‘Inā Talia Ia’
1 Ina ua fetalai atu i ona aposetolo e faatatau i le faaipoipo, na faasino atu ai Iesu i le nofofua o se meaalofa “ua foaʻiina atu i ai.” Ona fetalai mai lea o Iesu: “Ai sē na te mafaia ona talia, inā talia lea e ia.” (Mata. 9:10-12) I ni tausaga mulimuli ane ai, na tusi ai le aposetolo o Paulo i aogā o le nofofua ma faalaeiauina ai isi ina ia mulimuli i lana faaaʻoaʻoga o le lē faaipoipo. (1 Kori. 7:7, 38) O le toʻatele i aso nei ua latou “talia” le nofofua ma olioli i ona aogā. O ā nisi o nei aogā?
2 Auauna ma le “Loto Lē Fetosoaʻiina”: Sa silafia e Paulo e faapea o le nofofua sa ia mauaina ai le avanoa e auauna ai iā Ieova ma le “loto lē fetosoaʻiina.” E faapena foʻi i aso nei, e mafai e se uso nofofua ona talosaga atu i le Aʻoga mo le Toleniga i le Faiva, ma e tele atu le saʻolotoga o le tagata nofofua e paeonia ai, aʻoaʻoina se isi gagana, siitia atu i le mea o loo tele ai le manaʻoga, auauna i Peteli, po o le avanoa foʻi mo isi faaeaga faapitoa o le auaunaga. Atonu o le a tele lona taimi ma le avanoa o le a ia faaaluina i ana suʻesuʻega totino loloto ma manatunatu ai i mea o loo ia suʻesuʻeina ma talanoa atu ai iā Ieova e ala i se tatalo e sau mai le loto. E masani lava ona telē le taimi o le tagata nofofua e fesoasoani atu ai i isi. O na gaioioiga uma e “aogā” i le tagata lava ia.—1 Kori. 7:32-35; Galu. 20:35.
3 O lenā auaunaga i le Atua ma le lē fetosinaaʻi, e aumaia ai faamanuiaga se tele. Ina ua māeʻa tausaga e 27 sa nofo ai i Kenya, na tusi mai ai se tuafafine nofofua e faapea: “E tele aʻu uō ma sa tele foʻi galuega sa fai! Na matou faifaimea faatasi [ma] feasiasiaʻi le tasi i le isi . . . sa mafai ona ou faaaogāina le saʻolotoga lea e maua e le tagata nofofua, ma le faigofie ona faimalaga i so o se mea e faapisi ai i le faiva, ma sa ou olioli tele ai.” Na ia faaopoopo mai: “I nei tausaga e tele ua matuā vavalalata ai lava la ma faiā ma Ieova.”
4 Ia Faaaogā Lelei le Avanoa o le Nofofua: Na fetalai Iesu e faapea o le uunaʻiga mo le atiina aʻe o le meaalofa o le nofofua e tatau “ona o le malo o le lagi.” (Mata. 19:12) I so o se meaalofa lava, e tatau ona faaaogā lelei le nofofua ina ia maua ai aogā ma le olioli. O le faaaogāina lelei o avanoa ia e maua ona o le nofofua ma faalagolago iā Ieova mo le atamai ma le malosi, ua toʻatele ai tagata e leʻi faaipoipo ua latou malamalama i le tāua o le taliaina o lenei meaalofa o le nofofua.