Tolu Aso o le Faafouina Faaleagaga
1. O le ā e tatou te faatalitalia e maua mai i le tauaofiaga itumalo i lenei tausaga?
1 I lenei lalolagi a Satani ua galala faaleagaga, o loo faaauau pea ona faafouina e Ieova ana auauna. (Isa. 58:11) O se tasi o sauniuniga ua faaaogā e Ieova e faamalosia ai i tatou, o tauaofiaga itumalo i tausaga taʻitasi. A o lata mai le tauaofiaga o lenei tausaga, e faapefea ona tatou nofosauni e olioli i lenei faafouina faaleagaga?—Faata. 21:5.
2. O ā ni sauniuniga e ao ona tatou faamautūina?
2 Pe afai e te leʻi nofosauni, ia fai nei loa au fuafuaga ma faatulaga ou taimi faigaluega, ina ia e auai i aso uma e tolu o le tauaofiaga. Po ua e fuafua le taimi e tatau ai ona faimalaga i le nofoaga e fai ai le tauaofiaga i aso taʻitasi, ina ia vave taunuu ma maua ni nofoa a o leʻi amataina le polokalame? E mautinoa e tatou te lē mananaʻo e misia so o se vaega o lenei talisuaga e faamalosia ai faaleagaga, ua saunia e Ieova mo i tatou! (Isa. 65:13, 14) Po ua e faia ni fuafuaga mo se nofoaga e api ai, atoa ma femalagaaʻiga?
3. O ā fautuaga o le a fesoasoani iā i tatou ma o tatou aiga, ina ia maua atoatoa ai aogā mai le polokalame?
3 O le ā e fesoasoani iā te oe ina ia uaʻi atu ai a o faagasolo le polokalame? Pe afai e mafai, ia lava le mālōlōga i pō taʻitasi a o faagasolo le tauaofiaga. Ia taulaʻi atu lau vaai i le failauga. Ia suʻe mau uma i lau Tusi Paia. Ia fai ni faamaumauga pupuu. E lelei pe a nonofo faatasi aiga, ina ia mafai e mātua ona fesoasoani i a latou fanau e uaʻi lelei atu. (Faata. 29:15) Atonu e mafai ona outou talanoa i afiafi taʻitasi o se aiga, i ni manatu tāua o le polokalame. Ona faafouina ai pea lea o lou aiga, e tusa lava po ua uma le tauaofiaga. E mafai ona faatulaga se taimi o le Tapuaʻiga a lo outou Aiga, e talanoa ai ni manatu patino e ao ona faatatauina e lou aiga.
4. E faapefea ona tatou fesoasoani i isi i la tatou faapotopotoga, ina ia faafouina faaleagaga?
4 Fesoasoani i Isi ia Faafouina Faaleagaga: E tatou te mananaʻo ia faafouina faaleagaga foʻi isi. Po o iai ni tagata talaʻi ua matutua po o isi i le faapotopotoga, o loo manaʻomia se fesoasoani ina ia auai i le tauaofiaga? Pe e mafai ona e fesoasoani atu iā i latou? (1 Ioa. 3:17, 18) E tatau i toeaina, aemaise lava ovasia o vaega, ona faamautinoa ua maua e na tagata talaʻi le fesoasoani o loo manaʻomia.
5. O le a faapefea ona tatou tufatufa atu tusi valaaulia o le tauaofiaga? (Tagaʻi i le pusa o loo i luga.)
5 E pei o taimi ua mavae, i le tolu vaiaso a o lumanaʻi le tauaofiaga, o le a tatou auai ai i se tauiviga e valaaulia isi ina ia auai. E tatau i faapotopotoga ona faatū se sini ia tufa uma atu a latou tusi valaaulia, ma ia galueaʻiina la latou oganuu i le tele e mafai ai. O tusi valaaulia e totoe a lou aiga pe a māeʻa le tauiviga, e tatau ona aumai i le tauaofiaga, ina ia e faaaogāina pe a molimau lē fuafuaina atu. O nisi faamatalaga e uiga i lenei mea, o le a faailoa atu i le polokalame o le Aso Faraile. O tusi valaaulia e lē faaaogāina e lou aiga, e tatau ona faaoo atu i se tautua pe a taunuu i le maota e fai ai le tauaofiaga. Faamolemole tuu se kopi mo oe, ona e tatau ona e tagaʻi i ai a o faagasolo le lauga mulimuli i le Aso Sa.
