Ua Faatumu Sau Pepa?

O le ā le pepa? O le pepa Faatonuga/Tuusaunoaina Faafomaʻi ua Muaʻi Saunia, lea ua saunia mo Molimau papatisoina. Talu ai, e “tou te lē iloa le mea o le a tupu iā te outou a taeao,” o lea e matuā tāua ai lava lou muaʻi filifili ma faamaumauina po o ā togafitiga faafomaʻi e te taliaina pe a tupu se faalavelave. (Iako. 4:14; Galu. 15:28, 29) Ua saunia le vitiō Transfusion-Alternative Health Care—Meeting Patient Needs and Rights, e fesoasoani ai iā te oe i lau filifiliga. Ia matamata i le vitiō ma tatalo e tusa o lau filifiliga o le a fai, faatasi ai ma le fesoasoani mai o fesili o loo taʻua i lalo.—Mātau: E tele ni vaaiga i lenei vitiō e faia ai ni taotoga, o lea e ao ai i mātua ona iloilo pe talafeagai mo le fanau laiti.

(1) Aiseā ua toe iloilo ai e isi fomaʻi le tuiina o toto i taimi o togafitiga faapea ma taotoga? (2) Faamatala mai ni faaaʻoaʻoga se tolu o taotoga faigatā lea e lē faaaogāina ai le toto? (3) I le lalolagi, e toʻafia fomaʻi ua malilie e faia taotoga e lē faaaogā ai le toto? Aiseā ua malilie ai e faia faapena? (4) O le ā ua faaalia mai i suʻesuʻega lata mai nei a falemaʻi e tusa o le faaaogāina o le toto? (5) O ā ni lamatiaga e maua mai le faaaogāina o le toto i togafitiga? (6) O le ā ua iloa e nisi fomaʻi popoto e tusa o le aogā o togafitiga e lē tuiina ai se toto? (7) O le ā ua māfua ai le vaivai o le toto o se tagata? O le ā le tele e mafai ai e tagata ona gafatia le toto vaivai? O le ā se togafitiga faafomaʻi e avatu i le tagata e vaivai lona toto? (8) E faapefea ona faatupu sela mumū i le tino o se tagata maʻi? (9) O ā ni auala ua faaogā e faaitiitia ai le alu o le toto a o fai le taotoga? (10) Pe e aogā togafitiga e lē faaaogā ai le toto i tamaiti laiti, faapea foʻi tagata ua aafia i ni mea tutupu faafuaseʻi? (11) O le ā se taʻiala autū e tusa o togafitiga lelei faafomaʻi? (12) Aiseā e tāua ai i Kerisiano ona muaʻi faia se filifiliga e tusa ai ma togafitiga e lē faaaogā ai le toto? E faapefea ona muaʻi faia se filifiliga?

E iā te oe lava le filifiliga e tusa ma lou lotofuatiaifo ua aʻoaʻoina i le Tusi Paia, pe talia ni togafitiga na faaalia i le vitiō. Po ua fai sau filifiliga po o ā togafitiga ma taotoga e te talia pe afai e manaʻomia e oe ma lau fanau? Tagaʻi i le mataupu “Fesili mai le ʻAufaitau i Le Olomatamata o Iuni 15, 2004, ma le Oketopa 15, 2000, faapea le faaopoopoga o La Tatou Faiva o Novema 2006, i le ulutala, “O le ā Laʻu Filifiliga e Tusa o Vaega Ninii o le Toto ma Togafitiga e Faaaogā ai Loʻu Toto?” E tāua lou malamalama ma filifili i nei mea ma faafesootaʻi i tagata e ao ona faafesootaʻi, o ē ua saini i lau pepa, ma isi tagata o lou aiga e lē Molimau, aemaise neʻi faafuaseʻi ona e malaga i fafo mo togafitiga.