Faamamafa Atili le Tusi Paia!
1. I le amataga, o ai sa faapitoa ona lomia i ai Le Olomatamata, ae o ai sa faapitoa i ai le mekasini The Golden Age?
1 Iā Oketopa 1, 1919, na lomia ai le uluaʻi lomiga o le mekasini sa taʻua The Golden Age. Sa faamaonia lona matuā aogā tele i le galuega talaʻi. Aiseā? Ona sa faapitoa ona lomia e fuafua mo tagata i le lautele. Ae e lē o le fuafuaga lenā o Le Olomatamata, lea mo le tele o tausaga sa manatu i ai o se mekasini sa taulaʻi atu le tele o manatu mo le “lafu mamoe itiiti.” (Luka 12:32) Na tali atu ma le naunau le ʻautalaʻi i le lomiga fou lenei, o lea mo le tele o tausaga sa tele atu le aofaʻiga o le mekasini The Golden Age na lomia na i lo Le Olomatamata.
2. O le ā le igoa ua faaigoaina ai le mekasini The Golden Age i aso nei, ma o le ā lona fuafuaga mai lava i le amataga?
2 Sa lomia le mekasini The Golden Age e faailoa ai i tagata le vaifofō moni mo faafitauli o tagata, o le Pulega lea a Keriso mo le Afe o Tausaga, lea o le a aumai moni ai lava i tagata se taimi e sili ona fiafia ma sologa lelei o le olaga. I le faitau sefulu tausaga mulimuli ane ai, sa toe fetuutuunaʻi ai le mekasini The Golden Age ina ia faafetaui atu i suiga eseese a o faagasolo le taimi. I le 1937 na suia ai lona igoa i le Consolation. Ma i le 1946 na faaigoa ai loa i le Awake! lea ua lauiloa ai i aso nei.
3. Ua avea le Awake! ma meafaigaluega malosi i le faataunuuina o le ā le valoaga?
3 Mai lava i lona amataga, ua telē se sao o lenei mekasini i le galuega o le molimau atu talu mai le 1919. (Mata. 24:14) Ae peitaʻi, ona o le faanatinati tele ua iai o tatou taimi, ua foliga mai ai o se tulaga atamai le faia o nisi suiga i le Awake!
4. (a) O le ā e manaʻomia ona faia e se tagata pe afai e manaʻo e lilo i “le aso o le toʻasā o Ieova”? (e) E tusa ai ma le Faaaliga 14:6, 7, o le ā le mea o loo fai mai ai le “agelu ua lele i le taulotoaʻiga o le lagi” e fai e tagata uma?
4 E faitau miliona tagata e fiafia e faitau le Awake! ona o loo talanoaina ai le tele o mataupu e faatatau i le soifuaga i se auala e faaoso naunau. E lē masalomia o le toʻatele o tagata o loo auai i le Faamanatuga i tausaga taʻitasi o tagata e faitau e lē aunoa i le Awake! Peitaʻi, afai e faamoemoe se tasi ia lilo i “le aso o le toʻasā o Ieova,” e na te manaʻomia se fesoasoani ina ia fai se mea e sili atu na i lo le tau ina avea ma tagata faitau o a tatou lomiga.—Sefa. 2:3; Faaa. 14:6, 7.
5. (a) E amata mai i le Awake! o Ianuari 2006, o le ā o le a matuā faamatilatila mai ai? (e) O le ā e ono uunaʻia le toʻatele e fai, ma o le faataunuuga o le ā le valoaga?
5 E amata atu iā Ianuari 2006, o le a tuu atu e le Awake! le faamamafaga tele i le Malo o le Atua. O le a faalaeiau tuusaʻo ai le ʻaufaitau e vaai i le Tusi Paia mo vaifofō o latou faafitauli, ma o le a matuā faamatilatila ai faamatalaga a le Tusi Paia e faatatau i mea o loo tutupu. I lenei auala, o le a maua ai e tagata faitau se malamalamaga e sili atu o mea o loo tutupu, ma atonu e uunaʻia ai i mea o loo latou faitau ai e aʻoaʻoina atili mea e faatatau iā Ieova.—Saka. 8:23.
6, 7. (a) O le a faapefea nei ona faatulaga le Awake! ina ia fesoasoani i le toʻatele e faatatauina le 1 Tesalonia 2:13? (e) O le a faafia ona lomia le Awake!, ma e fia gagana o le a aafia i le suiga o le a iai?
6 O le a faaauau pea ona talanoaina e le Awake! mataupu e fiafia i ai le toʻatele o tagata. Ae peitaʻi, o le a tuu atu le faamamafaga i le Tusi Paia. (1 Tesa. 2:13) Ona o loo iai i Le Olomatamata faamatalaga loloto faale-Tusi Paia, ma o le a faamatilatila atili mai foʻi i le Awake! le tele o mataupu e faavae i le Tusi Paia, ua foliga mai la e lē o toe manaʻomia ona faaauau ona lomia le Awake! e faalua i le masina. O lea la, e amata atu i le lomiga o le Awake! o Ianuari 2006, o le a lomia ai e faatasi i le masina. O le a matuā faigofie ai lava sauniuniga, le faaliliuina, ma le feaveaʻiina o ā tatou lomiga.
7 O lenei suiga o le a aafia ai pe tusa o le 40 pasene o gagana o loo lomia ai le Awake! O le tele lava o gagana, o loo lomia le Awake! e faatasi i le masina po o le faafā foʻi i le tausaga. O le a leai se suiga i le lomiga o Le Olomatamata.
8. O le a faapefea ona faaaogā e le ʻautalaʻi le Awake! faatasi ma Le Olomatamata?
8 E mafai ona ofo e se tagata talaʻi le Awake! o masina taʻitasi, ma so o se lomiga lava o Le Olomatamata o lenā masina. O i latou o le a ofoina le Awake!, o le a mafai ona faaaogā lenā lava lomiga mo le masina atoa, e aunoa ma le toe suia o la latou taulimaga i le ogatotonu o le masina e pei ona iai i le taimi nei.
9. O le ā le matafaioi o le a faaauau ona fai e le Awake!?
9 Talu mai lona uluaʻi lomiga i tuā i le 1919, o le mekasini lea sa amata iloa mai, The Golden Age, Consolation, a o lea ua igoa nei o le Awake! ua telē sana matafaioi ua fai i le galuega talaʻi. E matou te tatalo ina ia faaauau pea ona faamanuia Ieova i le tufatufaina atu o le mekasini i lona tulaga ua toe suia ai nei ma fesoasoani i le toʻatele o tagata mai “atu nuu uma, ma aiga, ma nuu ma gagana eseese” ina ia liliu atu i le Malo o le Atua e na o le pau lea o le faamoemoe o loo iai.—Faaa. 7:9.