O le ā E te Faamuamua?

¹ O le a faapefea ona e tali lenei fesili? E lē fesiligia le mea moni tatou te faanaunau uma lava e faamuamua manaʻoga o le Malo. (Mata. 6:33) Peitaʻi, tatou te ono fesili ifo iā i tatou lava, ‘Po o faaalia ea i filifiliga ou te faia o loʻu manaʻoga moni lava lenā?’ O loo faalaeiau mai le Tusi Paia: “Inā suʻesuʻe ifo ia iā te outou; pe tou te lē iloa ea o outou loto.” (2 Kori. 13:5) E faapefea ona suʻesuʻe ifo i o tatou lava loto po o faamuamua le Malo?

² O Tatou Taimi: E tatou te ono amata i le iloiloina o le auala o tatou filifili e faaalu ai o tatou taimi. (Efe. 5:15, 16) O le ā le tele o le taimi e faaalu i vaiaso taʻitasi i gaoioiga faasamasamanoa, matamata i le televise, faaalu i le Initineti, ia po o isi mea e fiafia i ai? Pe afai tatou te tusia uma le tele o le taimi o tatou faaalu i na mea, ma faatusatusa ma le tele o le taimi tatou te faaalu i gaoioiga faaleagaga, e ono faateʻia i tatou. Na i lo le manatu mamafa i le auaunaga paia, pe tatou te faaalu ea le tele o itula e galue ovataimi ai ona o le saʻilia o mea tatou te fiafia ai? E faafia ona tatou misia sauniga po o le talaʻiga ona o le auai atu i faafiafiaga ma tafaoga i faaiʻuga o vaiaso?

³ Mea e Ao Ona Faamuamua: O le toʻatele o i tatou e lē lava so tatou taimi e fai ai mea uma tatou te mananaʻo ai. Ina ia faamuamua la manaʻoga o le Malo, e manaʻomia ona faatulaga mea e ao ona faamuamua ona faatulaga lea o taimi mo mea e sili atu ona tāua. (Fili. 1:10) E aofia ai le suʻesuʻeina o le Afioga a le Atua, auai i le talaʻiga, tausia o le aiga, ma le auai i sauniga faa-Kerisiano. (Sala. 1:1, 2; Roma 10:13, 14; 1 Timo. 5:8; Epe. 10:24, 25) O isi gaoioiga, e pei o se faamalositino ma ni evaevaga talafeagai, o mea e aogā. (Mare. 6:31; 1 Timo. 4:8) Ae, e lē tatau ona faalavelave mea nei e lē aogā tele i manaʻoga o le Malo.

⁴ Sa filifili se uso talavou e faamuamua manaʻoga o le Malo e ala i le auai i le faiva faataimi atoa na i lo le faaauau i aʻoaʻoga maualuluga ina ia maua ai se galuega totogi. Na ia aʻoaʻoina se isi gagana ma alu atu i le mea sa manaʻomia tele ai se fesoasoani. O lana tala lenei: “Ua matuā faafiafiaina aʻu i le taimi nei. E faalaeiauina moni ai lava i le faiva! O oʻu moomooga maʻimau e, pe ana fai e talavou uma se gaoioiga faapenei ma latou maua ai le faalogona lea ua iā te aʻu. E leai se isi mea e sili ona lelei na i lo le auauna iā Ieova.” Ioe, o le faamuamua o le Malo e maua ai faamanuiaga, ae o le mea sili ona tāua, e faafiafiaina ai Ieova, lo tatou Tamā i le lagi.—Epe. 6:10.