Tauaofiaga Itumalo—O se Taimi e Tapuaʻi ai ma le Fiafia

1. E faapefea ona talitutusa tausamiga sa faia e Isaraelu ma a tatou tauaofiaga itumalo i aso nei?

¹ Sa lē aunoa ona malaga Iosefa, Maria, ma le la fanau, i Ierusalema e auai i se tausamiga faaletausaga. I taimi o nei faatasiga, e latou te taumafai, faapena foʻi ma isi tagata tapuaʻi e faatuatuanaʻi i o latou faafitauli e masani ai o le olaga ae taulaʻi atu i vala tāua faaleagaga o o latou soifuaga. O taimi o tausamiga latou te maua ai avanoa e manatunatu ai ma talanoa i mea lelei ua faia e Ieova ma e iloilo ai lana Tulafono. O a tatou tauaofiaga itumalo o loo loma nei o le a tatou maua ai avanoa faapena e tapuaʻi fiafia ai iā Ieova.

2. O ā mea e ao ona tatou fai e sauniuni ai mo le tauaofiaga itumalo o loo loma nei?

² E Manaʻomia Ona Sauniuni: O le faimalaga mai Nasareta sa manaʻomia ai ona savavali le aiga o Iesu mo le mamao e 120 maila (200 kilomita) le ō ma toe foʻi mai. E ui tatou te lē iloa pe toʻafia uso ma tuafafine o Iesu sa iai, e mafai ona tatou taumānatu i le tele o sauniuniga ma taumafaiga sa faia e Iosefa ma Maria. Po ua fai ni au sauniuniga ina ia auai i aso uma e tolu o le tauaofiaga o loo loma nei? E ono manaʻomia ai le ave o ni aso mālōlō mai le galuega po o le talanoa i lou pule i le galuega po o le faiaʻoga o lau tama ina ia faanoi se taimi e auai i le tauaofiaga. Ua faatonu se faletalimālō e te api ai pe a manaʻomia ona faia faapea? Po o e taulamua e fesoasoani i se tasi o le faapotopotoga e iai ni manaʻoga faapitoa ina ia auai i le tauaofiaga?—1 Ioa. 3:17, 18.

3. Na faapefea ona maua i tausamiga a Isaraelu ia avanoa mo aufaatasiga e faalaeiauina ai?

³ Aufaatasiga e Faalaeiauina Ai: Sa avea taimi o tausamiga a Iutaia o ni avanoa mo aufaatasiga e faalaeiauina ai faatasi ma isi aumea tapuaʻi! E lē taumatea sa tulimataʻi e le aiga o Iesu le avanoa e faatasitasi ai ma uō na valavala i aso e tele. Sa latou olioli foʻi i avanoa e fai ai ni uō fou mai i le toʻatele o Iutaia ma tagata ese liulotu o le a auai pe malaga faatasi foʻi i Ierusalema ma toe foʻi mai.

4. E faapefea ona tatou faailoa atu e tatou te faatāuaina lo tatou ʻauuso autasi faa-Kerisiano?

⁴ O se tasi o māfuaaga ua faatulaga ai e le pologa faamaoni ma le faautauta ina ia tatou tauaofia faatasi e faalogo i lauga i le tauaofiaga itumalo nai lo le saunia o faamatalaga lava nei e ala mai i lomiga, ina ia tatou faalaeiau ai le tasi i le isi. (Epe. 10:24, 25) O le mea lea, ia fai fuafuaga e vave taunuu i le tauaofiaga i aso taʻitasi ina ia olioli ai i faatasitasiga ma isi a o leʻi faasilasilaina mai e le taʻitaʻifono ia le musika lea e iloa ai ua tatau ona nofoi mo le amataina o le polokalame. Nai lo le alu ese atu e faatau mai sau taumafataga, e matou te faalaeiau atu ina ia aumai sau taumafataga māmā mo le aoauli ma nofo ai pea i le nofoaga e fai ai le tauaofiaga ina ia tatou feiloaʻi ma talanoa ma isi o le a iai i inā. O lo tatou ʻauuso autasi faa-Kerisiano o se meaalofa mai iā Ieova e ao lava ona tatou faapelepele i ai.—Mika 2:12.