6. O ā auala e tatou te faaalia ai amioga lelei i le tauaofiaga?
6 O Amioga Lelei e Faafouina Ai: I lenei taimi o le toʻatele o tagata e “alolofa iā i latou lava” ma lē amanaʻia faalogona o isi, maʻeu le faafouina pe a faatasitasi ma uso Kerisiano o ē e taumafai e faaalia amioga lelei! (2 Timo. 3:2) E tatou te faaalia amioga lelei pe a ulufale atu i le nofoaga e fai ai le tauaofiaga, i se auala filemu ma maopoopo pe a tatala faitotoʻa i le 8:00 a.m., ma taofi nofoa mo na o tagata o tatou aiga, po o ē na tatou malaga faatasi mai i a tatou taavale, faapea a tatou suʻesuʻega faale-Tusi Paia. E tatou te mulimuli i faatonuga a le taʻitaʻifono, pe a faatonuina e saʻili ni nofoa ma faalogologo i musika a o leʻi amata le tauaofiaga. E faaalia foʻi amioga lelei pe a ki i lalo, pe tapē lau telefoni po o ualesi feaveaʻi, ina ia aua neʻi faalavelave i isi a o faagasolo le polokalame. E faaalia foʻi a tatou amioga lelei pe a aua le talanoa, faia text, aai pe feoaʻi solo a o faagasolo le polokalame.
7. E faapefea ona tatou maua faalaeiauga ma faafouina isi, a o faatasitasi ma o tatou uso?
7 Aufaatasiga e Faafouina Ai: O a tatou tauaofiaga e maua ai le tele o avanoa e tatou te olioli ai, i le faafouina i le aufaatasiga ma le ʻauuso Kerisiano. (Sala. 133:1-3) Aiseā e te lē tausolomua ai e “faalautele atu” ma faafeiloaʻi uso ma tuafāfine mai i isi faapotopotoga? (2 Kori. 6:13) E ono avea ma ou sini le faamasani atu i se tagata po o se aiga fou i aso taʻitasi. O le mālōlōga i aoauli, o se avanoa lelei lea e faia ai faapea. O lea, ia aumai se taumafataga māmā ma olioli e taumamafa ma talanoa faatasi ma isi, nai lo o lou alu e faatau mai se meaʻai pe ʻai i se faleʻaiga latalata ane. E ono iʻu ai i le mauaina o ni faigāuō fou ma tumau.
8. Aiseā e tatou te tauofo ai e galulue i tauaofiaga, ma e faapefea ona tatou faia?
8 Maʻeu le faafouina i le galulue soosootauʻau ma uso tapuaʻi i le auaunaga paia! Pe e mafai ona e tauofo e fesoasoani i se matagaluega po o lau faapotopotoga i le galuega faamamā? (Sala. 110:3) Afai e leʻi tofia oe i se galuega, faamolemole vaai le Matagaluega o Auaunaga Tauofo i le tauaofiaga. O le tele o lima e fiafia ma māmā ai se avega.
9. Aiseā e tatau ai ona tatou uaʻi faapitoa atu i a tatou amio ma foliga, i le taimi o le tauaofiaga?
9 O a Tatou Amio e Faafouina ai Ē o Vaavaai Mai: O i tatou o sui usufono i aso uma e tolu o le tauaofiaga, ae lē na o le taimi o le polokalame. E tatau ona iloa e tagata o loo mātaulia mai i tatou a o iai i nofoaga o tauaofiaga, le eseesega o i tatou ma ē e lē o ni Molimau. (1 Pete. 2:12) E tatau ona faamamaluina Ieova i o tatou laʻei ma teuga i le nofoaga o le tauaofiaga, mea e tatou te api ai ma faleʻaiga. (1 Timo. 2:9, 10) O le laʻeiina o a tatou pine fatafata, e mātaulia ai i tatou e tagata, o i tatou o Molimau a Ieova. Ma atonu e maua ai se avanoa e talanoa atu ai ma avatu se molimau e uiga i la tatou tauaofiaga.
