Le Auala e Amata ai Talanoaga i Sāvali

Talu mai Ianuari 2018, ua iai i le faavaa o La Tatou Faiva ma le Olaga Faa-Kerisiano taulimaga faataʻitaʻi. Ua faalaeiauina i tatou ina ia uaʻi atu i le talanoa ma tagata nai lo o le tau ina ofo atu o lomiga iā i latou. Ina ia fesoasoani i tagata talaʻi e fetuunaʻi a latou taulimaga, ua faailoa mai e vitiō mo taulimaga faataʻitaʻi le auala e amata ai talanoaga e faaaogā ai na o le Tusi Paia. Po o lona uiga e lē tatau ona tatou faaaogāina lomiga pe a talaʻi atu mai i lea fale i lea fale? E leai! O se faataʻitaʻiga, e mafai ona faaaogā sāvali i se auala uigā e amata ai se talanoaga. E mafai ona faaaogā lenei auala i so o se sāvali:

1. Ia fai atu le fesili o loo i le pito i luma o le sāvali.

2. Faailoa atu le manatu o le Tusi Paia o loo i le pito i luga o le itulau e lua. Pe a lava le taimi, ia faitau ma talanoa nisi o faamatalaga o loo i le sāvali.

3. Ofo le sāvali i le tagata o le aiga ma faalaeiau o ia e faitau i ai.

4. A o leʻi tuua le tagata, faaali i ai le fesili “Ia Mafaufau i Ai” ma fai se fuafuaga e toe foʻi atu i se isi taimi e talanoa i le tali mai le Tusi Paia.

Pe a e toe foʻi, ia talanoa le tali o le fesili ma tuu se isi fesili e talanoa ai i se isi taimi. E mafai ona e filifili se fesili mai i la tatou tuatusi po o le lomiga o loo i le pito i tua. Pe a talafeagai le taimi, ia faatomua le polosiua Tala Lelei Mai i le Atua! po o se isi lomiga mo suʻesuʻega, mai i a tatou Meafaigaluega mo le Aʻoaʻo Atu.