Tusi Mai le Ofisa

Mo le ʻAutalaʻi Pele,

I le amataga o le tausaga faaleauaunaga, tatou te tulimataʻi atu le tuputupu aʻe atili a o faaauau ona agaʻigaʻi i luma le toʻatele o a tatou talavou ma oo ina agavaa e avea ma tagata talaʻi e leʻi papatisoina. A o faagasolo le tausaga na teʻa nei na tatou olioli ai i le vaaia o le toʻatele o uso ma tuafāfine talavou iā i latou na faailoa lo latou tuuina atu i le papatisoga.

I Ausetalia, ua atoa nei ni nai masina talu ona amata faaaogā le masini lomitusi fou o le ituaiga o le Hantscho, ma e uigaese le lelei o le tulaga ua iai. O le masini fou lea ua iai nei e mafai ona lomia ai mekasini e sefulu i le sekone, e tusa ua faaluaina le saoasaoa i lo le masini na iai muamua.

E toʻatele i latou mai i atunuu i fafo faapea foʻi ma Samoa nei sa asiasi mai i le Peteli i Samoa i le tausaga na teʻa nei, ma sa matuā faafiafiaina ai i matou. Na aumaia e ni paeonia faapito ni tuafāfine talavou e toʻasefulu mai se faapotopotoga i inei lava i Samoa e maimoa i le Ofisa, ma sosoo ai ma se taumafataga faatasi ma le Aiga Peteli. Na faapea mai se tasi o tuafafine talavou, “Ua ou aʻoaʻoina le tele o mea tāua, ma ou te manaʻo e faaaogā tatau loʻu olaga o se talavou e taʻu atu ai i isi nei mea tāua.” Ina ua lagona le faagaeetia i mea na ia vaai i ai, na faapea mai le isi, “Ou te manaʻo lava ia ou pei o outou.”

Na faaalia e misionare uma i Samoa ma Amerika Samoa le olioli mo le valaauliaina i le asiasiga a le ovasia o le Sone i Ausetalia, ma ina ua toe taliu mai na lagona le faafouina mo isi galuega fai o loo tepa taulaʻi atu i ai. Na faaalia e uso le agaga talisapaia mo sauniga faapitoa sa faatulaga i Samoa nei ma Amerika Samoa ina ia faamatalaina ai nisi o manatu sa aofia i lauga a ovasia o le Sone a o asia Ausetalia.

E avatu le faamālō tele ona o galuega maelega o loo fai i le faaauilumaina o manaʻoga o le Malo! E matuā talisapaia foʻi lo outou aaomafola i le lagolagosua tau tupe na foaʻi mai. (Faata. 3: 9, 10) Tau ina ia viia Ieova i a tatou taumafaiga autasi ina ia “viia ai lona mamalu.”—Efe. 1:12.

O o outou uso,

Ofisa i Samoa