9:58; Ioa. 4:34) Sa ia filigā e avatu se molimau i avanoa uma. (Luka 23:43; 1 Timo. 6:13) Sa ia pulunaunauina foʻi ona soo ina ia iai lea lava naunautaʻiga malosi iā i latou i le galuega o le seleselega.—Mata. 9:37, 38.
3 Ia Faataʻitaʻi iā Iesu i Aso Nei: E mafai ona tatou faataʻitaʻi i le faaaʻoaʻoga a Iesu e ala i le taumafai e ola i se olaga faigofie lea e faaautū atu i le faiva faa-Kerisiano. Afai ua iā i tatou mea e manaʻomia mo le olaga, seʻi o tatou utagiaina la le fautuaga a le Tusi Paia ina ia aua le soona manaʻo tele i mea a lenei lalolagi. (Mata. 6:19, 20; 1 Timo. 6:8) Maʻeu le lelei o le taumafai e faalautele so tatou sao i le galuega talaʻi! Pe a tatou fesagaʻi ma luʻi, seʻi o tatou filigā e pei ona sa faia e Iesu, ma aua neʻi avea le pupū atu i mea a le olaga nei ma māfuaaga e lē tāua ai la tatou galuega autū o le faalauiloaina o le tala lelei o le Malo.—Luka 8:14; 9:59-62.
4 O loo faamuamua foʻi le galuega talaʻi e i latou o loo tele tiute tauave. Na faapea mai se uso e toʻatele sona aiga, e faigaluega ma auauna o se toeaina i se faapotopotoga Kerisiano e faapea: “Ou te manatu i le faiva o laʻu galuega autū lea.” Ua taʻua foʻi e se tuafafine paeonia e faapea: “E sili mamao atu le galuega faapaeonia na i lo o se galuega totogi lelei.”
5 E ui lava i o tatou tulaga, seʻi o tatou mulimuli pea i le faaaʻoaʻoga a Iesu. E faapefea? E ala lea i le avea o le faiva faa-Kerisiano ma a tatou galuega autū.