Ia Faaaogā Tatau Mekasini Tuai

E leai se aogā o a tatou mekasini tuai i se tasi pe afai e na o le faaputu pe e tiaʻi foʻi. O lea, e tatau ona tatou taumafai e tufaina atu nei mekasini, ma atonu o le a faaosofia ai le naunau o se tasi i le upu moni ma valaau atu ai i le suafa o Ieova. (Roma 10:13, 14) O nisi nei o fautuaga i le auala e faaaogā tatau ai mekasini tuai.

• Pe a talaʻi i oganuu e seāseā galueaʻiina, e ono mafai ona e tuuina se mekasini tuai i se fale e lē o iai se tasi, i se mea e lē iloa atu ai e isi tagata.

• Pe a talaʻi i nofoaga faitele i mea o loo faatalitali ai tagata, e pei o fale faatali pasi, ia fesili atu i se tasi pe e manaʻo e avatu sana mekasini e faitau, ona faaali atu lea iā te ia o ni mekasini tuai e filifili se mekasini e manaʻo i ai.

• Pe a asiasi atu i faletāmea, falemaʻi, o nofoaga e tausia ai tagata matutua, ma isi nofoaga faapena i la outou oganuu, ia tuu ni nai mekasini tuai i le potu e faatalitali ai tagata. Peitaʻi, e lelei pe a faanoi muamua a o leʻi tuuina ni mekasini. Afai foʻi o loo iai ni mekasini i inā, aua le toe tuuina ai nisi mekasini.

• A o sauniuni mo toe asiga, ia taumafai e mafaufau i mea e fiafia i ai tagata o le a e asia. Po o ia o se tagata tausi aiga? Po o ia o se tagata e tele ina malaga? Pe e fiafia o ia e fai togālaau? Ia vaai ni mekasini tuai po o iai ni mataupu atonu e fetaui lelei ma ia, ma e ono fiafia e faitau i ai.

• Pe afai ua umi se taimi o e asia se tagata fiafia ae e lē maua atu lava, ma mulimuli ane lua toe feiloaʻi, e lelei ona faaali atu iā te ia nisi o mekasini mai i masina ia e te lua leʻi feiloaʻi ai.