Faaaogā Tatau Lou Taimi
1 O lo tatou faanaunauga ia faamalieina Ieova, e uunaʻia ai i tatou e taulaʻi atu o tatou olaga i mea faaleagaga. Ua faatonuina i tatou e lana Afioga e “muaʻi saʻili le malo” ma ia “faamautinoa mea e sili ona tāua.” (Mata. 6:33; Fili. 1:10, NW) E faapefea ona tatou faaaogā tatau aso o le olaga mo manaʻoga o le Malo ae faatulagalua mea e itiiti lo latou tāua?—Efe. 5:15-17.
2 Ia Faamuamua Galuega o le Malo: Ia faatulaga lou taimi ina ia lē maumau i mea e lē tāua. E amata e nisi ia masina taʻitasi i le faatulaga o taimi patino i la latou kalena mo le auaunaga i le fanua. Ona latou faamautinoa lea, e lē faatagaina isi mea e faalavelaveina ai faatulagaga ua uma ona faataatitia. E manaʻomia foʻi ona faatulaga taimi mo a tatou sauniga, suʻesuʻega a le tagata lava ia, faapea ma tauaofiaga. E toʻatele e iai sa latou faatulagaga e amata ma faaiʻu aso taʻitasi i le faitauina o le Tusi Paia. Ia tuu ese se taimi patino mo mea tāua taʻitasi, ma ia aua neʻi avea nisi o mea e faalavelavea ai fua e aunoa ma se māfuaaga tatau ia fuafuaga ua uma ona fai.—Fai. 3:1; 1 Kori. 14:40.
3 Ia Faatapulaa le Faaaogāina o Mea a le Lalolagi: I nisi atunuu, e faigofie lava ona maua mea e pei o taaloga, o faafiafiaga, o gaoioiga e faafouina ai le malosi ma le mafaufau, ma isi mea e fiafia le tagata e fai. Ua faaalu e le toʻatele o tagata se taimi tele e matamata ai i le televise po o le faaaogāina o komepiuta. Ae peitaʻi, o le faaalu o se taimi tele i gaoioiga faasamasamanoa atoa ai ma tamaʻi masini fou o loo maua i lenei vaitaimi, e mautinoa lava e lē faamalieina ai. (1 Ioa. 2:15-17) O lea la, ua fautuaina i tatou e le Tusi Paia e aua le matuā fetagofi i mea a le lalolagi. (1 Kori. 7:31) O le utagiaina o lenā fautuaga poto, ua e faaalia atu ai iā Ieova o loo e faamuamua lana tapuaʻiga i lou olaga.—Mata. 6:19-21.
4 Ua i faitotoʻa le iʻuga o lenei faiga o mea. O i latou e faamuamua manaʻoga o le Malo, o le a maua le fiafia ma maua le finagalo malie o le Atua. (Faata. 8:32-35; Iako. 1:25) O lea la, seʻi o tatou faaaogā tatau nei loa o tatou taimi.