Po o Aogā iā te Oe le Tusi Iloiloina Tusitusiga Paia i Aso Taʻitasi?

Po o faaaofia i lau faasologa faaleagaga le faitauina o le mau o le aso ma le faaopoopoga mai le tusi Iloiloina Tusitusiga Paia i Aso Taʻitasi? Pe afai e leai, pe e mafai ona faaaofia i lau faasologa? O le toʻatele e latou te iloiloina le mau i le taeao, ona latou manatunatu lea i na manatu a o fai a latou galuega masani. (Ios 1:8; Sl 119:97) E faapefea ona aogā atili iā te oe le mau o le aso? Ia faitau le mau ma iloilo lona siʻomaga. Taumafai e mafaufau i se tala o le Tusi Paia e fetaui i le mataupu silisili lea o loo faamatilatila mai i le mau. Ona faatatau lea o lenā mataupu silisili i lou olaga. Pe a faaaofia le Afioga a le Atua i au filifiliga, o le a taʻitaʻia ai lou olaga ma e maua ai aogā.​—Sl 119:105.

E talanoaina e aiga Peteli i le lalolagi aoao le mau o le aso i le taimi o le malū taeao. I tausaga e leʻi leva atu, na faaaofia ai na polokalame i le TV i le Initaneti a Molimau a Ieova^® i le vaega o POLOKALAME MA MEA E TUTUPU. O le ā le taimi mulimuli na e maimoa ai i se tasi o na polokalame? Atonu o loo i ai nisi mataupu e fetaui lelei ma lou tulaga. O se faaaʻoaʻoga, e faapefea i le tala iā Lota ona aafia ai au filifiliga?

MAIMOA I LE VITIŌ AUA LE MANAʻO I LE LALOLAGI (1IO 2:15), ONA TALI LEA O FESILI NEI:

• O le ā le mataupu silisili o le Tusi Paia o loo faavae mai ai lenei talanoaga?

• E faapefea i le tala iā Lota ona faataʻitaʻi mai ai le lamatiaga o le manaʻo i le lalolagi po o mea o iai?​—Ke 13:12; 14:12; 19:3, 12, 13, 24-26

• E faapefea ona faaalia e tatou te alolofa iā Ieova nai lo le manaʻo i le lalolagi po o mea o iai?