Pusa Fesili

◼ O ā ni lamatiaga o le faaaogā o le Initaneti e fesootaʻi ai i se tasi e tatou te lē masani?

Ua fuafuaina le tele o polokalame mo fesootaʻiga i le komepiuta (Web site) mo tagata ina ia feiloaʻi ma fesootaʻi ai ma isi i luga o le Initaneti. O le tele o nei polokalame ua mafai ai e tagata taʻitoʻatasi ona faailoa mea e uiga iā i latou lava i luga o le Initaneti, atonu e aofia ai ata ma isi faamatalaga e patino iā i latou. Ma pe a faitau i ai isi, o le a mafai loa ona latou faafesootaʻia na tagata. O le toʻatele o talavou ua fiafia i nei polokalame, e oo foʻi i talavou o loo i faapotopotoga, ua latou faaaogā nei polokalame e fesootaʻi ai ma isi tagata o ē faapea mai o ni Molimau a Ieova.

E faigofie lava ona nanā e se tasi o loo tatou fesootaʻi i luga o le Initaneti, po o ai moni o ia, ae o ā foʻi māfuaaga ua fiafia mai ai iā i tatou. Ma e tatou te lē iloa foʻi po o ia o se tagata e alofa moni iā Ieova. (Sala. 26:4) E ono faapea mai se tasi o ia o se Molimau a Ieova ae o le mea moni, e lē talitonu iā Ieova. Atonu o sē o loo faateʻaina ma le faapotopotoga, ia po o ia foʻi o se tasi ua liliu ese mai le upu moni ma o loo taumafai malosi e faasesēina i tatou. (Kala. 2:4) Ua lipotia foʻi, o le toʻatele o i latou o ē faaleagaina fanau i amioga matagā e masani ona latou faaaogā na polokalame e suʻe ai tamaiti.

E tusa lava po ua tatou mautinoa o i latou o loo tatou fesootaʻi i ai o loo lelei lo latou tulaga i le faapotopotoga, ae o talanoaga e faia i na auala o fesootaʻiga e faigofie lava ona taʻitaʻiina atu ai tatou i le faia o amioga lē mamā. Talu ai, ua lē faaeteete nisi tagata i a latou talanoaga ma ē e lē o fesagaʻi tonu atu i ai. O nisi atonu ua manatu o nei fesootaʻiga o loo fai i se tulaga faalilolilo, ma o le a lē mafai ona iloa fua e isi, e pei o o latou mātua po o toeaina, mea o loo latou talanoa ai. Ae faanoanoa lava, o nisi talavou i le faapotopotoga ua lolo atu i nei mea ma ua faia faamatalaga masoā. (Efe. 5:3, 4; Kolo. 3:8) O nisi, ua latou tuu i ai o latou ata ma o latou igoa o loo aliali ai uiga faatosina i amioga matagā, po o le tuu foʻi i ai o ata pese vitiō i nei lava amioga matagā i le Initaneti ina ia matamata ai isi.

Ua tatou iloa mai i inei, e tatau i mātua ona tilofaʻia lelei le auala o loo faaaogā ai e fanau le Initaneti. (Faata. 29:15) O se lamatiaga pe afai tatou te valaaulia se isi tatou te lē masani ai i totonu o o tatou fale, po o le faataga foʻi o ia e nonofo na o i latou ma le fanau. E faapena foʻi ona avea ma lamatiaga iā i tatou, po o a tatou fanau, le faauō atu i tagata e lē masani i le Initaneti, e tusa lava pe faapea mai na tagata o latou o ni Molimau a Ieova.—Faata. 22:3.