E Manaʻomia Ona Toe Asia Vave

Ua faateleina talosaga mo suʻesuʻega faale-Tusi Paia talu ona toe faatulaga la tatou tuatusi i le Initaneti. Ua atili ona faateleina nei talosaga ona o le auala fou e talaʻi atu ai i nofoaga faitele. E taulima e le ofisa o le lālā nei tusi talosaga i le vave e mafai ai. O se faaaʻoaʻoga, pe afai e faia se talosaga e ala atu i le tuatusi o le jw.org, e masani ona faailoa atu e le ofisa o le lālā i le ʻautoeaina o le oganuu lea e iai le tagata fiafia i le lua aso mulimuli ane ai. Peitaʻi, o nisi o nei talosaga e leʻi asia lava mo ni vaiaso. E faapefea ona tatou faamautinoa ua avatu le fesoasoani a o leʻi mou atu le fiafia o se tasi?—Mare. 4:14, 15.

Pe afai e lē nofo le tagata lea e faaalia le fiafia i lau oganuu, ia vave ona faatumu le pepa Please Follow Up (S-43) ma avatu i le failautusi a la outou faapotopotoga i le sauniga e sosoo ai. E ao i le failautusi ona tuuina atu lenei talosaga i le faapotopotoga e ana le oganuu e iai lea tagata, pe lafo atu foʻi i le ofisa o le lālā e faaaogā ai le vaega o le tuatusi o le Congregation tab i le jw.org i le tasi po o le lua aso e sosoo ai. E ao i le ʻautoeaina ona siaki e lē aunoa le tuatusi i le Initaneti. Pe a latou maua se tusi e faailoa mai ai se tagata fiafia i la latou oganuu, e ao ona vave asia. O so o se tagata talaʻi e tofia e asia se tagata fiafia na talosaga mai, e ao ona ave i ai lana faamuamua. Pe afai e lē maua atu lea tagata i le fale, e mafai ona e tuu se feʻau e toe faafesootaʻi mai ai oe.