O le a Tufatufaina iā Novema le Tala o le Malo Nu. 38!
1. O ā fesili a tagata e faatatau i ē ua maliliu, ma o le a faapefea ona taliina nei fesili iā Novema?
1 O le oti o le fili lea o tagata uma, e tusa lava po o ā o latou talitonuga. (1 Kori. 15:26) E tuufesili le toʻatele po o fea o iai ē ua maliliu, ma po o le a toe feiloaʻi foʻi ma i latou. O lea, i le masina o Novema o le a auai ai faapotopotoga i le lalolagi aoao i le tufatufaina o le Tala o le Malo Nu. 38, ua faaulutalaina Pe Mafai Ona Toe Feola Mai Ē ua Maliliu? O le a amata lenei tauiviga faapitoa iā Novema 1. Pe a māeʻa lea tauiviga, o le a faaaogā le Tala o le Malo Nu. 38 o se sāvali i le faiva i le fanua.
2. O ā vaega eseese o le Tala o le Malo Nu. 38?
2 Vaega Eseese: Pe a gaulua i le umi le sāvali Tala o le Malo Nu. 38, o le a iloa atu ai le matua faaoso naunau, faapea upu: “Pe e te faapea mai . . . ioe? leai? atonu?” Pe a tatala e le tagata faitau le Tala o le Malo, o le a ia iloa ai le tali mai i le Tusi Paia e faatatau i le ulutala o le sāvali, faapea le uiga o folafolaga a le Tusi Paia mo ia. O le a ia iloa ai foʻi māfuaaga e mafai ai ona ia maufaatuatuaina le Tusi Paia. I le pito i tua o le sāvali, o loo iai se fesili faatupu manatu e mafaufau i ai le tagata faitau, ma valaaulia o ia e aʻoaʻoina le tele o mea.
3. O le ā le auala o le a tufatufaina ai le Tala o le Malo Nu. 38?
3 Le Auala e Tufatufaina Ai: E taitutusa lenei tauiviga ma tauiviga e masani ona faia i le tufatufaina o valaaulia mo le Faamanatuga ma tauaofiaga itumalo. O le a aumaia e toeaina faatonuga i le auala e galueaʻiina ai le oganuu, e ōgatusa ma le tusi na latou maua iā Aperila 1, 2013. E mafai e faapotopotoga e lāiti oganuu ona fesoasoani i isi faapotopotoga e tetelē a latou oganuu. Pe a e alu e aumai ni au sāvali, ia ave na o sāvali e mafai ona e tufaina i le vaiaso. A o faagasolo le tauiviga, e ono mafai ona tufatufaina atu nei sāvali i nofoaga faitele, pe a māeʻa ona galueaʻiina uma oganuu. Pe a uma sāvali a o leʻi māeʻa le masina, e tatau ona faaaogā le ofo o le masina. Nai lo o le uaʻi atu i le amataina o suʻesuʻega faale-Tusi Paia i le Aso Toonaʻi muamua o le masina, e tatau ona taulaʻi atu i le faia o se sao i lenei tauiviga faapitoa. I faaiʻuga o vaiaso, e tatau foʻi ona tatou ofoina mekasini pe a talafeagai. Po ua fai ni au fuafuaga ina ia faia se sao atoatoa i lenei tauiviga faapitoa?