Faamuamua le Galuega Talaʻi
1. Na faapefea ona faaalia e Iesu, e tāua le galuega talaʻi iā te ia?
1 Na faamuamua e Iesu le galuega talaʻi. O lona maelega tele na femaliuaʻi ai i le faitau afe o maila i Palesitina ina ia talaʻi atu i le toʻatele. Sa faafaigofie lona olaga ina ia tele ai lona taimi mo le talaʻiga ma uaʻi lelei i ai. (Mata. 8:20) Na taumafai tagata e taofi o ia e faamālōlō a latou maʻi, ae na ia fetalai atu: “E tatau ona ou folafola atu le tala lelei o le malo o le Atua i isi foʻi aai, auā o le mea lea na auina mai ai aʻu.”—Luka 4:43.
2. Aiseā na tāua tele ai le galuega talaʻi iā Iesu?
2 Aiseā na tāua tele ai le galuega talaʻi iā Iesu? O lona naunautaʻiga autū o le faapaiaina lea o le suafa o Ieova. (Mata. 6:9) O lona alofa i lona Tamā o i le lagi na ia naunau ai e faataunuu Lona finagalo ma usitaʻi i Ana poloaʻiga uma. (Ioa. 14:31) E lē gata i lea, na alofa moni o ia i tagata ma naunau e fia fesoasoani iā i latou.—Mata. 9:36, 37.
3. E faapefea ona iloa o loo tatou taulaʻi atu i le galuega talaʻi?
3 Faataʻitaʻi iā Iesu: O se luʻi le taumafai pea e faamuamua le galuega talaʻi e pei ona sa faia e Iesu, ona o le anoanoaʻi o meafai o le olaga e faalavelave mai, ma alu ai o tatou taimi. (Mata. 24:37-39; Luka 21:34) O lea, e tatau ona tatou faamautinoa mea e sili ona tāua, ma ia lē aunoa ona faatulaga le taimi e sauniuni ai ma auai i le galuega talaʻi. (Fili. 1:10) E tatou te tauivi ia faafaigofie o tatou olaga ma ia lē faaaogāina atoatoa le lalolagi.—1 Kori. 7:31.
4. Aiseā e tāua tele ai le faamuamua pea o le galuega talaʻi i le taimi nei?
4 O le tagata poto, e na te faamuamua mea e tāua pe a utiuti le taimi. O se faataʻitaʻiga, pe a ia iloa ua lalata mai se afā malosi, e faaaogā lona taimi ma lona malosi e sauniuni ai ia saogalemu lona aiga, ma lapataʻia ona tuaoi. E tuu uma isi mea e lē tāua tele. O lea, ua matuā faaitiitia lava le taimi o loo totoe a o leʻi oo mai Amaketo. (Sefa. 1:14-16; 1 Kori. 7:29) Ia tatou uaʻi totoʻa iā i tatou lava ma la tatou aʻoaʻo atu i totonu ma fafo o le faapotopotoga, ina ia faaolaina ai i tatou ma ē e faalogo mai. (1 Timo. 4:16) Ioe, e faalagolago lo tatou faaolaina i le faamuamua pea o le galuega talaʻi!