10. E faapefea ona faamautinoa, ua iai i ē e faigaluega i faletalimālō ma faleʻaiga, se vaaiga saʻo e uiga i la tatou tauaofiaga?
10 E faapefea ona tatou felagolagomaʻi ma tagata faigaluega i faletalimālō ma faleʻaiga? E lē tatau ona tatou taofia ni potu e sili atu nai lo potu e manaʻomia, ona e lē maua ai e isi sui usufono ni potu e nonofo ai, ma lē maua ai foʻi e le faletalimālō tupe sa tatau ona mauaina. Afai e pisi le faletalimālō i le taimi e tatou te taunuu ma ō ese ai, ia faaalia pea le onosaʻi ma uiga tausaafia.—Kolo. 4:6.
11. O ā ni mea na tutupu, na avatu ai se molimau lelei ona o a tatou amio faa-Kerisiano?
11 O ā aafiaga ua oo i isi ona o a tatou amioga lelei i le taimi o tauaofiaga? E tusa ai ma se faamatalaga i se nusipepa, na faapea mai le pule o se fale na fai ai le tauaofiaga: “E ese le faaaloalo o tagata. Matou te fiafia e talia i latou i tausaga uma.” I le tausaga na teʻa nei, na leiloa ai se ato tuu tupe a se tamāloa e lē o se Molimau, i se faletalimālō na nonofo ai sui usufono o le tauaofiaga. Ae ina ua toe faafoʻi mai i le pule o le faletalimālō le ato ma mea uma na iai, na taʻu atu e le pule i le tamāloa e ona le ato tupe: “E tatau ona e faafetai ona o Molimau a Ieova ia e fai la latou tauaofiaga latalata mai, ma o loo faatumulia le faletalimālō iā i latou. Auā semanū e te lē toe maua lau ato.”
12. O le ā e avea ma o tatou sini a o lalata mai le tauaofiaga, ma aiseā?
12 Ua lata mai lava tauaofiaga o lenei tausaga. E tele taimi ma taumafaiga ua faia ina ia avea ai le polokalame ma siʻomaga o nei tauaofiaga o se mea e faafouina ai. Ia fai ma ou sini le auai i aso uma e tolu, ma nofo sauni e talia ma ave i fale mea ua saunia e Ieova ma lana faalapotopotoga mo oe. Ia sauniuni e faafouina isi e ala i au amioga lelei, aufaatasiga fiafia, ma uiga tausaafia. Ona pei ai lea o o outou lagona o lagona o se tasi o sui usufono i le tausaga ua mavae, o lē na tusi mai, “Ou te lē manatuaina se isi lava taimi na matuā faamalieina ai aʻu!”
[Faamatalaga faaopoopo i le itulau 4]
E pei o taimi ua mavae, i le tolu vaiaso a o lumanaʻi le tauaofiaga, o le a tatou auai ai i se tauiviga e valaaulia isi ina ia auai.
