O le ā e Faalagolago i ai Lou Lumanaʻi?

MEA E TALITONU I AI LE TOʻATELE

SAʻILI I FETU: E talitonu nisi ua uma ona tuupōina lo latou lumanaʻi, e fua i le auala na faatulaga ai fetu i le taimi lava na fananau ai. E latou te faitau i faamatalaga e uiga i o latou fetu, ina ia iloa ai lo latou lumanaʻi ma fesoasoani iā i latou e faia ai filifiliga.

SAʻILI I FAIPELĒ: E talitonu nisi, o le saʻili i faipelē e mafai ona latou iloa ai māfuaaga o mea na tutupu iā i latou. Pe a latou iloa le māfuaaga, o le a mafai ai ona latou foʻia faafitauli ae saʻili i mea e taulau manuia ai.

TAPUAʻIGA I TUAA: O loo talitonu pea nisi e tatau ona faamalieina o latou tuaa ua maliliu ina ia latou maua ai le puipuiga ma faamanuiaga. Ua faapea mai Vana mai i Vietiname, “Ou te talitonu pe a ou tapuaʻi i oʻu tuaa, o le a ou selesele ai se olaga lelei i le taimi nei ma se lumanaʻi saogalemu mo aʻu ma laʻu fanau.”

TOE OLA MAI I SE ISI TINO: E toʻatele e manatu o le olaga o se faataamilosaga e lē muta o le ola, oti, ma le toe fanau mai. E latou te talitonu o mea lelei po o mea leaga o loo latou tofo i ai i le taimi nei, o āuga na o mea na latou faia i o latou olaga muamua.

E manatu le toʻatele o nei talitonuga o ni faiga faaagaga. Peitaʻi, o loo latou faia pea faiga e pei o le faitauina o alofilima, saʻili i fetu, faiga faataulāitu, saʻili i faipelē ma isi mea faapena. E latou te manatu, atonu o nei faiga e mafai ona fesoasoani iā i latou e iloa ai lo latou lumanaʻi.

PE E FESOASOANI NA FAIGA I TAGATA?

Po o mafai e i latou o loo maufaatuatuaina nei talitonuga ma nei faiga ona maua se olaga lelei ma se lumanaʻi saogalemu?

Seʻi mātau le mea na tupu iā Hào, e nofo i Vietiname. Na ia saʻili i fetu ma tapuaʻi i tuaa ina ia taʻitaʻia ai o ia. Pe na ia taulau ai? Na faapea mai Hào, “Na gau laʻu pisinisi, tele aitalafu, tele faafitauli i loʻu aiga, ma na lofitūina aʻu i le popole.”

Na talitonu foʻi Qiuming mai i Taiwan i le saʻili i fetu, toe ola mai i se isi tino, laki ma le tapuaʻi i tuaa. Ina ua ia suʻesuʻeina ma le totoʻa nei faiga, na ia faapea mai, “Na ou iloa ane o nei aʻoaʻoga ma nei tū e feteenaʻi ma e lavelave. Na ou iloa e masani ona sesē valovaloga a ē e saʻiliʻili i fetu. Ae o le talitonuga o le toe ola mai i se isi tino, pe afai e te lē manatua mea i lou olaga muamua, e faapefea la ona e sui ma faia mea lelei e sili atu i le isi ou olaga?”

Ua iloa e le toʻatele e pei o Hào ma Qiuming, e lē faalagolago lo tatou lumanaʻi i le laki, fetu, tuaa ua maliliu, po o le toe fanau mai i se isi tino. Po o lona uiga la, e lē mafai ona tatou puleaina lo tatou lumanaʻi?

E toʻatele e manatu e mafai ona maua se lumanaʻi lelei pe a saʻili i aʻoaʻoga maualuluga ma le tamaoaiga. O le ā ua iʻu i ai nisi na faia na filifiliga?