Ua Faatumu Sau Pepa?

O le ā le pepa? O le pepa o le toto ua saunia mo Molimau ua uma ona papatiso. Talu ai, e “tou te lē iloa le mea o le a tupu iā te outou a taeao,” o lea e matuā tāua ai lava lou muaʻi filifili ma tusi i lalo po o ā togafitiga faafomaʻi e te taliaina pe a tupu se faalavelave faafuaseʻi. (Iako. 4:14; Galu. 15:28, 29) Ua saunia le vitiō Transfusion-Alternative Health Care—Meeting Patient Needs and Rights e fesoasoani iā te oe i lau filifiliga. Ia matamata i le vitiō ma tatalo e tusa o lau filifiliga o le a fai, faatasi ai ma le fesoasoani mai o fesili o loo taʻua i lalo.—Mātau: Talu ai e iai ni vaaiga pupuu i lenei vitiō o loo faia ai ni taotoga, o lea e ao ai i mātua ona iloilo pe talafeagai ona matamata ai le fanau laiti.

(1) Aiseā ua toe iloilo ai e isi fomaʻi le tuiina o toto i taimi o togafitiga faapea ma taotoga? (2) Faamatala mai ni faaaʻoaʻoga se tolu o taotoga faigatā lea e leʻi faaaogāina ai le toto. (3) E toʻafia ni fomaʻi i le lalolagi ua malilie e faia ni taotoga e lē faaaogāina ai le toto? Aiseā ua latou malilie ai e faia faapea? (4) O le ā ua faaalia i suʻesuʻega lata mai nei a falemaʻi e tusa o le faaaogāina o le toto? (5) O ā ni lamatiaga e maua mai i le faaaogāina o le toto i togafitiga? (6) O le ā ua iloa e nisi fomaʻi popoto e tusa o le aogā o togafitiga e lē tuiina i ai se toto ae faaaogā nisi faiga? (7) O le ā e māfua ai le vaivai o le toto o se tagata? O le ā le tele e mafai ai e tagata ona gafatia le toto vaivai? O le ā se togafitiga faafomaʻi e avatu i le tagata e vaivai lona toto? (8) E faapefea ona faatupu sela mūmū i le tino o se tagata maʻi? (9) O ā ni auala ua faaaogā e faaitiitia ai le alu o le toto a o fai le taotoga? (10) Pe e aogā togafitiga e lē faaaogā ai le toto i tamaiti laiti, faapea foʻi tagata ua aafia i ni faalavelave faafuaseʻi ua lamatia ai le ola? (11) O le ā se taʻiala autū e tusa o togafitiga lelei faafomaʻi? (12) Aiseā e tāua ai i Kerisiano ona muaʻi faia se filifiliga e tusa ai ma togafitiga e lē faaaogā ai le toto? E faapefea ona muaʻi faia se filifiliga?

E iā te oe lava le filifiliga e tusa ma lou lotofuatiaifo ua aʻoaʻoina i le Tusi Paia, pe talia ni togafitiga na faaalia i le vitiō. Po ua fai sau filifiliga po o ā togafitiga ma taotoga e te talia pe afai e manaʻomia e oe ma lau fanau, ma faatumu loa ma le pepa o le toto? Mo se iloiloga māeʻaeʻa o lenei mataupu, autalu le mataupu e 7 o le tusi ‘Alofa o le Atua’ ma faamatalaga o loo taʻua ai. Tagaʻi foʻi i le faaopoopoga o La Tatou Faiva o le Malo o Novema 2006, i le mataupu “O le ā Laʻu Filifiliga e Tusa o Vaega Ninii o le Toto ma Togafitiga e Faaaogā ai Loʻu Toto?” O le manatu mulimuli, ia mautinoa ua saʻo ona tusia uma au filifiliga i lau pepa o le toto. E ao ona logo ē ua saini i lau pepa, po o ē e faafesootaʻi i se faalavelave faafuaseʻi ma so o se tasi o ou tauaiga lē molimau ia malamalama i lau filifiliga.

[Pusa i le itulau 3]

• Po ua fai sau filifiliga po o ā togafitiga ma taotoga e te talia pe afai e manaʻomia e oe ma lau fanau?

• Po o e alu ma feaveaʻi se pepa o le toto ua uma ona faatumu neʻi teʻi ua tupu se faalavelave faafuaseʻi?