Pe E te Lagolagoina le Afioga a le Atua?
1 I se lalolagi ua masani ona lē amanaʻia ai le Tusi Paia, o loo lagolagoina ai ma le maelega e Kerisiano moni le Afioga a le Atua. I le mautinoa “o tusi paia uma lava e mai le Agaga o le Atua,” ua tatou aufaatasi ai ma Iesu o lē na faailoa atu iā Ieova i le tatalo: “O lau afioga o le upu moni lea.” (2 Timo. 3:16; Ioa. 17:17) E faapefea ona tatou lagolagoina ma le uigā le Afioga a le Atua?
2 Ia Aʻoaʻoina ni Mau: E lē taumatea na aʻoaʻoina e Iesu le Afioga a le Atua. Na mafai ai ona ia aʻoaʻo atu mai le Tusi Paia i lana faiva. (Luka 4:16-21; 24:44-46) E faapefea ona teu i o tatou mafaufau ni mau e fesoasoani iā i tatou? E ala i le faitau o le Tusi Paia i aso taʻitasi, ma manatunatu loloto i se fuaiupu e tatou te iloa e aogā pe fesoasoani i le faiva. Pe a sauni mo sauniga, e ao ona tatou suʻe ma faitau mau faasino ma sauni e fai i ai se manatu. Pe a auai i sauniga, e ao ona mulimuli i a tatou Tusi Paia a o faitau e le failauga mau. O le aʻoaʻoina o mau o le Tusi Paia, e saunia ai i tatou e “talaʻitonuina le upu moni.”—2 Timo. 2:15.
3 Ia Faitau le Tusi Paia: A o auai i le faiva, ia tatou faitau atu le Tusi Paia. O se faaaʻoaʻoga pe a fetaui le tulaga o mea, ia tatou taumafai e faitau ma faamatala atu se mau i lē ona le fale. A iai se fesili pe faatulaʻi mai sona manatu tetee, e sili atu ona faaaogā le Tusi Paia e avatu ai se tali. Pe a pisi lē ona le fale, e tatou te ono faamatilatila se manatu faale-Tusi Paia i le faapea atu: “A o oʻu leʻi alu, seʻi oʻu faitau atu le mau lea e tasi.” Pe a talafeagai, ia faitau saʻo le mau mai le Tusi Paia, lea o le a mulimuli mai ai lē o loo faalogologo a o e faitau.
4 Ina ua faaali atu i lē ona le fale ni mau e faamaonia ai le sesē o le Tolutasi, na ia faapea mai: “Na ou auai i le lotu i loʻu olaga atoa ma ou te taʻu saʻo atu lava, ou te leʻi iloa o le mea lenei o loo taʻua i le Tusi Paia!” Na ia talia fiafia se suʻesuʻega faale-Tusi Paia. Na fetalai Iesu o le a faalogo ana mamoe i lona siʻufofoga. (Ioa. 10:16, 27) O le auala sili e iloa ai e tagata loto faamaoni le upu moni, o le vaai saʻo lea i ai mai le Tusi Paia. O lea, seʻi avea nei i tatou ma ē lagolagoina le Afioga a le Atua, o le upu moni lea!