E Faapefea Ona Faaaogā le Polosiua O Ai o Loo Faia le Finagalo o Ieova i Aso Nei?
Se Polosiua Fou ua Fuafuaina e Tosina ai Tagata Suʻesuʻe i le Faalapotopotoga
1. O ā fuafuaga o le polosiua Finagalo o Ieova?
1 Po ua e faaaogāina le polosiua fou, O Ai o Loo Faia le Finagalo o Ieova i Aso Nei? Ua fuafuaina lenei polosiua ina ia (1) malamalama ai tagata suʻesuʻe e faatatau i Molimau a Ieova, (2) malamalama ai i latou i galuega o loo tatou faia, ma le (3) iloa ai le auala o loo faagaoioi ai la tatou faalapotopotoga. O loo iai i le polosiua Finagalo o Ieova mataupu e taʻitasi itulau, lea e faigofie ona talanoaina i le na o le lima i le sefulu minute i le faaiʻuga o se suʻesuʻega i se isi lomiga.
2. Faamatala mai vaega eseese o lenei polosiua.
2 Vaega Eseese: E tolu vaega eseese o lenei polosiua, lea e faamatalaina ai vala eseese e faatatau i le faalapotopotoga a Ieova. E 28 mataupu i lenei polosiua, ma ua tusia ulutala o nei mataupu o ni fesili. E taliina na fesili i tamaʻi ulutala matamata tetele o loo iai i mataupu taʻitasi. O loo iai foʻi i lenei polosiua ata o atunuu e silia ma le 50, e faaalia ai o se galuega faavaomalo. I mataupu taʻitasi, e iai pusa ua faaulutalaina “Saʻiliʻili Atili,” lea e maua ai fautuaga e mafai ona e faalaeiauina lau tagata suʻesuʻe e mulimuli i ai.
3. O ā auala e faaaogā ai le polosiua Finagalo o Ieova?
3 Le Auala e Faaaogā Ai: Ia faauaʻi atu le tagata suʻesuʻe i le ulutala o le mataupu. A o faitau faatasi le mataupu, faamatilatila tamaʻi ulutala o loo matamata tetele. Ona faaiʻu lea i le talanoaina o fesili autalu i le pito i lalo o le itulau. E mafai ona faitauina le mataupu atoa, pe faitau ma talanoaina vaega taʻitasi o le mataupu. Faaaogā le utaga mamao e filifili ai po o ā mau o loo siiina mai e tatau ona faitau. Aua neʻi galo ona iloiloina ata ma le pusa ua faaulutalaina “Saʻiliʻili Atili.” E masani lava, e tatau ona talanoaina mataupu i le faasologa ua uma ona faatulaga ai. Peitaʻi, e mafai ona e suia le auala e faia ai, aemaise pe a iai se mataupu e fiafia ai le tagata suʻesuʻe. O se faataʻitaʻiga, pe afai o loma se fonotaga po o se tauaofiaga, e mafai ona suʻe saʻo i le mataupu e 11.
4. Aiseā e tatou te fiafia ai e faaaogā lenei polosiua fou?
4 E tatou te fesoasoani i se tasi e iloa lelei lona Tamā i le lagi, pe a tatou suʻesuʻeina faatasi le Tusi Paia. Peitaʻi, e manaʻomia foʻi ona aʻoaʻoina o ia e faatatau i le faalapotopotoga a Ieova. (Faata. 6:20) O se fiafiaga mo i tatou le mauaina o lenei polosiua fou, lea ua faafaigofie ai ona faia faapea.