Ia Fuafua Nei Loa e Faalautele Atu Lau Faiva
1. O le ā se mea tāua e faatatau i le vaitaimi o le Faamanatuga, ma e faapefea ona tatou nofosauni mo lenā mea?
1 O tausaga uma i le vaitaimi o le Faamanatuga, e aumaia ai iā i tatou avanoa fou e “matuā faaneenee atu [ai] iā Ieova.” (Sala. 109:30) Po o le a e faalautele atu lau faiva iā Mati, o se auala e faaalia ai lou lotofaafetai i Lē na saunia le togiola? O le taimi lenei e amata ai loa ona fai fuafuaga.—Faata. 21:5.
2. Na faapefea iā te oe ma isi ona tali atu i le sauniuniga e faaitiitia itula e manaʻomia mo paeonia lagolago, iā Aperila i le tausaga ua mavae?
2 Paeonia Lagolago: I le tausaga ua mavae, sa matuā fiafia faapotopotoga ina ua latou iloa e mafai ona paeonia lagolago iā Aperila, ae ua faaitiitia itula e manaʻomia. Na tusi se tasi uso: “O loo oʻu iai pea i aʻoga maualuga, ma e lē faigofie mo aʻu ona paeonia sauatoa. Ae o le a ou talosaga mo le 30 itula ma taumafai mo le 50 itula i le masina o Aperila.” Na tusi se tuafafine e faigaluega faasoloatoa: “E mafai telē ona ausia le tolu sefulu itula!” Ina ua faasilasila mai lenei fuafuaga, na faapea mai se tuafafine sa paeonia muamua, o lē ua silia i le 80 ona tausaga i le taimi nei: “O le avanoa lenei ua leva ona ou faatalitali i ai! Ua silafia e Ieova o le auauna o se paeonia o le taimi sili lea na fiafia ai loʻu olaga!” O ē na lē mafai ona paeonia lagolago, na latou faataatitia sini ia faatele se sao i le galuega talaʻi.
3. O ā māfuaaga e ao ai ona iloilo le paeonia lagolago i le masina o Mati, Aperila ma Me?
3 O le a avea Mati o se masina e sili ona lelei e paeonia lagolago ai, auā o le a tatou toe maua ai foʻi le avanoa e paeonia lagolago ai ma ausia itula manaʻomia e 30 pe 50. E lē gata i lea, e amata atu i le Aso Toonaʻi, Mati 17, o le a tatou auai ai i se tauiviga faapitoa ia valaaulia isi e auai faatasi ma i tatou, i le Faamanatuga i le aso 5 o Aperila. E toʻatele o le a fiafia e faatele so latou sao i le faiva, ma o le a mananaʻo e paeonia lagolago iā Aperila ma Me, ma ausia itula manaʻomia e 50.
4. E mafai faapefea ona faateleina so tatou sao i le faiva, ma o ā iʻuga?
4 I le afiafi e sosoo ai o la outou Tapuaʻiga a le Aiga, aiseā e lē talanoa ai pe faapefea i tagata taʻitoʻatasi o le aiga ona faalautele atu lana faiva i le vaitaimi o le Faamanatuga? (Faata. 15:22) Ia ōle atu iā Ieova e faamanuia mai i au taumafaiga. (1 Ioa. 3:22) A o faateleina lou sao i le faiva, e lē gata o le a e avatu atili ai le viiga iā Ieova, ae o le a faatuputeleina ai foʻi lou olioli.—2 Kori. 9:6.