Taulimaga Faataʻitaʻi

Ina ia Amata ai Suʻesuʻega Faale-Tusi Paia i le Aso Toonaʻi Muamua o Novema

“O le toʻatele o i tatou e naunau i se faigāmalo e lelei. O le ā sou manatu, o le ā le ituaiga malo o le a mafai ona foʻia faafitauli o tagata? [Faatali mo se tali.] Seʻi mātau mai le faamatalaga lenei.” Tuu atu i le tagata e ona le fale Le Olomatamata o Novema 1, ma talanoa faatasi manatu i lalo o le tamaʻi ulutala muamua i le itulau e 16, ma se mau se tasi. Ofo le mekasini ma fai se fuafuaga e toe foʻi atu e talanoa le fesili e sosoo ai.

Le Olomatamata Novema 1

“O le ā sou manatu, o le ā se fesili e mafai ona e fesili atu ai i le Atua? [Faatali mo se tali.] Na taʻua e Iesu, e tatau ona tatou saʻilia tali o a tatou fesili tāua ma aogā. [Faitau le Mataio 7:7.] O loo taʻua i lenei mekasini tali mai le Tusi Paia o fesili tāua nei e tolu.” Faaali atu i le tagata e ona le fale fesili o loo i le pito i lalo o le itulau e 3.

Ala Mai! Oketopa-Tesema

“Pe a maliu se tasi e pele, o nisi mātua e popole pe afai e vāai mai a latou fanau o loo faavauvau ma fetagisi. Ae o le ā sou manatu, faamata e iai se afāina pe a vāai mai fanau o tatou fetagisi ma faavauvau? [Faatali mo se tali.] Seʻi mātau mai le lagona sa iā Iesu ina ua maliu se tasi o ana uō.” [Faitau le Ioane 11:35, 36.] “O loo talanoaina i le itulau e 13-15 o lenei mekasini, nisi o auala e tatou te fesoasoani ai i fanau o loo faavauvau.”