5. O le ā e fesoasoani iā i tatou ina ia maua atoatoa aogā mai le polokalame?

⁵ O se Taimi e Aʻoaʻoina Ai: Mai lava a o talavou, sa faaaogā e Iesu taimi o tausamiga e aʻoaʻoina ai mea e uiga i lona Tamā i le lagi. (Luka 2:41-49) O le ā e fesoasoani iā i tatou ma o tatou aiga ina ia maua atoatoa aogā mai i vaega o le a talanoaina? A o faagasolo le polokalame, ia nofoi pea ma ʻalofia le soona talanoa e aunoa ma se māfuaaga. Aua neʻi avea lau telefoni feaveaʻi, po o se pager, po o se isi masini faapena e faalavelaveina oe po o isi. Ia taulaʻi lau vaai i le failauga, ma fai ni nai faamaumauga pupuu. Ia nonofo faatasi o se aiga ina ia faamautinoa ai o loo faalogo lelei foʻi lau fanau. A oo i le afiafi, faaalu sina taimi e talanoaina faatasi ai manatu na e fiafia ai.

6. O le ā e ao ona teu i o tatou manatu e faatatau i o tatou lāʻei ma foliga vaaia?

⁶ Lāʻei ma Foliga Vaaia: Sa faigofie lava i le ʻaufaioloa o nuu ese sa malaga ai i le auala ona mātaulia le aiga o Iesu ma isi tagata Iutaia tapuaʻi sa malaga agaʻi i tausamiga ma toe foʻi mai, ona o fele i pito i lalo o o latou ofu ma le manoa lanu moana i luga aʻe o le fele. (Nu. 15:37-41) E ui lava e lē ofuina e Kerisiano ni ofu faapitoa, e lauiloa i tatou i lāʻei talafeagai ma le onomea ma mamā. E ao ona tatou uaʻi faapitoa i o tatou foliga vaaia pe a malaga i le tauaofiaga ma toe foʻi mai, ma le taimi a o iai i le aai e fai ai le tauaofiaga. E tusa foʻi pe sui o tatou ofu pe a māeʻa le polokalame, e ao lava ona tumau o tatou foliga onomea ma ia fai pea a tatou pine o le tauaofiaga. O le faia faapea o le a matilatila atu ai lo tatou ese mai i ē e lē o ni Molimau ma avatu ai se molimau lelei i ē o loo vaavaai mai.

7. Aiseā e ao ai ona tatou manatunatu e tauofo e galue i le tauaofiaga?

⁷ E Manaʻomia se ʻAutauofo: E toʻatele se ʻaufaigaluega e manaʻomia ina ia sologa lelei le faagaoioia o le tauaofiaga. Pe e mafai ona e tauofo e fesoasoani? (Sala. 110:3) O galuega e fai i tauaofiaga o se vaega o la tatou auaunaga paia ma e avatu ai se molimau lelei. Na matuā faagaeetia se pule o se fale sa faia ai se tauaofiaga ona o le ʻautauofo na faamāmāina le nofoaga, ona tusi mai lea: “Ou te manaʻo e fia faafetai tele atu ona o se faatasiga na ou matuā maofa ai ou te leʻi molimauina muamua se mea faapea. E tele taimi sa ou faalogo ai e uiga i Molimau a Ieova o ni tagata faapitoa i lo latou talaaga lelei i so o se nofoaga faapenei ona o le lelei o le auala latou te faamamāina ai se nofoaga. O outou ma la outou faalapotopotoga ua outou faia lenei fale ma nofoaga sili ona lelei mo le nuu, ma sa outou faia ma se vaega o tagata sili ona tauagafau lea sa matou maua le faaeaga e faamasani i ai.”

