Faaalia o lo Tatou Lotofaafetai mo le Meaalofa Sili Mai le Atua
1. Aiseā e tatou te matuā lotofaafetai ai iā Ieova?
1 I le tele o “meaalofa lelei” mai iā Ieova, e silisili ai le togiola na saunia e lona Alo pele. (Iako. 1:17) Ua mafai ai ona maua le tele o faamanuiaga, e aofia ai le faamagaloina o a tatou agasala. (Efe. 1:7) E lē aunoa la ona tatou lotofaafetai ona o lenei mea. A o faagasolo le vaitau o le Faamanatuga, o le a faapitoa ona tatou faaalu se taimi e manatunatu loloto ai i lenei meaalofa tautele.
2. E faapefea ona tatou atiaʻe i o tatou aiga ma i tatou lava le talisapaia mo le togiola?
2 Ia Atiaʻe le Talisapaia: Ina ia atiaʻe la e lou aiga le talisapaia i vaiaso a o agaʻi atu i le Faamanatuga iā Mati 30, aiseā e lē faaaogā ai se taimi i le afiafi o la outou Tapuaʻiga a le Aiga e autalu ai faamatalaga e faatatau i le togiola? E lē gata i lea, ia iloilo i aso taʻitasi le faitauga Tusi Paia faapitoa mo le Faamanatuga. Ia mafaufau le tagata lava ia i le auala ua aogā ai le togiola iā te oe ma aafia ai ou manatu e uiga iā Ieova, iā te oe, o isi, ma le lumanaʻi. Atonu foʻi e aogā mo i tatou ona amata faaaʻoaʻo le usuina o pese e lua lea o le a faaaogā i le Faamanatuga, le pese numera 66 (87) ma le 9 (11).—Sala. 77:12.
3. O le ā se auala e faaalia ai lo tatou lotofaafetai?
3 Auala e Faaalia ai le Lotofaafetai: O le talisapaia o le togiola o le a uunaʻia ai i tatou e taʻu i isi e faatatau iā Ieova ma le tele o lona alofa i le auina mai o lona Alo. (Sala. 145:2-7) A o faagasolo Mati, Aperila, ma Me, o le a faaalia e nisi aiga lo latou lotofaafetai e ala i le faatulaga mo se tagata pe ā ma le toʻatasi o le aiga e paeonia lagolago. Afai e lē mafai lea faiga, pe e mafai ona “outou faatau mai le taimi” e faateleina ai le faia o sou sao i le faiva? (Efe. 5:16, fpl) O le lotofaafetai foʻi e uunaʻia ai i tatou e fesoasoani i isi ia tatou auai faatasi i le Faamanatuga. (Faaa. 22:17) Ia amata loa ona fai se lisi o toe asiga, o suʻesuʻega faale-Tusi Paia, o tauaiga, o ē tou te faigaluega faatasi, ma tuaoi e valaaulia, ona fai lea o le mea sili e mafai e lagolago ai le tufaina atu o valaaulia o le Faamanatuga.
4. O le ā se tasi o auala tatou te faaaogā ai ma le atamai le vaitau o le Faamanatuga?
4 E tele avanoa e maua i le vaitau o le Faamanatuga e faailoa atu ai iā Ieova le tele o lo tatou talisapaia o lana meaalofa mo le fanau a tagata. Tau ina ia tatou faaaogā lenei taimi e faateleina ai ma faailoa atu lo tatou lotofaafetai mo le togiola ma le tele o “oloa e lē masuʻesuʻeina a Keriso.”—Efe. 3:8.