‘Tausia i Upu o le Faatuatua’
1 E manaʻomia ona finafinau ina ia faaalia le amioatua. (1 Timo. 4:7-10) Pe a fai i lo tatou lava malosi, e lē umi ae tatou vaivai ma tautevateva ai. (Isa. 40:29-31) O se tasi o auala e tatou te maua ai le malosi mai iā Ieova, o le ‘tausia i upu o le faatuatua.’—1 Timo. 4:6.
2 E Anoanoaʻi Taumafa Faaleagaga: Ua saunia e Ieova le anoanoaʻi o taumafa faaleagaga, e ala i lana Afioga ma “le auauna faamaoni ma le mafaufau.” (Mata. 24:45) Po o tatou faaaogāina na taumafa faaleagaga? Po o tatou faitau ea i le Tusi Paia i aso taʻitasi? Po o faatulaga se taimi maʻoti mo suʻesuʻega a le tagata lava ia ma mafaufau loloto i ai? (Sala. 1:2, 3) O na taumafa lelei faaleagaga e faamalosia ma puipuia ai i tatou mai āuga leaga o le lalolagi a Satani. (1 Ioa. 5:19) A taulaʻi o tatou mafaufau i mea lelei ma faatatau i o tatou olaga, o le a faatasi Ieova ma i tatou.—Fili. 4:8, 9.
3 E faamalosia foʻi i tatou e Ieova e ala i sauniga a le faapotopotoga. (Epe. 10:24, 25) O faatonuga faaleagaga ma aumea lelei o loo iai, e faamalosia ai i tatou ia tumau e ui i puapuaga. (1 Pete. 5:9, 10) Na faapea mai se talavou Kerisiano: “Ou te alu i le aʻoga i le aso atoa, ma e lagona ai lava le lotovaivai. A o sauniga, ua pei o se lafitaga i le toafa, lea e faafouina ai aʻu ina ia ou fesagaʻia le aʻoga i le isi aso.” Maʻeu le faamanuiaina o i tatou pe a taumafai e auai i sauniga!
4 Folafola Atu le Upu Moni: Sa avea le talaʻiga e pei o se meataumafa iā Iesu. Sa ia maua ai le malosi. (Ioa. 4:32-34) E faapena foʻi pe a tatou talanoa atu i isi i folafolaga mataʻina a le Atua, e faafouina ai i tatou. O le toʻaʻaga e talaʻi, e taulaʻi atu ai pea o tatou loto ma mafaufau i le Malo, ma faamanuiaga e lē o toe mamao ae oo mai. E mautinoa e faafouina ai i tatou.—Mata. 11:28-30.
5 Maʻeu le faamanuiaina o i tatou ona o le anoanoaʻi o taumafa faaleagaga ua saunia e Ieova mo ona tagata i aso nei! Ia faaauau ona tatou alalaga fiafia i ona viiga.—Isa. 65:13, 14.