Po ua E Nofosauni mo se Faalavelave e Tupu Faafuaseʻi?

E mafai ona tupu faafuaseʻi se faalavelave ma e aunoa ma ni lapataʻiga. (Iako. 4:14) O lea la, o le tagata e iai le utaga mamao e nofosauni i taimi uma. (Faata. 22:3) Po ua e filifilia ma tusi i lalo ni togafitiga faafomaʻi e te taliaina? Ua saunia le vitiō Transfusion-Alternative Health Care—Meeting Patient Needs and Rights, o le vaega lona lua o le vitiō Transfusion-Alternatives—Documentary Series, ina ia fesoasoani iā te oe. A o e matamata i le vitiō, vaai pe mafai ona e taliina fesili o loo mulimuli mai. Talu ai o loo aofia i le vitiō ni vaaiga pupuu o taotoga, o lea e tatau ai i mātua ona faaaogā le utaga mamao pe a maimoaina faatasi ma fanau lāiti.

(1) Aiseā ua toe iloilo ai e nisi fomaʻi le tuiina o le toto i taimi o togafitiga ma taotoga? (2) Faamatala mai ni faaaʻoaʻoga se tolu o taotoga faigatā lea e leʻi faaaogāina ai le toto. (3) Aiseā ua lotomalilie ai le faitau afe o fomaʻi i le lalolagi aoao e faia taotoga e lē faaaogāina ai le toto? (4) O le ā ua faaalia i suʻesuʻega lata mai nei a falemaʻi e tusa ai o le faaaogāina o le toto? (5) O ā ni lamatiaga e maua mai i le faaaogāina o le toto i togafitiga? (6) O le ā ua iloa e nisi fomaʻi popoto e tusa ai o le aogā o togafitiga e lē tuiina ai se toto ae faaaogā nisi togafitiga? (7) O le ā e māfua ai le vaivai o le toto o se tagata, ma o le ā se togafitiga faafomaʻi e fai i se tagata e vaivai lona toto? (8) E faapefea ona faatupu sela mūmū i le tino o se tagata maʻi? (9) O ā ni auala ua faaaogā e faaitiitia ai le alu o le toto a o fai le taotoga? (10) Pe e aogā i tamaiti lāiti po o tagata ua aafia i ni faalavelave faafuaseʻi ua lamatia ai le ola, ia togafitiga e sui ai tuigātoto? (11) O le ā se taʻiala autū e tusa ai o togafitiga lelei faafomaʻi?

Talu ai ua iā te oe le filifiliga e tusa ma lou lotofuatiaifo e talia ai ni togafitiga na faaalia i le vitiō, ia aua lava neʻi faatali seʻiloga e tupu se faalavelave faafuaseʻi ona faatoʻā iloilo lea o le mea e fai ma le mea e lē faia. O loo taʻua i le mataupu e 7 o le tusi ʻAlofa o le Atua’ faapea le faaopoopoga o La Tatou Faiva o le Malo o Novema 2006, faamatalaga o le a fesoasoani iā te oe e faia ai ni filifiliga e tusa ma le mea ua e aʻoaʻoina mai i le Tusi Paia. O lea, pe afai ua e papatiso, ia tusia lau faaiʻuga i le pepa o le toto, ma ia alu ma feaveaʻi lau pepa i taimi uma.

[Faamatalaga faaopoopo i le itulau 5]

Po ua e filifilia ma tusi i lalo ni togafitiga faafomaʻi e te taliaina?