[Faamatalaga faaopoopo i le itulau 8]
E tatau ona faamamaluina Ieova i o tatou laʻei ma teuga i le nofoaga o le tauaofiaga, mea e tatou te api ai ma faleʻaiga
[Faamatalaga faaopoopo i le itulau 9]
Ia sauniuni e faafouina isi e ala i au amioga lelei, aufaatasiga fiafia, ma uiga tausaafia
[Pusa i le itulau 4]
Mea e Faamanatu mo le Tauaofiaga Itumalo 2011
◼ Taimi o le Polokalame: E amata le polokalame i le 9:20 i taeao o aso uma e tolu. O le a tatala faitotoʻa i le 8:00 i le taeao. E tatau ona faasilasila mai le musika e amata ai le polokalame, ae ua tatou nofoi uma i o tatou nofoa ina ia aua neʻi toe iai se mea e gāsē, ma amata ai le polokalame i se tulaga mamalu. O le a faaiʻuina le polokalame o le Aso Faraile ma le Aso Toonai i le 4:55 i le afiafi, ae o le Aso Sa o le 3:40 i le afiafi.
◼ Paka o Taavale: I nofoaga uma o le a faia ai tauaofiaga ia e tatou te pulea foʻi ma vaega e paka ai taavale, o le a maua e le ʻauusufono se paka e aunoa ma se totogi, ma e fuafua lava avanoa i tagata e muamua mai. Talu ai e masani ona utiuti avanoa mo paka, afai e mafai, o se mea lelei le taumafai e malaga faatasi ni tagata se toʻatele i se taavale e tasi, nai lo o le tofu o tagata eseese ma le taavale e malaga mai ai.
◼ Taofia o Nofoa: E tatau ona taofi ni nofoa mo na o tagata o lou aiga, po o ē na outou malaga faatasi mai i la outou taavale, po o a tatou tagata suʻesuʻe.—1 Kori. 13:5.
◼ Taumafataga i le Aoauli: Faamolemole aumai se taumafataga mo le aoauli, nai lo o le tuua o le nofoaga e fai ai le tauaofiaga, ae alu ese atu e faatau mai se taumafataga. E mafai ona e faaaogā se tamaʻi cooler e ofi i lalo o nofoa. O cooler lapopoʻa ma ipu mataʻetaʻe, e lē faatagaina i le nofoaga e fai ai le tauaofiaga.
◼ Foaʻi: E faaalia lo tatou talisapaia o le tauaofiaga i le faia o ni foaʻi tauofo mo le galuega i le lalolagi aoao, i le taimi o le tauaofiaga. O so o se siaki e tatau ona totogi atu i le “Tauaofiaga Itumalo a Molimau a Ieova.”
◼ Faalavelave ma Mea e Tutupu Faafuaseʻi: Pe a tulaʻi mai se manaʻoga ona o se faalavelave faafuaseʻi i le taimi o le tauaofiaga, faamolemole faafesootaʻi se tautua o latalata ane, o ia e na te faafesootaʻia vave le Fesoasoani Muamua, ina ia mafai ai e o tatou tagata ua iai le poto masani, ona iloilo po o le ā le matuiā o le mea ua tupu ma saunia le fesoasoani. Pe a manaʻomia, o i latou na e vili atu mo se fesoasoani. O le faia faapea, o le a ʻalofia ai le soona vili atu o le toʻatele, i le matagaluega e gafa ma faalavelave faafuaseʻi.
◼ Fualaau: Pe afai e te manaʻomia ni fualaau, faamolemole ia faamautinoa o loo e sau ma aumai ni au fualaau, talu ai e lē maua ni fualaau i le tauaofiaga.
◼ Seevae: E toʻatele i latou e manunuʻa i tausaga taʻitasi ona e māfua mai i seevae. E sili atu ona lelei le faaaogā o ni seevae talafeagai ma fetaui lelei, ina ia saogalemu ai pe a e savali i auala simā, faasitepu, ma ni vaega o le auala e ufiufi i ni mea valavala, ma isi mea faapena.
◼ Taavale Pepe ma Nofoa Faamoe: E lē tatau ona avatu i totonu o le nofoaga o le tauaofiaga ia taavale pepe po o nofoa faamoe. Ae e faataga nofoa faapitoa mo le saogalemu o se tamaitiiti, pe afai e mafai ona fusi i se nofoa i autafa o ona mātua.
