“Na te Avatua le Malosi i Ē ua Vaivai”
1 E tatou te vaivai uma i nisi o taimi. Atonu ona o galuega po o isi mea e fai, ae tatou te vaivai foʻi ona o luʻi e fesagaʻia i nei “aso faigatā.” (2 Timo. 3:1) I le avea o ni auauna a Ieova, e faapefea ona tatou maua le malosi faaleagaga e manaʻomia e puipuia ai mai le faifaimālie i la tatou faiva? E tatou te maua i le faalagolago atu i lē ona le “mana tele,” o Ieova. (Isa. 40:26) E na te silafia o tatou manaʻoga ma e naunau moni e fesoasoani iā i tatou.—1 Pete. 5:7.
2 Fesoasoani Mai iā Ieova: E faamalosia e Ieova i tatou i lona agaga paia, le malosiaga e lē mataofia lea na ia faia ai le vateatea. E fesoasoani le agaga paia o le Atua e ‘faafouina ai lo tatou malosi’ pe a vaivai. (Isa. 40:31) Ia fesili ifo iā te oe, ‘O fea le taimi mulimuli na ou tatalo faapitoa ai mo le agaga paia e faamalosia aʻu e faataunuu oʻu tofiga faa-Kerisiano?’—Luka 11:11-13.
3 O le faitau o le Tusi Paia ma manatunatu loloto i ai i aso uma, ma le fafagaina faaleagaga i le suʻesuʻe e lē aunoa o lomiga faa-Kerisiano, e pei ai i tatou o se “laau ua totō i tafatafa ane o vaitafe, e fua mai ona fua i ona lava tau; e lē toʻulu foʻi ona lau; e manuia foʻi mea uma na te faia.”—Sala. 1:2, 3.
4 E faaaogā foʻi e Ieova uso talitonu e avea o ni “faamatalaloto” iā i tatou. (Kolo. 4:10, 11) E latou te faamalosia i tatou i sauniga a le faapotopotoga i talanoaga e ati aʻe ai, tali ma lauga. (Galu. 15:32) E saunia e toeaina Kerisiano fesoasoani faaleagaga ma faalaeiauga e faafouina ai.—Isa. 32:1, 2.
5 Le Faiva: Afai ua e lagona ua oo mai le vaivai, aua neʻi taofia lou talaʻi atu! E lē pei o le tele o isi galuega, ae o le auai e lē aunoa i le faiva e faafouina moni ai i tatou. (Mata. 11:28-30) O le talaʻi o le tala lelei e fesoasoani iā i tatou e taulaʻi ai i le Malo o le Atua ma ona faamanuiaga e faavavau.
6 E tele ni galuega e fai a o leʻi faaumatia lenei lalolagi amioleaga. Ua iā i tatou māfuaaga uma e tu mausalī ai i le auaunaga, e ‘tusa ai ma le malosi ua foaʻiina mai e le Atua.’ (1 Pete. 4:11) O le a faaiʻu la tatou galuega i le fesoasoani a Ieova, auā “na te avatua le malosi i ē ua vaivai.”—Isa. 40:29.