Ia Faaaʻoaʻo iā Keriso i Lau Faiva
1 Na faataatia e Iesu se faaaʻoaʻoga e tatou te mulimuli ai i la tatou faiva. O lona alofa loloto i le Atua ma tagata sa faaalia i le tele o taimi i auala eseese. Na ia aʻoaʻo tagata loto maulalo i le upu moni ma faia le tele o gaoioiga alofa mo ē na puapuagatia ma mafatia.—Mata. 9:35.
2 Faaaʻoaʻoga ma Aʻoaʻoga a Iesu: E leʻi iai lava se taimi na tosina ese ai Iesu e ala i le aafia i mataupu faapolotiki, po o taumafaiga a tagata e faaleleia tulaga o mea mo le lautele. Na te leʻi faatagaina foʻi ni faanaunauga e fai ni mea lelei e tosina ese ai, pe faalavelave ai i lona faamuamuaina o lana galuega autū. (Luka 8:1) Sa taulaʻi atu Iesu i le talaʻia o le tala lelei o le Malo o le Atua ua na o le pau lea o le vaifofō tumau i faafitauli o tagata. Sa iai se galuega tāua a Iesu ae e itiiti le taimi e faia ai. Ina ua mananaʻo tagata o Kapanaumi e nofo pea Iesu ma i latou, na ia fetalai atu i ona soo: “Inā tatou ō atu ia . . . ia ou talaʻi atu i ai le tala lelei, auā o le mea na ou sau ai.”—Mare. 1:38.
3 Ina ua uma ona toleni e Iesu ona soo, ona ia aauina atu lea o i latou faatasi ai ma le faatonuga maʻoti lenei: “Ia outou talaʻi atu, ia faapea atu, Ua latalata mai le malo o le lagi.” (Mata. 10:7) Sa ia aʻoaʻoina ona soo ina ia faatāua manaʻoga o le Malo i o latou olaga. (Mata. 6:33) O upu taumavae a Iesu i ona soo a o leʻi afio aʻe i le lagi na manino lelei ai le mea e ao ona latou fai. Na ia fetalai atu: “O lenei, ia outou ō atu e fai nuu uma lava ma soo.”—Mata. 28:19.
4 Le Tāua o le Malo: O le mataupu autū na talanoa ai Iesu, o le Malo o le Atua ma na ia fautuaina malosi ona soo e mulimuli i lana faaaʻoaʻoga. E lē taulau taumafaiga a tagata e foʻia faafitauli o le fanau a tagata. (Iere. 10:23) Ua na o le Malo o le Atua e faamamaluina le suafa o le Atua, ma aumaia mapusaga tumau i tagata. (Mata. 6:9, 10) O le aʻoaʻoina o le upu moni o le Malo i tagata o loo “mapuitigā ma feoi ona o mea inosia uma” e fesoasoani iā i latou e ola ai i se olaga fiafia i le taimi nei, ma tausisi ai i le faamoemoe maufaatuatuaina i le lumanaʻi.—Eseki. 9:4.
5 O loo iai pea se vaega fai a Iesu i le talaʻiina o le tala lelei o le Malo o le Atua, ma ua ia faamautinoa mai lana lagolagosua iā i tatou. (Mata. 28:20) O le ā le tele o mafai ona faatusatusa atu ai la tatou faiva i le faaaʻoaʻoga na faataatia e Iesu? (1 Pete. 2:21) I nei vaitaimi mataʻina o aso e gata ai, tau ina ia tatou faia le mea sili e mafai e lo tatou malosi ona ausia, ina ia piiama atu ai pea i le faaaʻoaʻoga na faataatia e Iesu i le faiva!