Ia Avea le Vaitaimi o le Faamanatuga o se Taimi Fiafia!

1. O le ā se tasi o auala e faatele ai lo tatou olioli i le vaitaimi o le Faamanatuga?

¹ Pe e te manaʻo e faateleina lou olioli i masina o Mati, Aperila, ma Me? O se tasi o auala e faia ai faapea, o le faalautele o lau faiva ma avea o se paeonia lagolago pe a talafeagai. E faapefea i lenei mea ona faateleina ai lou olioli?

2. E faapefea i le faalautele atu o la tatou faiva ona faateleina ai lo tatou olioli?

² Faateleina Lou Olioli: Na foafoaina e Ieova i tatou ina ia olioli ma fiafia i le tapuaʻi atu iā te ia, a o tatou faamalieina o tatou manaʻoga faaleagaga. (Mata. 5:3) Na ia foafoaina foʻi i tatou ina ia maua le fiafia e ala i le foaʻi atu. (Galu. 20:35) O le talaʻiga ua mafai ai ona faataunuu na vala e lua, o le tapuaʻia ai o le Atua, ma fesoasoani atu ai i tagata. O le faateleina o lo tatou sao i le galuega talaʻi e maua ai le tele o le olioli. E lē gata i lea, o le tele o taimi e tatou te galulue ai i le talaʻiga, o le faaleleia foʻi lenā o o tatou tomai. A o faaleleia o tatou tomai ma maua le lototele, e mafai ona faaitiitia ai lo tatou popole. E tele avanoa e tatou te molimau atu ai ma amata ni suʻesuʻega faale-Tusi Paia. O nei vala uma, e saosaolaumea i le faateleina o lo tatou olioli i le talaʻiga.

3. Aiseā e lelei ai le paeonia lagolago iā Mati ma Aperila?

³ O masina o Mati ma Aperila o ni masina lelei e avea ai o se paeonia lagolago, ona e mafai ona tatou filifili ai le 30 po o le 50 itula i le masina. E amata atu iā Mati 22 e oo i le Faamanatuga iā Aperila 14, o le a faia ai so tatou sao i le valaauliaina o isi i le Faamanatuga. E matuā fiafia faapotopotoga, a o faaauau ona galulue “soosootauʻau” e tufatufaina le valaaulia i le tele e mafai ai.—Sefa. 3:9.

4. O le ā e tatau ona tatou faia pe afai e tatou mananaʻo e avea ma paeonia lagolago?

⁴ Sauniuni Nei Loa: Pe afai e te leʻi sauni e faia faapea, e lelei ona iloilo lau faasologa ma vaai pe mafai ona fai ni fetuunaʻiga, ina ia faalautele atu ai lau faiva i se masina se tasi pe sili atu foʻi. Ia taʻua lenā mataupu i au tatalo. (Iako. 1:5) Ia talanoa atu i lou aiga ma isi i le faapotopotoga e faatatau i lenā mataupu. (Faata. 15:22) E mafai ona e mauaina le fiafia mai le paeonia lagolago, e tusa lava po o le ā lou tulaga tau soifua mālōlōina, pe pisi foʻi lau faasologa i le galuega.

5. O ā iʻuga e tatou te maua pe a faalautele atu la tatou faiva i le vaitaimi o le Faamanatuga?

⁵ E finagalo Ieova e maua e ana auauna le olioli. (Sala. 32:11) Pe a tatou faia taumafaiga uma e faalautele atu la tatou faiva i le vaitaimi o le Faamanatuga, e lē gata e faateleina ai lo tatou olioli, ae sili atu le faafiafiaina ai o lo tatou Tamā i le lagi.—Faata. 23:24; 27:11.