Pusa Fesili

◼ Pe e tatau i tagata talaʻi ona faaaogā i taimi uma le Initaneti, e molimau atu ai pe suʻesuʻe ma tagata ese e nonofo i isi atunuu?

O nisi tagata talaʻi ua latou faaaogā le Initaneti ina ia suʻesuʻe ai le Tusi Paia, ma tagata o loo i atunuu e faasā ai la tatou talaʻiga pe e toʻaitiiti ai le ʻautalaʻi, ma ua iai iʻuga lelei. Peitaʻi, e iai lamatiaga pe afai e talanoa tagata talaʻi ma ni tagata ese e ala i imeli po o polokalame e fesootaʻi ma talanoa ai. (Tagaʻi i La Tatou Faiva o le Malo o Iulai 2007, itu. 3.) E ui o le faanaunauga ia faaoo atu le feʻau o le Malo i tagata lotofaamaoni, ae o na talanoaga e ono iʻu ai ina fesootaʻi se uso po o se tuafafine ma se aumea lē lelei, e aofia ai ē ua liliuese mai i le upu moni. (1 Kori. 1:19-25; Kolo. 2:8) E lē gata i lea, i atunuu o loo faasā ai le galuega o le Malo, atonu e siaki e tagata maualuluga o le malo so o se imeli. O na ituaiga o fesootaʻiga e ono lamatia ai uso ma tuafāfine o loo i na atunuu. O lea la, e lē tatau i tagata talaʻi ona faaaogā le Initaneti ina ia saʻili ai ni tagata i se isi atunuu, e faailoa atu i ai le tala lelei.

Pe afai e tatou te talaʻi lē fuafuaina i se tasi o loo asiasi mai i se isi atunuu, e lē tatau ona tatou taumafai e atiaʻe le fiafia o lenā tagata pe a toe foʻi i lona atunuu, seʻi vaganā ua maua mai ni taʻiala mai i le ofisa o le lālā i lenā atunuu. Nai lo o lea, ia faasino i ai le auala e na te faaaogā ai le Upega tafaʻilagi o le jw.org, ina ia maua ai nisi faamatalaga pe faafesootaʻi ai le ofisa o le lālā i lona atunuu. Ia faalaeiau foʻi o ia e asiasi atu i se Maota mo Sauniga e latalata ane i lona vaipanoa. O nisi atunuu e leai ni Maota mo Sauniga o iai. Ae afai e manaʻo le tagata e asiasi atu se Molimau o loo i lona vaipanoa, e tatau ona tatou faailoa atu i le failautusi faamatalaga e faafesootaʻi ai lea tagata, ona lafo atu lea e le failautusi e faaaogā ai le jw.org. O le ofisa o le lālā o loo vaaia le galuega i le atunuu e nofo ai le tagata fiafia, ua masani i tulaga eseese i lea atunuu, ma o i latou foʻi e mafai ona saunia le fesoasoani faaleagaga mo lea tagata.—Tagaʻi i La Tatou Faiva o le Malo o Iuni 2014, itu. 8, ma Novema 2011, itu. 2.

Pe afai ua siitia atu i se isi atunuu se tagata o loo tatou asiasi i ai, pe o loo tatou suʻesuʻe ma se tagata i se isi atunuu e ala i le Initaneti, e tatau la ona tatou mulimuli i taʻiala ua taʻua i luga. Peitaʻi, e ono mafai ona faaauau pea ona tatou atiaʻe le fiafia o lenā tagata, seʻia oo ina maua o ia e se tagata talaʻi e iai i lona vaipanoa. Ae afai o loo nofo le tagata i se atunuu e faasā ai la tatou talaʻiga, e tatau la ona faaaogā le tofā mamao pe a talanoa i mataupu faale-Tusi Paia e ala atu i tusi, telefoni po o masini faaonapōnei.—Mata. 10:16.