8. O ā avanoa e molimau atu ai a o tatou iai i le vaipanoa e fai ai le tauaofiaga?

⁸ Avanoa e Molimau Atu Ai: E toʻatele tagata i le aai e fai ai le tauaofiaga o le a mātaulia tagata asiasi atu e lāʻei onomea ma foliga mamā, e fai a latou pine o le tauaofiaga, ma e ono faaosofia ai lo latou naunau fia iloa, e maua ai le avanoa mo i tatou e faamatala ai i ai le tauaofiaga. Na ave e se tamaitiiti e fā tausaga ina ua uma le polokalame i se faleʻaiga lana kopi o le lomiga na tatala i le tauaofiaga ma faaali i se tamaʻitaʻi e faigaluega ai. Na maua ai le avanoa mo mātua o le tamaitiiti e valaaulia le fafine i le tauaofiaga.

9. E faapefea ona tatou faataʻitaʻi i uiga faaalia o le aiga o Iesu e faatatau i sauniuniga faaleagaga mai iā Ieova?

⁹ O tausamiga anamua o ni taimi fiafia sa tepa taulaʻi i ai tagata Iutaia sa mananaʻo e aʻoaʻoina atili mea e faatatau iā Ieova. (Teu. 16:15) Sa fiafia le aiga o Iesu po o le ā lava le faatulagaga sa manaʻomia ona fai ina ia auai ma maua atoatoa aogā. E faapena foʻi lo tatou talisapaia o loo iai i a tatou tauaofiaga itumalo, e vaai i ai o se meaalofa mai lo tatou Tamā alofa i le lagi. (Iako. 1:17) O le taimi lenei e sauniuni ai mo lenei avanoa faaletausaga mo tagata tapuaʻi fiafia o Ieova!

[Pusa i le itulau 7]

Mea e Faamanatu mo le Tauaofiaga Itumalo

◼ Taimi o le Polokalame: E amata le polokalame i le 9:20 i le taeao i aso uma e tolu. O le a tatala faitotoʻa i le 8:00 i le taeao. E tatau ona faasilasila mai le musika e amata ai le polokalame, ae ua tatou nofoi uma i o tatou nofoa ina ia aua neʻi toe iai se mea e gāsē, ma amata ai le polokalame i se tulaga mamalu. O le a faaiʻuina le polokalame o le Aso Faraile ma le Aso Toonai i le 4:55 i le afiafi, ae o le Aso Sa o le 3:40 i le afiafi.

◼ Paka o Taavale: I nofoaga uma o le a faia ai tauaofiaga, lea e tatou te pulea foʻi ma vaega e paka ai taavale, o le a maua e le ʻauusufono se paka e aunoa ma se totogi, ma e fuafua lava avanoa i tagata e muamua mai. Talu ai e masani ona utiuti avanoa ma paka, afai e mafai, o se mea lelei le taumafai e malaga faatasi mai ni tagata se toʻatele i se taavale e tasi nai lo le tofu o tagata eseese ma le taavale e malaga mai ai.

◼ Taofia o Nofoa: E mafai ona taofi ni nofoa mo ē na outou faimalaga faatasi i le tou taavale, po o tagata o lo outou aiga e tou te nonofo faatasi, atoa ai ma i latou o loo outou suʻesuʻe.—1 Kori. 13:5.

◼ Taumafataga i le Aoauli: Ia aumai se taumafataga mo le aoauli nai lo le alu ese atu i le mālōlōga o le aoauli e aumai se taumafataga. E mafai ona faaaogā se tamaʻi cooler e mafai ona ofi i lalo o se nofoa. O cooler lapopoʻa, ma ipu mataʻetaʻe, e lē faatagaina i le nofoaga e fai ai le tauaofiaga.

◼ Foaʻi: E mafai ona faaalia lo tatou talisapaia o le tauaofiaga e ala i le faia o ni foaʻi tauofo, mo le galuega i le lalolagi aoao, i o tatou Maota mo Sauniga, po o le taimi o le tauaofiaga.

