LE AUALA E TAOFIA AI LE FEITAGAʻI

1 | Aua le Faailoga Tagata

Aʻoaʻoga a le Tusi Paia:

“E lē faailogaina tagata e le Atua, ae [o so o se tasi e] mataʻu iā te ia i nuu uma lava, ma fai le amiotonu, e talia e ia.”—GALUEGA 10:34, 35.

Le Uiga:

E lē faamasinoina i tatou e Ieovaa le Atua e tusa ma o tatou atunuu, ituaiga, lanu po o aganuu. Peitaʻi, e uaʻi mai o ia i o tatou manatunatuga ma faanaunauga. Ua faapea mai foʻi le Tusi Paia, “o le tagata e vaai i le tino a o Ieova e vaai i le loto.”—1 Samuelu 16:7.

Mea e Mafai Ona E Faia:

E ui e tatou te lē iloa mea o loo i le loto o se tasi, ae e mafai ona tatou faaaʻoaʻo i le Atua e ala i le lē faailoga tagata. Ia taumafai e vaai i tagata taʻitoʻatasi, nai lo o le faavasega o i latou i se vaega o tagata. Pe a e manatu e iai ni ou faalogona lē lelei i se tasi e ese le lanu po o le atunuu, ia tatalo i le Atua e fesoasoani iā te oe e taofia na faalogona. (Salamo 139:23, 24) Pe a e talosaga ma le faamaoni iā Ieova e aumai le malosi e aveese ai le faailoga tagata, e mafai ona e mautinoa o le a ia faafofoga mai i lau tatalo, ma fesoasoani mai iā te oe.—1 Peteru 3:12.

a O Ieova, o le suafa lea o le Atua.—Salamo 83:18.

“E leʻi mafai muamua ona ou māfana atu i se palagi . . . Ua avea nei aʻu ma vaega o le ʻauuso moni faavaomalo.”—TITUS

Se Mea Moni na Tupu—TITUS

Na Manumalo Mai i le Feitagaʻi

Na avea Titus o se sui o se kegi sauā, o ē na feita i tulafono na faaauiluma ai le faailoga tagata. Na ia faapea mai: ʻE matou te ō i nofoaga o le taulaga e lē talia ai tagata uli, e pei o faletalimālō ma pā pia, ina ia faatupu se vevesi.’ Na faapea mai Titus na ia faia nei mea ona o lona ita, ma na ia toe fai mai: “Pe a ma tauupu ma se isi, po o se tamāloa po o se fafine, o aʻu lava e muamua alu atu laʻu tuʻi.”

Na amata ona faia e Titus suiga ina ua ia suʻesuʻeina le Tusi Paia ma Molimau a Ieova. Ina ua ia faitau i le Tusi Paia, na matuā suia ai le auala e mafaufau ai. Na matuā pāʻia lona loto i le folafolaga mo le lalolagi i le lumanaʻi, lea o le a “lē toe iai se oti, po o se faanoanoa, po o se tagiauē, e lē toe iai foʻi se tigā.”—Faaaliga 21:3, 4.

E leʻi faigofie iā Titus ona aveesea le ita mai i lona loto i le taimi muamua. Na ia faapea mai: “Sa faigatā iā te aʻu ona suia le auala e mafaufau ma gaoioi ai.” Ae na fesoasoani iā te ia le Galuega 10:34, 35, lea o loo taʻua ai e lē faailoga tagata le Atua.

O le ā le iʻuga? Na faapea mai Titus: “Ua ou talitonu nei o Molimau a Ieova o le tapuaʻiga moni, ina ua ou mātauina le alofa o loo iā i latou, e tusa lava po o le ā le ituaiga po o le lanu. A o oʻu leʻi papatiso e avea o se Molimau, na valaaulia aʻu e se palagi o le faapotopotoga e fai ʻaiga faatasi i lona fale. E pei o se miti lenā mea. E leʻi mafai muamua ona ou māfana atu i se palagi, e oo lava i le aai faatasi. Ua avea nei aʻu ma vaega o le ʻauuso moni faavaomalo.”