Aua le Taofia le Talaʻi Atu

1. O le ā e manaʻomia ai le lototele, ma aiseā?

¹ Pe na iai se taimi na taofia ai oe mai i le talaʻi atu i le aʻoga, ona o lou fefe neʻi ula mai nisi iā te oe? E manaʻomia le lototele e tautala atu ai, aemaise lava pe afai e te matamuli. O le ā o le a fesoasoani iā te oe?

2. E faapefea ona faaalia le mafaufau lelei pe a molimau atu i le aʻoga?

² Faaaogā le Mafaufau Lelei: E ui e mafai ona avea le aʻoga o lau oganuu patino, ae e lē o taimi uma e mafai ai ona e talanoa i mea faaleagaga i tagata uma e feiloaʻi i ai, e pei ona e faia mai i lea fale i lea fale. Ia faaaogā le mafaufau lelei pe a fuafua e talaʻi atu. (Fai. 3:1, 7) O se mataupu e talanoaina i le aʻoga, e mafai ona maua ai se avanoa e faaalia atu ai ou talitonuga. Pe atonu foʻi e fesiligia oe e se tasi o tamaiti aʻoga, i le māfuaaga ua lē faia ai sau vaega i ni mea o loo fai. O nisi Kerisiano, e latou te faamatala atu i faiaʻoga i le amataga o le tausaga faaleaʻoaʻoga, o i latou o Molimau a Ieova, ma tuuina atu lomiga i faiaʻoga e faamatala ai o tatou talitonuga. O nisi e latou te tuuina lomiga i luga o a latou kesi, ina ia lāgā ai ni fesili mai i tamaiti o le aʻoga.

3. E faapefea ona sauniuni e avatu se molimau i le aʻoga?

³ Ia Nofosauni: Afai e te sauniuni, o le a faateleina lou mautinoa. (1 Pete. 3:15) O lea, ia taumafai e manatunatu i ni fesili e ono lāgā ma mafaufau pe faapefea ona tali atu. (Faata. 15:28) Pe a talafeagai, ia tuu i le aʻoga lau Tusi Paia ma ni nai lomiga, e pei o le tusi o le Reasoning, ma le tusi Fesili ua Fesili Mai ai Talavou, ma lomiga e faatatau i le foafoaga, ina ia mafai ona e faaaogā pe a manaʻomia. Ia talosaga atu i ou mātua e faaaofia ai ni faataʻitaʻiga, a o faia la outou tapuaʻiga faaleaiga.

4. Aiseā e tatau ai ona faaauau pea ona e molimau atu i le aʻoga?

⁴ Ia Mautinoa: Aua e te manatu faapea o le a tauemu mai au uō i le aʻoga i taimi uma lava e te taʻua ai le upu moni. O nisi atonu e iʻu ina latou viia oe ma fia faalogo. Aua e te lotovaivai pe a lē tali lelei mai se tasi. O le a fiafia Ieova i au taumafaiga. (Epe. 13:15, 16) Ia faaauau ona e talosaga atu iā Ieova e fesoasoani iā te oe e ʻtautala atu ai pea ma le lototele.’ (Galu. 4:29; 2 Timo. 1:7, 8) Sei manatu i lou olioli pe a faalogo mai se tasi iā te oe. Atonu o le a avea lenā tagata ma auauna a Ieova!