◼ Faalavelave ma Mea e Tutupu Faafuaseʻi: Pe a tulaʻi mai se manaʻoga faafuaseʻi ona o se gasegase i le taimi o le tauaofiaga, faamolemole faafesootaʻi se tautua o latalata ane, o ia e na te faafesootaʻia vave le Fesoasoani Muamua ina ia mafai ai e o tatou tagata ua iai le poto faapitoa ona iloiloina po o le ā le matuiā o le mea ua tupu ma saunia le fesoasoani. Pe a manaʻomia, o le a vili e le tatou matagaluega mo se fesoasoani. O le faia faapea o le a ʻalofia ai le vili atu o le toʻatele i a latou telefoni feaveaʻi i le matagaluega e gafa ma faalavelave faafuaseʻi i ni mea e lē matuiā.

◼ Seevae: E toʻatele i latou i tausaga taʻitasi e manunuʻa ona e māfua mai i seevae. E sili atu ona lelei le faaaogā ni seevae talafeagai ma fetaui lelei ina ia mafai ai ona e savali saogalemu i faasitepu, ma ni vaega o le auala e ufiufi i ni mea valavala, ma isi mea faapena.

◼ Laau Puʻe Leo: O laau puʻe leo e lē tatau ona sulu i palaka o le nofoaga o fai ai le tauaofiaga pe sulu foʻi i masini faaleotele leo o le tauaofiaga, ma ia aua neʻi faalavelave i isi.

◼ Taavale Toso Pepe ma Nofoa Faamoe: E lē tatau ona avatu i totonu o le nofoaga o le tauaofiaga ia taavale toso pepe po o nofoa faamoe. Ae, e faataga nofoa faapitoa mo le saogalemu o se tamaitiiti, pe afai e mafai ona fusi i se nofoa i autafa o ona mātua. I le tele o tauaofiaga e iai se mea e faaavanoa e faatutū ai taavale pepe.

◼ Fagu Faamanogi: O le tele o tauaofiaga e faia i totonu o fale e iai masini e faasau ai le ʻea i totonu. O lea, ia faaalia le agalelei i le faaitiitia o le faaaogāina o fagu faamanogi ma mea faapena, lea e ono faalētonu ai le mānava a i latou e aafia gofie i mea faapena.—1 Kori. 10:24.

◼ O Pepa Follow Up: E ao ona faaaogā pepa Please Follow Up (S-43) e tusia mai ai ni faamatalaga e faatatau i se tagata na faaalia le fiafia ona o le molimau lē fuafuaina i ai i le taimi o le tauaofiaga. E tatau i tagata talaʻi taʻitoʻatasi ona ave se pepa e tasi pe lua i le tauaofiaga. O pepa ua uma ona faatumu e mafai ona tuuina atu i le Potu Tusi, po o le tuuina atu i le failautusi o la outou faapotopotoga pe a e foʻi atu.—Tagaʻi i La Tatou Faiva o le Malo, o Novema 2009, itulau e 4.

◼ Faleʻaiga: Ia faamamaluina le suafa o Ieova e ala i a tatou amioga lelei i faleʻaiga.

◼ Le Nofoaga E te Āpi Ai: (1) Ia talosaga mo se nofoaga e āpi ai a o leʻi taitai le taimi. (2) Ia fesoasoani i le sauniaina o taumafataga ma feʻau i le fale. (3) Ia ofo atu e te totogia nisi o tupe faaalu a o e nofo i inā. (4) Ia fai au lava fuafuaga i le faimalaga atu ma le toe foʻi mai, mai le nofoaga o le Tauaofiaga. (5) Ia faaali fua o le agaga paia i taimi uma.—Kala. 5:22, 23.

◼ Auaunaga Tauofo: O le fiafia lea tatou te maua mai i le auai i le tauaofiaga o le a faateleina pe a tatou tauofo e fesoasoani i galuega o loo manaʻomia ona fai. (Galu. 20:35) So o se tasi e fia tauofo ia lipoti atu i le Matagaluega o le Auaunaga o ē Tauofo i le tauaofiaga. E mafai foʻi ona fai se sao lelei o tamaiti e i lalo ifo o le 16 tausaga e ala i le galulue faatasi ma mātua po o se tasi e vaaia o ia po o se tagata e faamaonia mai e se tasi o i latou.