Po o le a E Faaaogā Tatau le Avanoa?
Faaalia le Lotofaafetai i le Vaitaimi o le Faamanatuga
1. O le ā le avanoa faapitoa o le a tatou maua i le vaitaimi o le Faamanatuga?
1 O le Faamanatuga iā Aperila 14 o le a tatou maua ai se avanoa faapitoa e atiaʻe ma faaalia ai le lotofaafetai mo le agalelei o Ieova. O le tala o loo i le Luka 17:11-18, ua faailoa mai ai le silafaga a Ieova ma Iesu i le faaalia o le lotofaafetai. E faanoanoa ona e toʻatasi lava le lepela na ia faaaogā tatau le avanoa e faaalia atu ai lona lotofaafetai. I le lumanaʻi, o le a mafai e le togiola a Iesu ona aveesea atoatoa ai maʻi ma tatou maua ai le ola e faavavau. E mautinoa la o le a tatou faafetaia Ieova i lenā taimi mo na faamanuiaga. Ae faapefea ona tatou faaalia le lotofaafetai i vaiaso o lumanaʻi nei?
2. E faapefea ona atiaʻe lo tatou lotofaafetai mo le togiola?
2 Faaalia le Lotofaafetai: O faalogona o le lotofaafetai e sau mai i o tatou mafaufau. E mafai ona tatou atiaʻe le lotofaafetai mo le togiola a Iesu, e ala i le faia o le faitauga Tusi Paia mo le Faamanatuga. E maua le faasologa mo lenā faitauga Tusi Paia i nisi o a tatou lomiga, e pei o le tusi Iloiloina Tusitusiga Paia i Aso Taʻitasi, le kalena, ma le faaopoopoga B12 i le Tusi Paia New World Translation lea ua toe teuteuina. Aiseā e lē iloiloina ai e lou aiga lenā faasologa? O le faia faapea, o le a atili ai ona tatou talisapaia le taulaga togiola, ma o le a iai se aafiaga lelei i o tatou manatu ma gaoioiga.—2 Kori. 5:14, 15; 1 Ioa. 4:11.
3. E faapefea ona tatou faaalia le lotofaafetai?
3 Faaalia le Lotofaafetai: E faaalia le lotofaafetai e ala i gaoioiga. (Kolo. 3:15) Sa faia e le lepela lotofaafetai taumafaiga uma ina ia saʻilia Iesu ma faafetai i ai. E mautinoa foʻi na ia faamatala atu ma le fiafia i isi le faamālōlōina o ia. (Luka 6:45) Po o le a avea lo tatou lotofaafetai mo le togiola, e uunaʻia ai i tatou e faia se sao maelega i le faalauiloaina atu o le Faamanatuga? O se tasi o auala e faaalia ai le lotofaafetai o le avea ma paeonia lagolago, po o le faateleina o so tatou sao i le faiva i le vaitaimi o le Faamanatuga. I le pō o le Faamanatuga, o lo tatou lotofaafetai o le a tatou faafeiloaʻia ai i latou o le a auai mai, ma faaavanoa atu i tatou lava e tali nisi o a latou fesili.
4. O le ā e lē tatau ona tatou faia i le vaitaimi o le Faamanatuga?
4 Po o la tatou Faamanatuga mulimuli lenei? (1 Kori. 11:26) E tatou te lē iloa. Peitaʻi, e pau le mea ua tatou iloa e lē tatau ona tatou faamaʻimau lenei avanoa faapitoa e faaalia atu ai le lotofaafetai. O lea, po o le a e faaaogā tatau lenei avanoa? Seʻi tau ina avea pea upu o o tatou gutu ma manatunatuga o o tatou loto, ma mea e faafiafiaina ai Ieova, o Lē na auina mai lona Alo e saunia le togiola.—Sala. 19:14.