◼ Fagu Faamanogi: O le tele o tauaofiaga e faia i fale e iai masini e faasau ai le ʻea i totonu. O lea, ia faaalia le agalelei i le faaitiitia o le faaaogāina o fagu faamanogi ma mea faapena, ia e ono faalētonu ai le mānava a ē e aafia gofie i mea faapena.—1 Kori. 10:24.
◼ O Pepa Follow Up: E ao ona faaaogā pepa Please Follow Up (S-43) e tusia mai ai ni faamatalaga e faatatau i se tagata na faaalia le fiafia ona o le molimau lē fuafuaina i ai i le taimi o le tauaofiaga. E tatau i tagata talaʻi ona ave se pepa e tasi pe lua i le tauaofiaga. O pepa ua uma ona faatumu, e mafai ona tuuina atu i le Potu Tusi, pe tuu atu i le failautusi o la outou faapotopotoga pe a e toe foʻi atu.—Tagaʻi i La Tatou Faiva o le Malo, o Novema 2009, itulau e 4.
◼ Faleʻaiga: Ia faamamaluina le suafa o Ieova e ala i a tatou amioga lelei i faleʻaiga.
◼ Faletalimālō ma Nofoaga e Āpi Ai:
(1) Faamolemole aua le taofia ni potu e sili atu nai lo o potu e te manaʻomia, ma aua neʻi sili atu tagata e nonofo i lou potu nai lo o le aofaʻi e faatagaina.
(2) Aua neʻi toe faalēaogāina potu na e talosagaina, seʻi vaganā o se tulaga lē maʻalofia, ma ia faafesootaʻi le faletalimālō i le vave e mafai ai.—Mata. 5:37.
(3) Ia faaaogā se taavale e toso ai atopaʻu pe afai ua e sauni e faaaogā, ma ia vave ona toe faafoʻi ina ia mafai ona faaaogā e isi.
(4) Ia kuka meaʻai i na o potu e faatagaina ona kuka ai.
(5) Aua le faaaogāsesēina mālū o le taeao, kofe po o aisa e maua fua, ia ua saunia e faaaogā e i latou o loo nonofo i le faletalimālō.
(6) Ia faaalia i taimi uma le fua o le agaga, i le auala e feutagaʻi ai ma le ʻaufaigaluega o le faletalimālō. E toʻatele mālō o loo latou vaavaaia ma e latou te talisapaia lo tatou agalelei, onosaʻi ma le magafagafa.
(7) Pe a tulaʻi mai se faafitauli i le potu na e talosagaina i le faletalimālō, ia faafesootaʻi le Matagaluega o Āpi a o iai i le tauaofiaga, ina ia fesoasoani atu iā te oe.
◼ Auaunaga Tauofo: O le a faateleina le fiafia lea e maua mai i le auai i le tauaofiaga, pe a tatou tauofo e fesoasoani i galuega o loo manaʻomia ona fai. (Galu. 20:35) So o se tasi e fia tauofo, ia lipoti atu i le Matagaluega o le Auaunaga o ē Tauofo i le tauaofiaga. E mafai foʻi ona fai se sao o tamaiti e i lalo ifo o le 16 tausaga, e ala i le galulue faatasi ma mātua po o se tasi e vaaia i latou, po o se isi e faamaonia e mātua po o lē e vaaia i latou.
[Pusa i le itulau 7]
Le Auala e Tufa Atu ai Tusi Valaaulia
Ina ia faasopolia le oganuu atoa, e tatau ona faapuupuu. E tatou te ono faapea atu: “Talofa. O loo matou faia se tauiviga i le lalolagi aoao, i le tufatufaina atu o lenei tusi valaaulia. O lou valaaulia lea. O le a e maua nisi faamatalaga atili i le tusi valaaulia.” O le pito i luma o le tusi valaaulia e faaoso naunau i le tagata e ona le fale, o lea, ia tuu atu i se auala e faigofie ai ona ia iloa. Ia maelega. Afai e te auai i le tufaina o le valaaulia i faaiʻuga o vaiaso, e tatau ona ofo faatasi ma mekasini pe a talafeagai.