Le Vaitaimi o le Faamanatuga—O se Avanoa e Faateleina ai se Sao i le Auaunaga!

1. O ā māfuaaga e ao ona iloilo ina ia faateleina ai so tatou sao i le auaunaga iā Mati, Aperila, ma Me?

¹ Pe e mafai ona faateleina lou sao i le auaunaga i le vaitaimi o le Faamanatuga o loo loma nei? I le tele o nofoaga, o le a manaia le tau ma uumi itula o le ao. O le a mālōlō nisi tagata talaʻi mai a latou galuega pe e tuua ai foʻi aʻoga, ona faaaogā lea o na taimi i le faiva. E amata iā Aperila 2, o le a faia se tauiviga faapitoa e valaaulia ai tagata lotofiafia ina ia auai ma i tatou i le Faamanatuga iā Aperila 17. Mulimuli ane, ona tatou taumafai lea e faatupu le naunau o ē na auai, ma valaaulia i latou e auai i le lauga faapitoa o le a faia i le vaiaso e sosoo ai iā Aperila 25. Ioe, e tele māfuaaga e ao ona iloilo, ina ia faateleina ai so tatou sao i le auaunaga iā Mati, Aperila, ma Me.

2. O le ā le isi auala e sili ona lelei e faateleina ai so tatou sao i le faiva?

² Paeonia Lagolago: O le tasi o auala e sili ona lelei e faateleina ai lou sao i le faiva, o le avea ma paeonia lagolago. Talu ai e tatou te pisi uma lava, e manaʻomia ai la ona fuafua mamao ma fetuunaʻi a tatou faasologa. (Faata. 21:5) Atonu e mafai ona tolopō nisi o mea e faalētāua i lau faasologa masani. (Fili. 1:9-11) Aiseā e lē faailoa atu ai i isi o le faapotopotoga lou faanaunauga e fia paeonia, ina ia iloa ai pe mafai ona tou paeonia lagolago faatasi?

3. E faapefea ona fuafua aiga e faateleina so latou sao i le faiva?

³ I le afiafi e sosoo ai o la outou Tapuaʻiga a le Aiga, e lelei ona talanoa i sini o lo outou aiga. (Faata. 15:22) Atonu e mafai ona paeonia lagolago nisi o le aiga mo ni nai masina pe a felagolagomaʻi. Ae faapefea pe a e manatu e faigatā lenei mea? E mafai lava e le aiga ona fuafua e faateleina so latou sao i le faiva, e ala i le talaʻi i nisi o afiafi, pe faaumiumi foʻi le auaunaga i faaiʻuga o vaiaso.

4. O ā faamanuiaga e maua, pe a faateleina so tatou sao i le faiva i le vaitaimi o le Faamanatuga?

⁴ E silafia e Ieova mea uma e tatou te faia i le auaunaga iā te ia, ma talisapaia a tatou taulaga. (Epe. 6:10) E maua le olioli pe a tatou foaʻi atu iā Ieova faapea ma isi. (1 No. 29:9; Galu. 20:35) Pe e mafai ona faateleina sou sao i le auaunaga i le vaitaimi o le Faamanatuga, ma olioli ai i le tele o faamanuiaga.