O le Ati Aʻe o Masaniga Lelei e Maua ai Aogā e Tele
1. Aiseā e tāua ai le iloiloina o lau faasologa masani faaleagaga?
1 Ina ua avea oe ma Kerisiano, sa e ono fai ni taumafaiga se tele e ati aʻe ai se faasologa lelei o mea fai faaleagaga, lea e aofia ai le suʻesuʻeina o le Tusi Paia, sauniga faa-Kerisiano, faiva i le fanua, ma le tatalo. O le iʻuga o le faamanuia a Ieova i au taumafaiga, ua e tuputupu aʻe ai faaleagaga. Atonu o lea ua mavae atu ni tausaga talu le taimi na e papatiso ai. Po o tumau pea masaniga lelei faaleagaga na e ati aʻe ina ua avea oe ma Kerisiano?
2. Ua faapefea ona aogā iā i tatou le faitauina o le Tusi Paia i aso taʻitasi?
2 Toe Iloilo Lau Faasologa Masani: Po o fai ma au masani le faitau o se vaega o le Afioga a le Atua i aso taʻitasi? Maʻeu le faamanuiaina ai ona o le faia faapea! (Iosua 1:8; Sala. 1:2, 3) I Isaraelu anamua, sa tatau i tupu taʻitasi ona faitau i lana lava kopi o le Tulafono, i “aso uma lava o lona olaga.” O ā aogā? O le a ati aʻe ai e le tupu le loto maulalo ma iloa ona mataʻu iā Ieova ina ia lē liliu ese mai ai i ana tulafono. (Teu. 17:18-20) E faapena foʻi i aso nei, o le faitau o le Tusi Paia i aso taʻitasi, e fesoasoani ia tatou tumau ai i le lē mataʻuleagaina i lenei lalolagi leaga. E fesoasoani foʻi iā i tatou ina ia lava tapena ai mo le faiva.—Fili. 2:15; 2 Timo. 3:17.
3. O ā faamanuiaga e tatou te maua mai le auai e lē aunoa i sauniga?
3 O le masani a Iesu o le alu i le sunako, lea e talanoaina ai le Tusi Paia. (Luka 4:16) E mautinoa o lona faia faapea, na sauniunia ai o ia e feagai ma puapuaga o le a oo ane iā te ia. Ua faapena foʻi ona faamalosia ai i tatou i aʻoaʻoga faaleagaga ma ‘fefaamāfanafanaaʻiga’ aogā o loo tatou maua mai i sauniga. (Roma 1:12) O le faapotopoto faatasi ma o tatou uso, e fesoasoani iā i tatou e tumau ai i faigatā o nei aso e gata ai. (Epe. 10:24, 25) Po o avea pea ma au masani le auai i sauniga?
4. E faapefea ona tatou maua aogā i le auai i le auaunaga i le fanua i vaiaso taʻitasi?
4 Ua taʻu mai iā i tatou e faamaumauga a le Tusi Paia e faapea, na auai aposetolo i le folafolaina o le tala lelei ‘i aso uma i le malumalu, ma lea fale ma lea fale.’ (Galu. 5:42) Pe a lē mafai ona tatou talaʻi i aso uma, pe mafai ona tatou auai i nisi o vala o la tatou faiva i vaiaso taʻitasi? O le faia faapea, e mautinoa o le a tatou tomai ai i le taulimaina o le Afioga a le Atua, ma e ono oo ai iā i tatou ni mea e faafiafiaina ai, a o faailoa atu le upu moni o le Tusi Paia i isi.
5. Aiseā e tāua tele ai le tatalo atu e lē aunoa iā Ieova?
5 Na matuā faamanuiaina le perofeta o Tanielu i le auauna iā Ieova ‘e lē aunoa’ i lona soifuaga atoa. E aofia ai i lenā mea, lana masani o le tatalo e lē aunoa iā Ieova. (Tani. 6:10, 16, 20) E faapea foʻi pe a tatou tatalo e lē aunoa iā Ieova mai o tatou loto, o le a ia foaʻi mai iā i tatou lona agaga paia. (Luka 11:9-13) E lē gata i lea, o le a tali mai Ieova i lona faalatalata mai iā i tatou, ma mafai ai ona tatou maua se faiā māfana ma ia. (Sala. 25:14; Iako. 4:8) Maʻeu se taui matagofie tele! O lea la, seʻi o tatou taumafai malosi e tausia ni masaniga lelei faaleagaga ma seleseleina ai faamanuiaga mai iā Ieova.